ڈیسک وجان تے تاڑی مارن دا فلسفہ

امرجلیل

تسیں جان دے او کہ پاکستان وچ پنج چھ سو انج دے سرکاری ملازم نیں جو کدی ریٹائر نہیں ہوندے؟ ملازمت وچ آن لئی سوائے گھٹ عمری دے اوہناں لئی عمر دی کوئی حد مقرر نہیں۔ چالھی‘ پنجاہ‘ سٹھ ورھے دی عمر ہون دے باوجود اوہ حیرت انگیز ادارے وچ شامل ہو کے تاعمر ملازمت کر سکدے نیں۔ اوہناں لئی پڑھے لکھے ہون دی وی لوڑ نہیں۔ ملازمت وچ آن دے بعد اوہ اعلیٰ تعلیم یافتہ‘ سی ایس ایس کیتے ہوئے دوجے محکمیاں دے افسراں دی جدوں چاہن چنگی بھلی کھچائی کر سکدے نیں۔ جے چاہن تے کھڑے کھڑے اوہناں دی ٹوپی لاہ سکدے نیں۔ ایہناں پنج چھ سو بے انتہا طاقتور ملازماں دی کارکردگی بارے سالانہ مخفی رپورٹ لکھی نہیں جاندی۔ ایہہ لوک ادارے توں لمے عرصے تک غایب رہن دے باوجود کسے دے اگے جواب دہ نہیں ہوندے۔ مینوں یقین اے کہ ہر اک پاکستانی وانگوں تسیں ایس ادارے تے ادارے دے طاقتور ملازماں توں واقف او۔ میں تہاڈے توں پہیلی بجھن دا نہیں کہہ رہیا۔ میں جاننا واں کہ ایس ادارے تے ادارے دے ملازماں دے بارے تسیں جان دے او سگوں چنگی طرح جان دے او اک فوج نوں چھڈ کے اوہ ہر ادارے تے حاوی ہوندے نیں۔
طاقتور ادارے تے ادارے دے ملازماں دی سردست نشاندہی نہیں کرنا چاہندا۔ تسیں اوہناں دی کارکردگی توں واقف او۔ میرے ورگے کم فہم جاننا چاہندے نیں کہ ایس طاقتور ادارے وچ ملازمت کرن لئی دو بنیادی تے ضروری لوڑاں نوں کیوں نظرانداز کیتا گیا اے؟ جے اسیں کسے سرکاری ادارے وچ ملازمت دے خواہش مند آں تے لازمی طور تے ساڈے توں عمر‘ تعلیمی لیاقت دے بارے پچھیا جاندا اے۔ مجوزہ ہدف توں گھٹ ہون دی صورت وچ ساڈی درخواست رد کر دتی جاندی اے۔ اسیں کلرک دی اسامی لئی درخواست دتی ہوندی اے۔ کلرک بنن لئی واضح طور تے عمر دی حد تے تعلیمی لیاقت مقرر ہوندی اے پر طاقتور ادارے وچ شامل ہون لئی کسے لیاقت دی کوئی حد مقرر نہیں ہوندی۔ سوائے اک حد دے‘ جے تسیں اٹھاراں ورھے دے او تے فیر تسیں ایس قومی ادارے وچ ملازمت نہیں کر سکدے۔ ایہدے الٹ جے تسیں سٹھ ستر ورھے دے او تے فیر تسیں قومی ادارے وچ شامل ہو سکدے او۔ کسے قسم دی کوئی قدغن نہیں۔ بڈھا ہون توں علاوہ تسیں جوڑاں دے درد دے پرانے مریض او۔ چل پھر نہیں سکدے۔ پر قومی ادارے لئی فعال سمجھے جاندے او۔ تسیں ٹھیک نال ویکھ نہیں سکدے۔ تسیں ٹھیک نال سن نہیں سکدے۔ پر قومی ادارے وچ شامل ہو کے تسیں ملک چلا سکدے او۔
مینوں لگ رہیا اے کہ میں آپ پہیلیاں بجھ رہیا واں۔ چلو کھل کے گل کرنے آں۔ اظہار دی آزادی نوں ازمانے آں۔ میں قومی اسمبلی تے چار صوبائی اسمبلیاں دے بارے گل کر رہیا واں جدوں تسیں اسمبلی دے ممبر بن دے او اودوں اوس اسمبلی وچ آن توں پہلاں تہاڈے توں فٹنس یعنی صحت مند ہون دا سرٹیفکیٹ نہیں منگدے پر جدوں تسیں کسے محکمے وچ کلرک لگن جاندے او اودوں تہاڈے توں فٹنس سرٹیفکیٹ منگیا جاندا اے۔ تہاڈی کارکردگی بارے ہر ورھے مخفی رپورٹ لکھی جاندی اے۔ جدوں تسیں کلرکی کردے کردے سٹھ ورھے دے ہو جاندے او اودوں تہانوں ریٹائرکر دتا جاندا اے پر جدوں تسیں اسمبلی جا کے براجمان ہوندے او اودوں تسیں کدی ریٹائر نہیں ہوندے۔ شاہی تخت وانگوں اسمبلی دی سیٹ موروثی املاک وانگوں تہاڈے پُتراں‘ تہاڈے پوتریاں‘ تہاڈے پڑپوتیاں نوں منتقل ہوندی رہندی اے۔ صرف تسیں تے تہاڈی لائق فائق اولاد پاکستان دا نظام چلا سکدی اے۔ تہاڈی ایس سوچ تے شک و شبہ دی گنجائش نہیں۔ ووٹ دین والیاں وچ اینی اہلیت نہیں ہوندی کہ اوہ اپنا ملک سنبھال سکن۔
اسمبلیاں وچ بیٹھن والے ایم این ایز تے ایم پی ایز دا اک ناں یاں اک پچھان ہور وی اے۔ اوہ لوک قنون ساز کہلاندے نیں۔ ایس لئی اسمبلیاں نوں قنون ساز اسمبلی وی کہیا جاندا اے۔ قنون ساز اسمبلیاں وچ ایم این ایز تے ایم پی ایز ملک لئی قاعدے تے قنون بناندے نیں۔ پہلی واری بونگیاں نوں جدوں ایس حقیقت دا پتہ لگا سی اودوں تہاڈے وانگوں اوہ وی حیران تے بعد وچ پریشان ہوئے سن تے اوہناں نے اپنے وال پٹ لئے سن۔ بونگے اک دوجے توں پچھدے پھر رہے سی کہ قنون بنان لئی کیہ تعلیم پڑھا لکھا ہون دی لوڑ نہیں؟ کیہ قنون سازی اینی سوکھی اے؟ اودوں بونگیاں نوں پتہ لگا کہ قنون ساز اسمبلیاں وچ گنتی دے کجھ لوک اجہے وی بیٹھے ہوئے نیں جو بڑے پڑھے لکھے نیں تے قنون دان نیں۔ اوہ کجھ لوک قنون سازی کردے نیں تے باقی لوک ڈیسک وجاندے نیں۔ یاد رہوے کہ قنون ساز اسمبلیاں وچ تاڑی مارن دی اجازت نہیں ہوندی۔ ایہدا اک کارن اے۔ تاڑی دو ہتھ نال وجدی اے جد کہ تسیں ڈیسک اک ہتھ نال وجاندے او تے دوجے ہتھ نال تسیں وی یعنی وکٹری دا اشارا بناندے او۔ ساڑی ماردے ہوئے تسیں ایس قسم دے دو کم اکٹھے نہیں کر سکدے۔ تاڑی مارن تے ڈیسک وجان دا فلسفہ ہن تہاڈی سمجھ وچ آگیا ہووے گا۔٭