21 فروری ماں بولی دیہاڑ 2022دے حوالے نال مشاورتسبھے پنجابی تنظیماں دا اِک مُٹھ ہو کے تحریک چلائون اتے اتفاق

رپورٹ: ارشاد شیخ

پنجابی یونین دے پربندھ ہیٹھ پچھلے دیہاڑ پنجاب ہائوس وچ پنجابی زبان دے فروغ تے حقاں دے حصول لئی ملک بھر وج سرگرم پنجابی تنظیماں دے نمائندیاں دا اہم اجلاس ہویا۔ اجلاس وچ پچھلے ہون والے اجلاساں وچ کیتے جان والے فیصلیاں تے 21فروری نوں جگت ماں بولی دیہاڑ دے موقع تے پنجابی بولی دے نال ہون والے امتیازی سلوک دے خلاف تے پنجابی زبان دے حقاں دی مَنگ کرن لئی پنجاب اسمبلی دے سامنے کیتے جان والے ساری پنجابی تنظیماں دے مشترکہ احتجاجی مظاہرے دے انتظاماں داجائزہ لیا گیا۔ اجلاس دی میزبانی پنجابی یونین دے چیئرمین مدثر اقبال بٹ تے وائس چیئرمین بلال مدثر بٹ نے کیتی۔ اجلاس وچ مختلف پہلوئواں دا جائزہ لین مگروں اک واری فیر اتفاق رائے نال 21 فروری نوں ہر صورت احتجاجی مظاہرہ کرن دا فیصلہ کیتا گیا اے۔
مجمان مدثر اقبال بٹ نے مشترکہ اعلامیہ دا اعلان کردے ہوئے آکھیا کہ پاکستان سپرلیگ کرکٹ میچاں پاروں 21فروری نوں مال روڈ اتے کجھ مسئلیاں دا سامناکرنا پے سکدا اے لیکن اسیں ہر صورت پنجاب اسمبلی دے سامنے اپنا احتجاجی مظاہرہ کراں گے تے پنجابی نوں ذریعہ تعلیم بنان دا اپنا مطالبہ حکومت دے سامنے رکھاں گے۔ اوہناں نے آکھیا کہ اسیں پرامن لوک آں تے پرامن طریقے نال اپنی گل کراں گے۔ اجلاس وچ پنجابی تنظیماں دے جنہاں نمائندیاں نے رَلت کیتی اوہناں وچ منے پرمنے پنجابی شاعر بابا نجمی‘ دانشور تے نامور صحافی الیاس گھمن‘ پنجابی پرچار دے رہنما احمد رضا وٹو‘ پنجابی ادبی بورڈ دی سیکرٹری پروین ملک‘ پنجابی دی سرگرم کارکن دیپ سعیدہ‘ نذیر جوئیہ‘ بابا وارث‘افضل ساحر‘یوسف پنجابی‘جاوید پنچھی‘آصف رضا‘احمد اقبال بزمی‘اسلم گل‘سجاد حیدرتے آصف رضا شامل سن،اجلاس دی ابتدا وچ میزبان پنجابی یونین دے چیئرمین مدثر بٹ نال گل بات دا آغاز کردے ہوئے پچھلی میٹنگاں دی کارروائی دا مختصر جائزہ پیش کیتا۔ ایس موقع تے الیاس گھمن ولوں سارے رلتیاں دے گلیاں وچ پنجابی پٹکے پائے گئے تے 21فروری دے احتجاجی مظاہرے لئی سراں اتے بنھن لئی کالے رنگ دی پٹیاں وی تقسیم کیتیاں جنہاں اتے پنجابی نوں پرائمری تک ذریعہ تعلیم بنائے جان دا مطالبہ وی تحریر اے۔ ایس دوران دیپ سعیدہ نے گل بات وچ حصہ لیندے ہوئے آکھیا کہ سانوں ایسے پٹکے ڈیزائن کرنے چاہیدے نیں جنہاں اتے پنجابی کلچر تے ثقافت دی جھلک نظر آوے جیویں سندھی اجرک ہوندی اے تے ساہنوں ساریاں نوں احتجاجی مظاہرے وچ وی اوہناں پٹکیاں دے نال رَلت کرنی چاہیدی اے۔ ایہدے تے الیاس گھمن نے دَسیا کہ 21فروری دے احتجاجی مظاہرے لئی وڈی گنتی وچ پٹکے‘ احتجاجی پٹیاں‘ سٹیکرتے پمفلٹ بنوا لئے گئے نیں جہڑے شریکاں وچ تقسیم کیتے جان گے۔

میزبان مدثر اقبال بٹ نے دَسیا کہ انج دے ای 5ہزار پمفلٹ بنوا کے اسلام آباد وی بھیج دتے گئے نیں۔ ایس موقع تے نذیر جوئیہ نے سوشل میڈیا اتے بعض لوکاں دی ایسی پوسٹاں وَل توجہ دوائی جنہاں وچ دُجی زباناں اتے تنقید تے تضحیک دا عنصر پایا جاندا اے۔ ایہدے تے پنجابی ادبی بورڈ دی سیکرٹری پروین ملک نے آکھیا کہ سانوں اپنی زبان دے ودھا تے حق دی گل کرنی چاہیدی اے۔ کسے ہور زبان اتے نہ تے تنقید کرنی چاہیدی اے نہ اوہدی تضحیک دی حوصلہ افزائی کرنی چاہیدی اے۔ الیاس گھمن نے آکھیا کہ ساڈا مقصد اپنی ماں بولی نوں اوہدا مقام تے حق دوانا اے۔ ساڈے لئی دنیا دی ساری مادری زباناں قابل احترام نیں۔ ایس موقع تے احمد رضا وٹو نے آکھیا کہ سانوں ساری زباناں دا احترام کردے ہوئے اپنی ماں بولی دے حقوق دی آواز اچی کرنی اے جہدی اجلاس دے سارے شرکاء نے تائید کیتی۔ اجلاس وچ مدثر اقبال بٹ تے الیاس گھمن نے اجلاس دی تیاریاں دے حوالے نال دسیا کہ ساڈی تیاریاں پوریاں نیں جہدی نگرانی احمد رضا وٹو دی سربراہی وچ قائم 5 رکنی کمیٹی کر رہی اے جہدا حتمی جائزہ لین لئی 20فروری نوں میٹنگ ہووے گی۔ا جلاس وچ اتفاق رائے نال 21فروری دے پروگرام نوں وسعت دے کے الحمرا وچ اک سیمینار منعقد کرن دا فیصلہ وی کیتا گیا۔ افضل ساحر نے آکھیا کہ میرے ذمہ جہڑا وی کم لگایا جاوے گا میں اوہنوں پورا کراں گا۔ اوہدے اتے اوہناں دی سربراہی وچ 5رکنی ٹیم تشکیل دے دتی گئی اے جہڑی فنکاراں تے سوشل میڈیا دے ذریعے 21فروری دے پروگراماں دا پیغام ودھ توں ودھ لوکاں تک پہنچائے گی۔اجلاس دے اختتام تے میزبان مدثر اقبال بٹ نے مشترکہ اعلامیہ دا اعلان کردے ہوئے دسیا کہ حالات کجھ وی ہون اسیں 21فروری نوں پنجاب اسمبلی دے سامنے احتجاجی مظاہرہ ہر صورت کراں گے جہدے انتظامات کر لیتے گئے نیں۔ احتجاجی مظاہرہ مگروں الحمرا دے ہال نمبر2وچ ماں بولی دے حوالے نال سیمینار ہووے گا جہدے وچ ملک دی نامور شخصیات رلت کرن گئیاں تے لوک فنکار اپنے فن دا مظاہرہ وی کرن گے۔ اوہناں آکھیا کہ ایہناں پروگراماں وچ پنجابی نال محبت کرن والیاں تے پنجابی لئی کم کرن والیاں نوں چاہید ا اے کہ اوہ سیاسی تے مذہبی وابسطگیاں توں بالاتر ہو کے خود وی شریک ہون تے دوجے لوکاں تک وی ماں بولی دے حق لئی آواز چکن دا پیغام پہنچان تاں جے 21فروری نوں پنجاب اسمبلی دے سامنے ہون والے احتجاجی مظاہرے وچ ودھ توں ودھ لوکی رلت کرن۔ اجلاس دے اختتام تے میزباناں ولوں پروہنیاں دی تواضع پرتکلف کھانے نال کیتی گئی۔