پنجابی ادبی سنگت کنگن پور دے پربندھ ہیٹھ ماں بولی دیہاڑ دے موقعے اُتے اِکٹھ
21 فروری جگت ماں بولی دیہاڑ دے سلسلے وچ پنجابی ادبی سنگت کنگن پور دے انتظام ہیٹھ بمقام رہائش منیر حسین حیدری اک بھرویں تے پُروقار تقریب ہوئی جس دی نقابت پروفیسر علی بابر نے کیتی۔
تلاوت تے نعت دی سعادت محمد عظیم اصغر نے حاصل کیتی۔ اس تقریب دے پہلے سیشن وچ علی انور احمد، پروفیسر ڈاکٹر عباد نبیل شاد، ارشاد سندھو،. حافظ روح الامین ایڈوکیٹ سپریم کورٹ، مولانا اسحاق خادم قصوری، علامہ عمران حیدری، اللہ دتہ اپدیشک، منیر حسین حیدری، اشرف عابد تے پروفیسر علی بابر نے خطاب کیتا۔ خطاب کرنے والے متراں نے ماں بولی پنجابی دی اہمیت بیان کیتی تے حکومتِ وقت اگے پْرزور مطالبہ کیتا پئی سندھ، خیبر پختونخوا تے بلوچستان طرح صوبہ پنجاب وچ وی پرائمری توں گریجوایشن تک پنجابی زبان نوں لازمی مضمون دی حیثیت نال نصاب وچ چھیتی توں چھیتی شامل کرکے پنجابیاں دا قدیمی مطالبہ پورا کیتا جاوے۔ اس عمل نال وطنِ عزیز پاکستان دا وفاق مزید مضبوط ہووے گا۔علی انور احمد ہوراں آکھیا پئی اپنی ماں بولی وچ تعلیم حاصل کرنا ہر بال دا بنیادی حق اے۔
اس تقریب دے دوجے سیشن وچ پنجابی مشاعرے دا پربندھ کیتا گیا جس وچ اُتے بیان کیتے شاعراں توں اَڈ کاشف علیم، اشفاق کامل، ایم بی شاکر، طلعت رضوی، جہانگیر احمد، اویس صدیق، محمد اسلم شاد، زین جٹ تے نبیل نابر نے اپنا خوبصورت کلام سنا کے خوب داد سمیٹی۔ اس تقریب وچ وڈی گنتری وچ پنجابی پیاریاں نے رلت کیتی۔ تقریب دے آخر وچ پنجابی بالاں نے پلے کارڈز راہیں پنجاب دے سکولاں اندر پنجابی زبان پڑھان دا مطالبہ کیتا۔
