الیکشن کمیشن ولوں سیاسی جماعتاں دے اثاثیاں دی تفصیلات جاری

اسلام آباد: الیکشن کمیشن نے سیاسی جماعتاں دے اثاثیاں دی تفصیلات جاری کر دتیاں۔ تحریک انصاف دے اثاثیاں دی مالیت 22 کروڑ 53 لکھ روپے، پیپلزپارٹی دے کول 16 کروڑ روپے جد کہ نون لیگ دے اثاثیاںدی مالیت 8 کروڑ 17 لکھ روپے اے۔

اک ورھے وچ 9 کروڑ دی کمی دے نال تحریک انصاف دے اثاثیاں دی مالیت 22 کروڑ 53 لکھ روپے اے، تحریک انصاف نے 1 ورھے وچ 50 کروڑ 87 لکھ توں ودھ اخراجات کیتے۔پاکستان پیپلزپارٹی دے کول 16 کروڑ روپے دا بینک بیلنس اے جد کہ 1 کروڑ 35 لکھ روپے دا چندہ ملیا، پیپلز پارٹی نے 2 کروڑ توں ودھ دے اخراجات کیتے تے آمدن 57 لکھ ہوئی، پاکستان پیپلزپارٹی دے اثاثیاں دی مالیت 70 لکھ 16 ہزار روپے اے۔

مسلم لیگ ن دے اثاثیاں دی مالیت 8 کروڑ 17 لاکھ روپے اے، مسلم لیگ ن نوں 1 کروڑ 55 لاکھ روپے دی آمدن ہوئی تے اخراجات 20 کروڑ روپے دے ہوئے۔

ق لیگ دے کول 4 کروڑ 99 لکھ روپے مالیت جد کہ ایم کیو ایم پاکستان دے کول 4 کروڑ 19 لکھ دے اثاثے نیں۔ایم کیو ایم نے چندے دی مد وچ 4 کروڑ 79 لکھ روپے اکٹھے کیتے۔

جماعت اسلامی 90 لکھ 18 ہزار روپے دے اثاثیاں دی مالک اے، شیخ رشید دی عوامی مسلم لیگ دے کول صرف ڈھائی لکھ روپے، بلوچستان عوامی پارٹی دے کول 2 لکھ 31 ہزار روپے دا بینک بیلنس اے۔

الیکشن کمیشن دے مطابق 125 توں ودھ رجسٹرڈ سیاسی جماعتاں وچوں صرف 82 سیاسی جماعتاں نے اثاثیاں دی تفصیلات جمع کرائیاں نیں۔