خیالی پلائو

امرجلیل

بنیادی تے بے بنیاد حقوق دیاں گلاں کرن والے اک آفت قسم دے دانشو توں میں پچھیا سر‘ خیالی پلائو پکانا جرم دے زمرے وچ تے نہیں آندا؟ بنیادی حقوق دے منے پرمنے دانشور نے کہیا خیالی پلائو پکانا ہر انسان دا بنیادی حق اے۔ دنیا دا کوئی قنون تہانوں تہاڈے بنیادی حق تو ںمحروم نہیں کر سکدا۔ اوسے رات میری ماں نے خواب وچ آ کے کہیا‘ خیالی پلائو وچ مرچ مصالحے سوچ سمجھ کے پانا۔ خیالی پلائو کھان والیاں نوں مرچ نہیں لگنی چاہیدی۔ ماں دی گل یاد رکھنا پُتر‘ دنیا دا کوئی قنون خیالی پلائو کھان والیاں نو روک ٹوک نہیں سکدا۔ خیالی پلائو دی وضاحت میں بے سود تے بے مطلب سمجھنا واں۔ خیالی پلائو پکان دی خوبی یاں خامی سانوں قدرت ولو ںملدی اے۔ ایہدے لئی تہاڈا شیف یاں باورچی ہونا ضروری نہیں۔ تہاڈا تعلق بھاویں کسے وی عقیدے‘ مسلک تے ملت نال کیوں نہ ہووے تسیں خیالی پلائو پکاندے او۔ سبزیاں کھان والے ویجی ٹیرین خیالی پلائو پکاندے نیں۔ گوشت مچھی کھان والے چکن خیالی پلائو‘ مٹن خیالی پلائو‘ بیف خیالی پلائو پکاندے نیں۔ اوہ لوک مچھی دا خیالی پلائو وی پکالیندے نیں تے اجہے لوک جہڑے خیالی پلائو نال رغبت نہیں رکھدے اوہ لوک نہ ویج خیالی پلائو پکان دے چکر وچ پیندے نیں تے نہ نان ویج خیالی پلائو پکان دے چکر وچ پیندے نیں پر اجہے لوک گنتی دے لوک ہوندے نیں جو کسے قسم دا خیالی پلائو پکاندے ہوئے عمر گزار دیندے نیں۔
جس طرح نت نویں کھانے بنان دے گُر تے ترکیباں اسیں ماہر باورچیاں تے کھانا پکان دیاں کتاباں توں سکھنے آں۔ بالکل اوسے طرح خیالی پلائو پکان دیاں ترکیباں سانوں قصے‘ کہانیاں‘ افسانے‘ ڈرامیاں تے فلماں توں ملدیاں نیں۔ اج دے خیالی پلائو دی ترکیب میں امیتابھ بچن دی فلم شہنشاہ توں کڈھی اے۔ فلم ویکھ کے تسیں دنگ رہ جائو گے۔ ہر لحاظ نال فلم شہنشاہ خیالی پلائو دے موضوع تے بنن والیاں فلماں وچ شہنشاہ فلم اے۔ خیالی پلائو دے موضوع تے بنن والیاں فلماں وچ شہنشاہ توں وڈی فلم میں اج تک نہیں ویکھی۔ اک دن میں فیصلہ کر لیا کہ ملک دا نظام چلان والے محکمیاں تے وساہ نہیں کراں گا۔ سارے محکمیاں نے تے محکمیاں نال جڑے لوکاں نے مینوں دھوکھا دتا سی۔ امن و امان تے انتظامی معاملیاں دا بیڑا غرق ہو چکیا سی۔ محکمیاں وچ رشوت خوری دا خاتمہ کرن لئی میں اینٹی کرپشن ڈیپارٹمنٹ بنایا سی۔ بعد وچ پتہ لگا کہ سب توں ودھ رشوت اینٹی کرپشن ڈیپارٹمنٹ وچ لئی تے دتی جاندی سی۔ سٹریٹ کرائم وچ وادھا ہوندا جا رہیا سی مجرم نہیں سی پھڑے جاندے جے دکھاوے دے طورتے پھڑے جاندے سن تے کوئی بندہ اوہناں دے خلاف گواہی دین لئی اگے نہیں سی آندا ساڈا نظام انصاف نام نہاد چشم دید گواہواں دی ٹیک تے کھڑا سی۔
عورتاں تے بچیاں دے نال پیش آن والے جرائم ودھدے جا رہے سن مجرم سرعام کھلے پھر رہے سن۔ دہشت گرد بھرے بازاراں‘ درس گاہواں تے عبادت گاہواں وچ قتل و غارت کرن دے بعد صاف نکل جاندے سن۔ میں سمجھ سکنا واں تہاڈے چہرے تے معنی خیز مسکراہٹ ویکھ سکنا واں۔ تہانوں میریاں گلاں ماضی دیاں لگ رہیاں ہون گئیاں۔ کیوں جے ہن ساڈے ملک تے معاشرے وچ انج نہیں ہوندا۔ ساڈا معاشرہ امن تے آشتی دا گہوارہ بن چکیا اے لوک راہواں تے چلدے ہوئے یاں تے موبائل فون ویکھ رہے ہوندے نیں یاں فیر چین دی بانسری وجا رہے ہوندے نیں پر ایہ سب کجھ ہویا کیویں؟۔ ایہ سب کجھ ہویا انج‘ جدوں میں ملک وچ انتظامی تے امن و امان دے معاملے اپنے ذمے لے لئے۔ میں بہروپیا بن کے رشوت خوراں نوں رشوت دیندا تے اوہناں نوں رنگے ہتھیں پھڑ لیندا۔ آپ ای میں اوہناں تے مقدمہ چلاندا تے اوہناں نوں سزا دیندا۔ ویکھدے ای ویکھدے رشوت خور‘ رشوت لین توں ڈرن لگے‘ رعب دار افسران دے ماتحت اپنے افسران لئی رشوت لین توں گریز کرن لگے۔ افسراں دے جھڑکن دے باوجود ماتحتاں نے اوہناں لئی رشوت لین تے اپنے آپ نوں جوکھم وچ پان توں انکار کر دتا۔ کڑیل افسراں نے اپنے ماتحتاں نوں نافرمانی دی تہمت لا کے ملازمت توں کڈھنا شروع کر دتا تے براہ راست رشوت لین لگ پئے۔ جدوں دبنگ قسم دے افسراں تے میں ہتھ پایا اودوں اوہناں نے آکڑ کے کہیا سانوں عدالت وچ پیش کرو‘ سارے جج ساڈے بے داغ پیشہ ورانہ ریکارڈ دے معتقد نیں۔ اوہناں نوں چپ کراندے ہوئے میں کہیا میں آپ مجرماں نوں پھڑنا واں جج بن کے اپنی عدالت وچ اوہناں تے مقدمہ چلانا واں‘ تے آپ ای اوہناں نوں سزا دینا واں۔ وڈے وڈے اکڑوں افسراں دے غبارے چوں ہوا نکل گئی۔ رشوت خوری ہن ساڈے ملک چوں قصہ پارینہ بن چکی اے۔ مجال اے کسے دی کہ جائز یاں نجائز کم لئی تہاڈے توں کوئی دمڑی وی منگے۔ ہن ساڈے ملک وچ کسے قسم دا کوئی نجائز کم نہیں ہوندا۔
عورتاں تے بچیاں دے نال بھیانک وارداتاں کرن والیاں دے پچھے میں سائے وانگوں لگا رہندا سی۔ میں اوہناں دے دل و دماغ تے اپنی دھاک بٹھا دتی سی۔ بچیاں تے عورتاں دی زندگی زچ کرن والے مجرم میرے ہتھوں انج غایب ہو جاندے سی جیویں اوہ ماں دے پیٹ چوں پیدا ہو کے ایس دنیا وچ کدی آئے ای نہیں سن۔ ہمیشہ لئی گم ہو جانا سزائے موت توں ودھ بھیانک سزا اے۔ مجرماں نوں میں تہاڈی عدالتاں وچ ایس لئی وی پیش نہیں کردا کہ اوہ باعزت بری کر دتے جاندے نیں میں اوہناں نوں ٹھکانے لا دینا واں۔٭٭