پیپلزپارٹی داعوامی لانگ مارچ شروع! گو سلیکٹڈ گو دے نعرے

کراچی (پنجابی میڈیا گروپ)کراچی وچ پیپلز پارٹی دا عوامی مارچ مزار قائد توں روانہ ہو گیا ،چیئرمین پاکستان پیپلز پارٹی بلاول بھٹو زرداری نے عوامی لانگ مارچ دے آغاز وچ ای گو سلیکٹڈ گو دا نعرہ لا دتا۔اتوارتوں شروع ہون والے عوامی لانگ مارچ دی قیادت کرن لئی پاکستان پیپلز پارٹی دے چیئرمین بلاول بھٹو زرداری کراچی وچ مزارِ قائد اپڑے، جیتھے اوہناں نے رلتیاں نال خطاب وی کیتا۔ اپنے خطاب وچ اوہناں نے آکھیا کہ ساڈھا عوامی مارچ حکومت دے خلاف اعلان جنگ اے، ساڈھا ایہ سفر قائد اعظم دے شہر کراچی توں شروع ہو رہیا اے، اسلام آباد اپڑ کے حکومت اُتے حملہ کراں گے۔ اوہناں نے آکھیا کہ کٹھ پتلی حکومت دے3 ورھے مکمل ہون اُتے کراچی دی عوام احتجاج اُتے مجبور ہو گئی اے، کراچی دی عوام نالائق تے نااہل حکومت توں چھٹکارا چاہندی اے۔اوہناں نے آکھیا کہ کراچی منی پاکستان اے، ہر صوبے تے ہر زبان والے ایتھے وسدے نیں، کٹھ پتلی حکومت دے3 ورھے ہون اُتے کراچی دی عوام احتجاج اُتے مجبور ہو گئی اے، نااہل تے ناجائز وزیرِ اعظم نے کراچی، سندھ، بلوچستان تے خیبر پختون خوا دے حق اُتے ڈاکہ ماریا اے، ایہ ہر صوبے دے حق اُتے ڈاکہ مار رہے نیں ۔ بلاول بھٹو نے آکھیاکہ قائد عوام تے شہید بینظیر دے نامکمل مشن نوں مکمل کرن لئی نکلے نیں، ہرپاکستانی دے حق دا تحفظ کراں گے۔ عمران خان نے معیشت دا بیڑہ غرق کر دتا، کرپشن ختم کرن دا وعدہ کیتا مگر ٹرانسپرنسی انٹرنیشنل دے مطابق عمران خان حکومت کرپشن دے سارے ریکارڈ توڑ چکی اے۔ ایہ پاکستان دی کرپٹ ترین حکومت اے۔