گورنمنٹ گریجوایٹ کالج سمندری وچ ماں بولی دیہاڑ 2022دے حوالے نال سیمینار دا انعقاد

ساڈے کول صوفی شاعراں دی شکل وچ وڈا سرمایا موجود اے:پروفیسر ذوالفقارحسین

رپورٹ: سید علی قیصر

گورنمنٹ گریجوایٹ کالج سمندری (بوائز)وچ ماں بولی دیہاڑ دے حوالے نال سیمینار دا انعقادکیتا گیا۔ تفصیل دے مطابق گورنمنٹ گریجوایٹ کالج سمندری وچ ماں بولی دیہاڑ دے حوالے نال سیمینار وچ پنجابی ادب دی اہمیت بارے گل بات کردے ہوئے پروفیسر ذوالفقارحسین (صدر شعبہ انگریزی )دا کہنا سی کہ اسیں کسے وی پنجابی کلاسک شاعر نوں دُنیا دے کسے وی وڈے شاعر دے مقابلے اُتے رکھ سکنے آں۔

ساڈے کول صوفی شاعراں دی شکل وچ وڈا سرمایہ موجود اے۔ پروفیسر عبدالرزاق (صدر شعبہ بائیولوجی )دا کہنا سی کہ جدوں تیکر اسیں پنجابی نوں روزی روٹی نال نہیں جوڑاں گے معاملہ حل نہیں ہوئے گا۔ پروفیسر انجم پال صاحب (صدر شعبہ پولیٹیکل سائنس )دا اپنی گل بات وچ کہنا سی کہ پنجابی ساڈی مادری زبان اے، سانوں ایس زبان دی قدر کرنی چاہیدی اے۔نوجوان لیکچرار چاند شکیل ہوراں دا کہنا سی کہ سانوں اپنی بولی نوں اہمیت دینی چاہیدی اے۔ دُنیا دیاں وڈیاں قوماں نے اپنی ہی زبان راہیں ترقی کیتی اے۔پروفیسر افضل ہوراں دا کہنا سی کہ سانوں دوجیاں زباناں دے نال نال اپنی زبان پنجابی نوں وی اہمیت دینی چاہیدی اے۔ سیمینار دے اخیر اُتے پروفیسر عثمان علی بیگ تے نوجوان پڑھیاراں نے اپنا پڑھ کے کلام سُنایا۔