شالا پنجابیاں دی پنجابیت جاگ جاوے !

قسور مبارک بٹ

تاریخی سچائی اے شہید بھٹو نوں اوہناں دے سندھی قوم پرستاں ساتھیاں نے آکھیا سی کہ پاکستان وچ اردو سپیکنگ 2 فیصد نیں جد کہ پنجابی 65 فیصد بولدے نیں تے 90 فیصد پاکستانی اسانی نال پنجابی سمجھ لیندے نیں ایس لئی رابطے دی زبان اردو دی بجائے پنجابی ساہنوں منظور اے تے شہید بھٹو آکھیا سی پہلوں پنجابیاں نوں پچھ لوو ۔ اوس ویلے دے وزیر اعلا پنجاب معراج خالد نوں ایس تجویز بارے پچھیا گیا تے اوس پنجابی آگو نے ہس کے آکھیا چھڈو جی پنجابی بھلا لکھن پڑھن وچ کیویں آوے گی ، اردو ہی رہن دیو، بس فیر سرکاری تعلیمی طور اردو ہی رہ گئی تے پنجابی دیاں جڑاں وڈھن دا کم پنجابیاں ہتھوں شروع ہویا۔
ایہہ وی تاریخی سچائی اے کہ پشتوناں’’ہندکو‘‘ دے ناں تے پنجاب تے پنجابیاں دی وَنڈ کر کے پنجابیاں تے ظلم کیتا بعدوں سندھیاں نے کراچی صوبے توں نظراں ہٹاون لئی بے شناختے بلوچیاں پٹھاناں دھاڑوی مل مارو جاگیرداراں تے پنجابی مخبراں دلالاں نوں نال رَلا کے جنوبی پنجاب وچ سرائیکستان دا فتنہ / توت کھڑا کیتا اے تے زرداری بلاول گیلانی بازاری سرائیکستان نوں پروموٹ کر رہے نیں تے ایس نندن جوگ عمل وچ پی ٹی آئی دا کھلاریا عمرانی شیطانی گند ترینی قریشی وطن فروشاں دے پیو دادے دیاں پنجاب مار مخبریاں سازشاں دا تسلسل وی اپنی تھاہرے پنجابی کارڈ کیش کراون والے نوازی شہبازی قومی ڈاکوآں دے برف فروش چیلے رانامحمودالحسن وَرگے پھٹے والیاں سینٹ وچ جو پنجاب دی پگ نوں داغ لایا تے پنجاب دے جڑے بلاک وچ جیویں سوآ ماریا تے اوتھے ای جماعت اسلامی دے صداقت بلوچ ورگے گندے کردار وی پنجاب توڑن بھنن وچ برابر دے بھائیوال نظر آندے نیں جیہڑے پنجاب وچ پنجابی دی ایس لئی مخالفت کردے نیں کدھرے ایہناں جاچے الہامی زبان اردو دی بے حرمتی نہ ہو جاوے پر ملتان ٹپدے ای الہامی زبان نوں کوئی خطرہ نہیں ہوندا تے ملتانی ریاستی ڈیروی لہجیاں تے سرائیکی دا ٹھپا مڑھ کے جلسیاں تے تربیتی سیشناں وچ سرائیکی کہہ کیلہندی پنجابی وچ بولنا قومی وحدت لئی ضروری آکھ کے روائتی امریکی منافقت دا مظاہرہ کردے نیں ۔
پنجاب 1947 وچ پاکستان لئی 20 لکھ پنجابیاں دے لہو نال ونڈی دیاں لیہاں بھریاں ، پاکستان لئی اپنی بولی ہوند شناخت قربان کیتی تے ضیاء دی یزیدی آمریت وچ پنجابی سپتر اگیچ تے سب توں زیادہ سن تے کئی ماواں دے لال سولیاں جھول گئے اپنے آپ نوں اگاں لا لئیاں جیلاں کوڑیاں دے تمغے سینے سجائے جوانیاں قربان کردتیاں زندگیاں دے سب توں ودھ نذرانے دتے تے چھیکڑ تے فیر پنجاب تے پنجابی دا قتلام ۔ ایہہ گاہلاں تے قتلام جاری اے ۔
ایس پچھوکڑ وچ پنجابیاں دا پاور پالٹیکسیاں دی گولا گیری کرن تے ماتم کرن نوں دل کردا اے ۔
بلاول زرداری کسے طراں بنو عباس وانگ شہیداں دا وارث نہیں اے اسٹیٹس کو قائم رکھن والی زرداری سیاست دا مہرا ھے جو نہ صرف پاکستان دے مظلوم عوام سگوں پنجاب تے پنجابیاں دا دشمن نمبر 1 ھے ۔ عام پنجابیاں نوں تے صدیاں توں افیم دا عادی کیتا ہوئیا اے اکھاں والے باشعور پنجابی وی پنجابیت پروموٹ کرن دی بجائے پاور پالٹیکسئیاں دے مخبر ٹاوٹ دا کردار ادا کر رہے نیں —
الیکڑانک ، پرنٹ میڈیا وی پنجابیت دے قتل وچ برابر دا بھائیوال اے ایہہ تے اللہ سوہنے دا کرم اے کہ سوشل میڈیا تے دنیا بھر دی قدیم تہذیب پنجابی جیں دے وارث بابا فرید گنج شکر توں خواجہ غلام فرید ورگے 13 وڈے کلاسیکل پنجابی صوفی شاعر نیں جیہڑے دنیا بھر وچ کسے قوم کول نہیں ملدے جنہاں ماڑے مسکیناں پنجابی مزدوراں کساناں عام پنجابیاں دی شناخت قائم رکھی ہوئی اے جنہاں دی تعلیمات وجہوں ہند سندھ وچ لوکاں حق دے سدے مطابق جیون سکھیا تے اوسے پنجابی زبان تے پنجاب نوں 1949 دے دھاڑوی فرنگیاں اپنا دشمن قرار دے کے وڈھنا ٹکنا شروع کیتا جیہڑا اوہناں دے نسل در نسل غلام دلال کالے انگریز اج تیک چالو رکھی کھڑے نیں ۔ایس نندن جوگ کار خلاف سوشل میڈئیے نے پنجابی نوجواناں وچ اپنی شناخت دی اہمیت دسی اے تے پنجابی قوم پرستی نہیں قوم پسندی دی جاگرتی لہر پنجابیت نوں تگڑا کر رہی اے ۔ میری عرضوئی اے کہ باشعور سیاسی کارکن تے سوچ فکر والے پنجاب پنجابی تے پنجابیت لئی اپنا اپنا حصہ پاون تولے دے تول وچ تل کے پنجاب دے غدار نہ اکھواون۔
چیتے رکھنا تاریخ سب کجھ سانبھدی اے تے ایس جہانے تے اگلے جہانے ضمیر دے قتل دی سزا وی ھے جے۔
جیوے پنجاب
جیون پنجابی لال