اسحاق ڈار دی رہائش گاہ نوں پناہ گاہ وچ بدلن دے خلاف حکم امتناع جاری

لہور ہائی کورٹ نے سابق وزیر خزانہ اسحاق ڈار دی رہائش گاہ نوں پناہ گاہ وچ بدلن دے خلاف حکم امتناع جاری کر دتا۔

لہور ہائی کورٹ وچ مسلم لیگ (ن) دے سینئر رہنما اسحاق ڈار دی رہائش گاہ نوں پناہ گاہ وچ بدلن دے خلاف درخواست تے سماعت ہوئی، جسٹس شاہد بلال حسن نے اسحاق ڈار دی تبسم ڈار دی عرضی تے سماعت کیتی۔

درخواست گزار ولوں آکھیا گیا اسلام آباد ہائی کورٹ نے رہائش گاہ دی نیلامی دے خلاف حکم امتناعی جاری کر رکھیا اے پر حکومت پنجاب نے گھر نوں غیر قنونی طور تے پناہ گاہ وچ تبدیل کیتا، پنجاب حکومت خلاف آئین تے خلاف قنون اقدام اے، پنجاب حکومت نے ہائی کورٹ دے حکم دی وی خلاف ورزی کیتی اے۔

درخواست گزار آکھیا حکومت لیگی رہنماواں نوں سیاسی انتقام دا نشانہ بنا رہی اے، عدالت حکومت پنجاب دے اقدام نوں کالعدم قرار دیوے۔

بعدوں عدالت نے اسحاق ڈار دے گھر نوں پناہ گاہ وچ تبدیل کرن دے خلاف حکم امتناعی جاری کر دتا تے صوبائی حکومت توں 10دناں وچ جواب طلب کر لیا۔