معاملات سلجھ گئے، حکومتی کمیٹی نے اتحادی جماعت ق لیگ نوں منا لیا
لہور: مسلم لیگ ق تے سرکار وچکار ڈیڈ لاک ختم ہو گیا، ق لیگ دے مطالبات تسلیم کر لئے گئے، سپیکر پنجاب اسمبلی چودھری پرویز الٰہی نے سرکار دے نال چلن دا اعلان کر دتا۔
گورنر پنجاب چودھری سرور، وزیراعلیٰ عثمان بزدار، وفاقی وزیراں پرویز خٹک، شفقت محمود تے اسد عمر نے چودھری پرویز الٰہی دے نال وفد دی سطح تے مذاکرات کیتے، اک گھنٹے تک جاری رہن والے مذاکرات دی کامیابی دا اعلان مشترکہ پریس کانفرنس وچ کیتا گیا۔
مسلم لیگ ق تے حکومتی ٹیم ولوں معاملات طے پا جان دا باضابطہ اعلان کر دتا گیا اے۔ حکومتی کمیٹی دے سربراہ وزیر دفاع پرویز خٹک دا کہنا اے مسلم لیگ ق نوں یقین دہانی کروائی اے کہ رل مل کے فیصلے کراں گے، ساڈے وچکار معمولی تحفظات سن جہناں نوں اپوزیشن نے ہوا دتی۔
سپیکر پنجاب اسمبلی چودھری پرویز الٰہی آکھیا اسیں چاہنے آں کہ اگلے الیکشن وچ وی تحریک انصاف دے نال اکٹھے جایئے، مہنگائی سنے دوجے مسئلیاں تے گل ہوئی، کجھ نویں ایشوز وی زیر بحث آئے جہڑے آن والے ویلے وچ ساہمنے لیاواں گے۔حکومتی کمیٹی نے مسلم لیگ ق دے مطالبات تسلیم کر لئے۔
ذرائع دے مطابق ق لیگ نوں ترقیاتی فنڈز جلد جاری کر دتے جان گے، مسلم لیگ ق دے وزراء وزارتاں دے معاملات وچ بااختیار ہون گے، کسے وی قابل اعتراض افسر دی تقرری تے تحریک انصاف اعتراض کر سکے گی، اعتراض تے مسلم لیگ ق متعلقہ وزارت وچ تعیناتی دے کیتے نویں افسر دا ناں دین دی پابند ہووے گی۔
