پنجابی فائونڈیشن دی چھتر چھاویںخانپور وچ ماں بولی دیہاڑ دا بھرواں اِکٹھ

رپورٹ: علی بابر بٹ

ماں بولی دیہاڑ تے خانپور وچ پنجابی فائونڈیشن ولوں اک پروقار تقریب منعقد ہوئی جہدے وچ سیاسی تے سماجی شخصیات دے علاوہ مختلف طبقیاں نال تعلق رکھن والیاں نے رلت کیتی۔ تقریب دے مہمان خصوصی سنی تحریک دے صوبائی جنرل سیکرٹری جواد حسن گل سن جد کہ تقریب دی صدارت فیصل ارشاد چودھری نے کیتی۔ تقریب دے میزبان شعیب چودھری نے پروہنیاں نوں جی آیاں نوں آکھیا۔ ایس موقع تے شرکانے حکومت وقت کولوں مطالبہ کیتا کہ پنجاب وچ سرکاری سطح تے پنجابی نافذ کیتی جاوے۔ تقریب وچ لوک فنکار سنی بھائی نے وی بہترین پرفارمنس دا مظاہرہ کیتا تے پنجابی ماہیے ٹپے سنائے۔

ایس موقع تے خطاب کردے ہوئے جواد حسن گل‘ سلیمان نواز تے فیصل ارشاد چودھری نے آکھیا کہ پنجابی زبان 5000 سال توں وی ودھ پرانی اے۔ دوجے صوبیاں وچ شروع دی تعلیم صوبائی زبان وچ دتی جاندی اے لیکن ساڈے بال محروم نیں۔ اوہناں نے آکھیا کہ ساڈے ای ملک وچ کجھ علاقے پنجابیاں لئی نوگو ایریا بنا دتے گئے لیکن ہن پنجابی قوم جاگ گئی اے تے ہر سطح تے اپنے حقوق لئی آواز اچی کراں گے۔ تقریب وچ چوہدری طاہر ، فیصل افضل ، محمد فہد ، عامر شہزاد گجر ، الحاج زاھد گجر ، اکبر جٹ ، وسیم صابری ، عدنان آرائیں ، اصغر تنویر، عمران کلیار ، چوہدری شاہد تے دوجے رلتی سن۔