غزل
بابا نجمی
کیوں دھرنا ایں اگے بت عبادت لئی
لازم تے نہیں جثا پیار محبت لئی
ساڑ کے میرے گھر نوں اپنے دکھ نہ لے
لکھاں ہور طریقے یار شکایت لئی
اڈ جانا ایں اک دن پنچھی ساہواں دا
جنیاں مرضی کندھاں چک حفاظت لئی
منزل پیریں اوہناں دے ڈگ پیندی اے
جہناں کدے نہیں ویکھے وقت ریاضت لئی
اکو گھر دے بندے پاڑی جاناں ایں
تینوں کہنے چنیا ایس شرارت لئی
میرا سر تے لتھا وچ ہنیرے دے
کتھوں لے کے آواں لوک شہادت لئی
میرا نت سلام اے بابا اوہناں نوں
لڑدے پئے نیں جہڑے قلم صداقت لئی
