دینہہ دی لوء
خالدحسین تھتھال
دینہہ دی لوئے وی اکھیں تکدیاں
اپنے ہتھیں وی کدے بندہ
اپنا آپ کھوہا بہندا اے
اپنی شے کوئی
اپنے ہی گھر وچ
اپنے ہتھیں سانبھن لگیاں
بندہ آپ گوا بہندا اے
اپنی چُپ نال پردہ پاندیاں
اپنے اندر دی گل بندہ
اپنے آپ دُھما لیندا اے
لوبھ شکنجے دے وچ پھس کے
کھٹی کھٹن دے لئی بندہ
اپنی اُور لہا بہندا اے
دُوجے کسے دے بھلے دی خاطر
اپنا کجھ زیان وی کر کے
بندہ کجھ کما لیند ا اے
