مکان نمبر216-E/IIتوں قبر نمبر1541 ویلنشیا قبرستان تک!

اک دن 216-E/II واپڈا ٹائون دا گیٹ کھلیا سی مگر کھلی بانہواں نال دوست احباب تے عزیز و اقارب دا استقبال کرن والا ناہید شاہ بوہے اتے نہیں سی۔ انج دا ای کجھ 18فروری نوں ہویا سی جہدے توں اک دن پہلے 17 فروری بروز جمعہ اوہ سہ پہر دو وجے جاوید انور دی فیملی نال اپنی آخری ملاقات کر کے اوہناں نوں ہسدے ہوئے رخصت کرن دے کجھ گھڑیاں مگروں آپ وی اپنے پیارے دوست ڈاکٹر جاوید انور نوں ملن نوں بے تابانہ وار انج نسے کہ نہ تے اوہناں نوں رخسانہ بھابی دی چیخاں سنائی دتیاں نہ ای رجا تے حرا دی اوہ دھاڑاں جہڑیاں اوہناں دے گلے وچ دب کے اوہناں نوں غم و الم دی ایسی تصویر بنا گئیاں جنہاں نوں ویکھ کے پتھر توں پتھر دل انسان وی بے اختیار اتھروواں دی جھڑی لا دیندا جد کہ اوہ بت بنی حالت سکتہ وچ رہیاں۔ فیضان دا تے حال ای عجیب سی۔ پیو نوں کینسر جئے موذی مرض نال لڑدا ویکھ کے ای اوس جوان رعنا دی مردانگی ہوا ہو چکی سی۔ نوجوان اپنے والدین دے بڑھاپے نوں ہور خوشگوار بنان لئی مقابلے دے امتحان دی تیاری کردے ہوئے کتاباں کھولدا تے ورقے اتے بکھرے لفظ آہستہ آہستہ اوہدے گھر وچ بستر علالت اتے پئے محبتی پیو دا تصویری خاکہ بن جاندے تے اوہ اوس خاکے وچ اپنی مرضی دی رنگ آمیزی کردے کردے ناہید نال اوہ مکالمہ شروع کر دیندا جہڑا اوہدے نال بالمشافہ کرن دا حوصلہ نہیں رکھدا سی۔ دنیا دے ہر موضوع اتے پیو نال کھل کھلا کے بحث مباحثہ کرن والا ٹیلنٹڈ نوجوان اخیر تک والد کولوں سوال دا جواب حاصل کرن وچ نکام رہیا کہ اوہ اوہنوں ایسے ویلے وچ کیوں تے کہدے سہارے اتے چھڈن دی تیاری کر رہیا اے جد کہ اوہنوں تے دونویں بھیناں نوں پیو دے سایہ عاطفت دی اشد لوڑ اے کہ بھیناں والدین دی امیداں توں ودھ کے تعلیمی میدان وچ کامیاب رہیاں نیں تے خود اوہ وی تے آوارگی دے ایہناں تھپیڑیاں توں بہت کجھ سکھ چکیا اے جیہدا ناہید دی شہہ اتے ای اوہنوں کھان دا چسکا پیا سی۔
فیضان دی ماں یعنی بھابی رخسانہ تے ناہید دی ایس اذیت نوں اپنے لہو وچ رچا بسا چکیاں سن جہڑے موذی مرض نے ناہید دے پیرہن خاک وچ انج سرایت کردتا سی کہ ہن سوائے خاک بسری دے اوہدا کوئی دوجا علاج نہیں سی۔ مفت دے ایس علاج توں ناہید نوں بچان لئی اوہ نیک بخت خاتون اپنے اوہ پیسے وی پانی وانگوں بہا رہی سی جہڑے اوہنے دونویں محبوب دھیاں دے ہتھ پیلے کرن لئی بڑی کفایت شعاری نال بچا بچا کے رکھے ہوئے سن مگر اوہ ’’بنجارے‘‘ نوں خالی کلائیاںوکھا کے وی رام نہ کر سکی کہ اوہ اوہناں وچ چوڑیاں نہیں اوہدے مضبوط ہتھاں دی فنکارانہ انگلیاں دی گرفت دا اوہ حلقہ سدا بہار گجرے وانگوں پائے رکھنا چاہندی اے جنہوں تھامے اوہ اوہدے نال سفر زیست اتے نال جین مرن دا وعدہ کر کے گھروں نکلی سی۔
17فروری دی دوپہر نماز جمعہ تک ناہید دی صحت و تندرستی لئی خدا دے حضور اٹھے ہتھ اوس دن دی سہ پہر توں ہن تک ناہید لئی اٹھے ہوئے نیں مگر ہن رب کولوں اوہنوں روبصحت کرن دی التجاواں اوہدے لئی مغفرت دی دعاواں تے مناجات وچ بدل چکیاں نیں۔ ناہید دے نال مسکراہٹاں تے قہقہیاں دا تبادلہ کرن لئی آن والے سارے دوست آہاں تے ہچکیاں سینے وچ دبائے واپڈا ٹائون دے اوس گھر دے کھلے گیٹ دے باہر کرسیاں تے دریاں وچھائے نعتاں سن رہے نیں۔ جہڑے گھر دے ڈرائنگ تے بیڈ روم وچ بیٹھ کے اوہ آپ سماعت کیتا کردا سی۔
جمعرات نوں اوہدا چہلم سی… بھابی نے دسیا کہ ناہید نوں گھر وچ میلاد کران دا بڑا شوق سی مگر بیماری توں شفا پان مگروں جشن صحت یابی دے انتظار نے طول کھچیا تے موت محبوبہ وانگوں اوہنوں لپک کے ویلنشیا ٹائون دے قبرستان دے پلاٹ نمبر1541 تک لے گئی۔ ایہ خالی پلاٹ جہڑا نہ جانے کدوں توں اوہدے انتظار وچ ویرانہ کٹ رہیا سی‘ اج سنگ مرمر دی سلاں اتح کندہ آیات قرآنی تے دعاواں دے نال اوہدی غزل دے اوہناں شعراں توں وی مزین اے جنہوں لکھدے ہوئے ناہید نے کدی سوچیا وی نہیں سی کہ اپنی قبر دے کتبے دی سجاوٹ دا سامان کر رہیا اے۔
کئی سال لنگھ جان دے باوجود ایس لمحے تک میں ناہید دی رفاقت دے دکھ نوں بھگت رہیا واں۔ اوہدی موت دا سوگ مینوں جدائی دے روگ وانگوں لگ چکیا اے۔ عجیب روگ اے جہنے ایہناں ورھیاں وچ مینوں ناہید دے نال گزارے ہوئے35 ورھیاں دے اوہناں بیتے لمحیاں نوں وی زندہ کر دتا اے جہڑے کدوں دے دامن فراموشی تھامے یاداں دے غبار وچ کدھرے گم ہو چکے سن۔

عارف محمود دریائے جہلم دے کنارے توں راوی دے کنارے تک آندے آندے اینا کلا نہیں ہویا سی جنا 216-E/IIتوں قبر نمبر1541 تک دا فاصلہ طے کردے ہوئے ہو چکیا اے۔ انجم بٹ جہڑا واپڈا ٹائون دے ای ایچ بلاک وچ ای بلاک تک اک دہائی توں زیادہ مدت تک روزانہ آندے جاندے کدی نہیں تھکیا سی اج ناہید دے گھر توں قبر تک دے درمیانی فاصلے طے کردے کردے اچانک 67 سالہ ریٹائرڈ بڈھے پروفیسر توں چھ‘ ست سال دا بچہ بن کے بلک بلک کے انج رو رہیا اے جیویں اوہنوں پیو کسے ویرانے وچ چھڈ کے آپ کدھرے گھم ہو گیا ہووے۔ جی ہاں اوہو انجم بٹ جہڑا والدین دے داغ مفارقت دے جان تے صبر دا پہاڑ سی اج ناہید دے غم نے اوہنوں ناہید دی قبر دے کول درخت دے تنے دے نال جوڑ کے اک ایسی شاخ بریدہ بنا دتا اے جنہوں برگ ہائے اندوہ ڈھانپے چلے جا رہے نیں۔ ظہیر بدر‘ جنہوں ساڈے نال ناہید دی دوستی نے ملوایا سی اج اوہدے غم وچ ساڈا شریک کار بنیا شام ڈھلے اوہدی قبر دے کول کھڑا عارف تے انجم بٹ نوں سگریٹ پیش کردے ہوئے اوہدی یاداں دھوئیں دے مرغولے بنان اتے اکسار رہیا اے۔ اوہ سگریٹ‘ جہڑا ناہید دی بیماری نے اوہدے کولوں چھڈوا دتے سن ایہناں تناں دے ہتھاں دی انگلیاں وچ دبے سڑدے ہوئے راکھ ہو رہے نیں تے میں اوہناں چاراں دے کھول کھڑا آسودۂ خاک ناہید دی قبر دے کتبے دے نال لگیا غبار شام نوں شب دی تیرگی وچ بدلدا ویکھ کے سوچ رہیا واں کہ ہن واپس چلا جائیے… واپس… ناہید دی قبر نمبر1541 توں اوہدے گھر 216-E/IIتک۔
جتھے بھابھی تے بچے شام دی چاہ تے ساڈا انتظار کر رہے نیں… چاہ… جہڑی ساڈی آمد دی خبر سندے ای بھابی تے دھیاں فوراً کیتلی چلہے اتے چڑھا کے ساڈے کال بیل بجان دی آواز سنن دے انتظار وچ بیٹھ جاندیاں سن تے ناہید دے نال ساڈے ڈرائنگ روم وچ پہنچدے ای داخلی دراوزہ بند ہون تک اندرونی بوہے تے چاہ والی ٹرالی لوازمات نال لدی اندر داخل ہو جاندی سی۔ اج چاہ وی اے‘ پین والے وی… مگر لوازمات بدل چکے نیں۔ بسکٹ‘ کباب‘ نمکو… گلے وچ رندھی ہچکیاں تے اکھاں وچ تیردے ہوئے اشکاں دی شکل اختیار کیتے ۔ گرم گرم چاہ دے گُھٹ حلق نال اتاردے ہوئے ساریاں نوں یاداں دے ایس سمندر وچ اتاردے چلے جا رہے نیں جنہاں توں نکلن نوں کسے دا وی جی نہیں چاہ رہیا مگر فیر ناہید دی سرگوشی سنائی دے جاندی اے… چل مولوی… توں دورجانا ایں… اج میں نئیں تہانوں فیضان گھر چھڈ آئے گا… تے…اسیں بھابی تے دھیاں نوں خداحافظ کہہ کے ناہید دی گڈی ول ودھدے آں… اوہو گڈی جہدے وچ ناہید‘ مینوں تے عارف نوں گھر چھڈ کے انجم بٹ نوں لئے واپڈا ٹائون آندا سج اج مینوں تے عارف نوں گھر اتارن جا رہی سی… میرے نال پچھلی نشست اتے بیٹھیا فیضان‘ مینوں ناہید دی مہکار نال معطر کیتے جا رہیا سی… تے…تے…!