غزل
الیاس آتش
پیار والے بوٹے ایتھے لائی جا توں آتشا
وَیر تے کرودھ نوں مُکائی جا توں آتشا
گلاں بھائی چارے دیاں عام کر ہر تھاں
نھیریاں چ دیپ وی جگائی جا توں آتشا
ہر پاسے پیار دیاں ونڈ توں شرینیاں
جگ توں کدورتاں مٹائی جا توں آتشا
ہر ویلے معرکہ یزید تے حسینؑ دا
سدا ساتھ حق دا نبھائی جا توں آتشا
کافراں توں ودھ کے منافقاں دی چال اے
مومناں دے تائیں سمجھائی جا توں آتشا
کیتا سودا قوم دا اے قوم دے سوداگراں
سُتی ہوئی قوم نوں جگائی جا توں آتشا
شان قرآن دی اے جگ سارا جان دا
پتہ ناہیں جس نوں بتائی جا توں آتشا
جھگڑے مُکا کے سارے اپنی توں قوم دے
اُجڑیاں جھوکاں نوں وسائی جا توں آتشا
دل دیاں گلاں اج باہر کڈھ دل چوں
آکڑے نیں سر جو نوائی جا توں آتشا
