گیت
سلیم آہنگ
ویکھیں کتے رُس کے پیار ٹرُ جائے نہ
پیار تینوں واجاں مار مار ٹر جائے نہ
بوہتا چر کردا نہیں دل چھیڑ خانیاں
وانگ پرچھاویں ڈھل جاندیاں جوانیاں
عشقے دا چڑھدا خمار ٹُر جائے نہ
آس ڈوری نال پینگاں ٹاہلیاں تے پا لئے
ندی کنڈے پانی اک دوجے تے اُچھالئے
ویلا وج سوچ تے وچار ٹُر جائے نہ
چاواں دے مزار اُتے رون پچھتاوے نہ
پُھلاں جہی جند کتے روگ بن جائے نہ
کتے سُکھ چین تے قرار ٹُر جائے نہ
ویکھیں کتے رُس کے پیار ٹُر جائے نہ
