سیاسی پیش رفت دیاں کہانیاں

اشرف شریف

بہت سارے لوک اکٹھے صدارتی طرز حکومت دی دھمک سنن دا دعویٰ کر رہے نیں کجھ نے تے امریکی تے فرانسیسی نظاماں دا مکسچر بنا کے ایہنوں پاکستان دا نظام قرار دے دتا اے۔ اپوزیشن حکومت گران لئی پس پردہ ڈیل دیاں گلاں کر رہی اے حکومتی بنچ جواب وچ مسلم لیگ ن دے چار سینئر اراکین دا معاملہ اٹھا رہے نیں جو شریف خاندان نوں نفی کرکے وزیراعظم بنن بارے ڈیل لئی تیار نیں۔ اوہناں وچوں اک دا ناں کجھ ہفتے پہلاں کالم وچ دس چکیا واں جدوں خفیہ رابطے شروع ہوئے سن۔ ڈیل دا بازار کناں گرم اے ایہدا اندازہ ایس گل توں کرو کہ سندھ تک محدود سمجھی جان والی پیپلزپارٹی نے وی اک پیکیج تیار کرکے فیصلہ سازاں نوں پیش کر دتا اے۔ ایس پیکیج وچ پی پی ولوں وزیراعظم دے امیدوار ریاست نوں لاحق بحراناں تے ایہناں بحراناں نوں وسیع البنیاد حکومت دی مدد نال حل کرن بارے کجھ تفصیل موجود اے۔ ایس پیکیج دا پیش لفظ آصف علی زرداری دا اوہ بیان اے جہدے وچ اوہناں نے کسے خلائی قوت نوں کہیا سی کہ اسیں ریاست نوں بحراناں چوں کڈھنا جاننے آں تسیں پہلے ایس عمران خان نوں گھر گھلو فیر مسئلے دا حل دساں گے۔ سیاسی قیادت توں سنجیدگی تے بالغ نظری دی امید پیدا نہیں ہو پا رہی۔ انج لگدا اے اسیں ورھیاں تک جس پودے نوں زیتون سمجھ کے دیکھ بھال کردے رہے اوہ کاہو نکل آیا اے ایہدے نال کلہاڑی تے کسے دا دستہ تے بنایا جا سکدا اے پھل نہیں مل سکدا۔ سابق نقصان تے خسارے دا احساس اوس ویلے ختم ہو جاندا اے جدوں مستقبل وچ فائدے دے امکانات پھلدے پھولدے نظر آن۔
ساڈے آل دوالے ترتیب‘ دانشمندی تے تعمیر دی خواہش ورگے پھُل نہیں کھل سکے اسیں کتھے جائیے کہ آن والا زمانہ وی انھیرا وکھائی دے رہیا اے۔ جمہوریت دی سینکڑوں تعریفاں نیں ہر موقعے تے جمہوریت دا شربت نویں بھانڈے وچ ڈھل جاندا اے پر جمہوری اقدار اوہو رہندیاں نیں جمہوریت ریاست دے سامنے سرنڈر کرن والی ڈاکو پھولن دیوی نوں لوک سبھا دی معزز رکن بنا سکدی اے کجھ ملکاں وچ جمہوریت چنگے بھلے نیک نام لوکاں نوں لٹ مار ول راغب کر لیندی اے۔ جنرل پرویزمشرف نوں رخصت ہوئے پندراں ورھے ہون والے نیں۔ ایس عرصے وچ مسلم لیگ ن‘ پیپلزپارٹی تے تریجی جمہوری قوت تحریک انصاف اک اک واری اقتدار وچ آ چکیاں نیں۔ کے پی کے وچ تحریک انصاف دوجی مدت پوری کرن جا رہی اے پنجاب وچ ن لیگ مسلسل دس ورھے حکومت کر گئی سندھ وچ پیپلزپارٹی مسلسل اقتدار دے پندراں ورھے مکمل کرن والی اے۔ بلوچستان وچ بلوچستان عوامی پارٹی نے تبدیلی دا احساس پیدا کیتا اے۔ آزادکشمیر وچ پہلی واری مسلم لیگ ن تے پی پی توں علاوہ کوئی حکومت بنی اے گلگت بلتستان وچ پی ٹی آئی دی حکومت اے۔ ہن ذرا جائزہ لوو کہ پاکستان صرف لہور‘ کراچی تے اسلام آباد نہیں۔ ایہدے وچ اوہ سارے علاقے شامل نیں جتھے پی ٹی آئی‘ پی پی تے اوہناں دیاں اتحادی جماعتاں اقتدار وچ نیں۔ کشمیر کونسل دیاں دو سیٹاں دے انتخاب وچ دلچسپ صورتحال پیدا ہو گئی اے۔ جے پیپلزپارٹی نے مسلم لیگ دی مدد نہ کیتی تے مدت دے بعد پہلی واری ہووے گا کہ کشمیر کونسل وچ مسلم لیگ دی اک سیٹ وی نہیں رہوے گی۔ اک اہم معاملہ جنوبی پنجاب صوبے دا اے پارلیمنٹ وچ بل پیش کیتا جا چکیا اے پی ٹی آئی تے پی پی دے وچکار ایس بل تے بڑی حد تک اتفاق پایا جاندا اے۔ معاملہ صرف ایس نکتے تے اڑیا اے کہ فوراً فائدہ کون چکے تے لمی مدت تک پھل کون اپنی جھولی وچ پان تے اکتفا کردا اے۔ سینٹ وچ لیڈر آف دی اپوزیشن یوسف رضا گیلانی واضح کہہ چکے نیں کہ صوبہ جنوبی پنجاب تے فیصلہ کرن لئی اوہناں دی جماعت نال گل کیتی جاوے اوہ گورنر تے وزیراعلیٰ دا مطالبہ کر رہے نیں۔ شاید جان بجھ کے اوہناں نے ایس پرائے وچ گل کہ سنن تے پڑھن والا ایہنوں مکمل صوبے دی شرط سمجھے یاں دوویں منصب پی پی نوں دین دا مطالبہ۔ میرا خیال اے ایہ گورنر تے وزیراعلیٰ پی پی دا مقرر کرن دا مطالبہ ای اے۔
پیپلزپارٹی دا خیال اے کہ جنوبی پنجاب وچ اوہ اپنے سُتے ووٹ بینک نوں جگا سکدی اے ممکن اے ایس مقصد لئی اوہو کیمیاگری ورتی جاوے جو لہور دے حلقہ 133 دے حالیہ ضمنی الیکشن وچ ویکھی گئی۔ دو صوبیاں وچ حکومت بنان دا منصوبہ پیپلزپارٹی دے سکڑدے وجود نوں جمہوری ہتھ پیر پھیلان دا موقع دے سکدا اے۔ دوجے پاسے پی ٹی آئی اے جو اپنے انتخابی منشور دی ایس اہم شق نوں پورا کرنا چاہندی اے۔ سرائیکی ووٹ بینک پی ٹی آئی دے نال باقی لسانی اکائیاں دی نسبت زیادہ اے پر مسئلہ ایہ وے کہ حکومت دے مشکل معاشی فیصلیاں دی وجہ نال سارے پاکستانی اکوجہے متاثر ہوئے نیں۔ پی ٹی آئی نوں ووٹر تک اپڑن لئی کوئی پوڑھی چاہیدی اے۔ جنوبی پنجاب صوبہ بھاویں اک جاگیردار صوبہ ہووے گا جتھے عام بندہ ہزاراں ایکڑ دے مالک منتخب نمائندیاں دے رحم و کرم تے رہوے گا بہرحال ایہ اوتھوں دا اک مقبول مطالبہ اے جہدے تے پی ٹی آئی اپنا ووٹ بینک ودھان لئی انحصار کر رہی اے۔ مسلم لیگ ن دے کول امید دی لالٹین ضمنی انتخابات وچ اپنیاں سیٹاں تے فیر کامیابی اے۔ کنٹونمنٹ بورڈ دے انتخابات نے دوجی امید پیدا کیتی۔ مسلم لیگ سمجھدی اے کہ پنجاب دے بلدیاتی انتخابات اوہنوں فیر اقتدار وچ لیا سکدے نیں۔ فیر اک اہم تقرری دا ویلا وی ہو رہیا اے پراندازے ہمیشہ سامنے دیاں چیزاں تے تکیہ کرن والیاں دے غلط ہوندے نیں۔ پردے وچ جو کجھ ہو رہیا اے اوہ اک معمول دی کاروائی اے جو عام انتخابات توں اک ورھے پہلاں شروع ہو جاندی اے۔ ہن ایہدی بنیاد تے کہانیاں لکھنیاں ہون تے لکھدے رہو۔٭٭