توں نہ ای کھٹ کھلار

خالدحسین تھتھال

توں نہ ای کھٹ کھلار
بس اپنا آپ سنوار
داج کدے نہ پورا ہوندا
نہ ای ساہورے راضی ہوندے
تیرے ور دی بھال وچ تیرے
پیلے ہتھ کرن نوں ماپے
کاہل وچ ہوندے
لاہون نوں اک بھار
توں نہ ای کھٹ کھلار
بس اپنا آپ سنوار
خوشیاں تے چاء
سوچ فکر دے بھاراں تھلے
دبے رہندے
چیتے دے وچ گنجھل بن کے
اک دوجے تیں وکھ نہ ہوندے
کردے بہت لاچار
توں نہ ای کھٹ کھلار
بس اپنا آپ سنوار
چھڈبکارے لپے لارے
تج دلیل اُلیل دِلے دی
بھُل جا دا ء دلاسے سارے
ایہہ سب سنگل سُوتر ہوندے
جھُرنا بھُرنا دے وسار
توں نہ ای کھٹ کھلار
بس اپنا آپ سنوار
داج سُوجھ سبھا وچ ہوندا اے
ورتن آدر بھا وچ ہوندا اے
ووہٹی دے موہ من وچ ہوندا ا ے
سچے کھرے پن وچ ہوندا اے
سُتھرے بول بچن وچ ہوندا اے
ایہہ ای وست ولیوا بانے
ایہہ ای بیور تریور ہوندے
ایہہ ای ٹِکے داؤنی ٹونباں
ایہہ ای گہنے زیور ہوندے
واگ حیاتی والی پھڑ کے
ہو جا توں سوار
توں نہ ای کھٹ کھلار
بس اپنا آپ سنوار