نویں پارٹی‘ نواں مشن

طلعت عباس خان

ایس ویلے حالات برے ای نہیں بہت ای برے سمجھے جا رہے نیں کوئی پتہ نہیں کہ مہنگائی بمب کس شکل وچ لوکاں تے کدوں ڈگے گا؟ ہن حکومت تے اتحادی سب اپوزیشن نال رابطیاں وچ نیں۔ دال وچ کجھ تے کالا اے لگدا اے ہن کجھ نہ کجھ ہون والا اے؟ اجہے حالات وچ نویں سیاسی جماعت پاکستان عام آدمی موومنٹ دے ناں توں میدان وچ اتر چکی اے۔ جماعت دے قائد بانی میجر جنرل ریٹائرڈ تے سابق سفارتکار محمدسعد خٹک نیں۔ ایہناں دا تعلق نوشہرہ دے پنڈ گڑھی حکیم خان نال اے۔ اک شام پارٹی دے قائد میرے غریب خانے تے تشریف لیائے۔ اجے گپ شپ کرن ای والے سی کہ ایس دوران بابا کرمو وی تشریف لے آیا۔ دوہاں شخصیات دا تعارف کروایا گیا۔ جنرل صاحب توں پچھیا بابا کرمو نوں وی گپ شپ وچ شامل کیتا جاوے۔ کہیا مینوں کوئی اعتراض نہیں۔ چائے دے نال گپ شپ دا سلسلہ شروع ہویا۔ بابا کرمو نے جنرل صاحب توں پچھیا پنجویں‘ میٹرک تے باقی تعلیم کتھوں حاصل کیتی؟ کہیا پنجویں تک اپنے پنڈ گڑھی حکیم خان دے سکول وچ پڑھیا۔ سکول وچ ٹاٹ وی نہیں سن بلڈنگ نہیں سی ‘کدی حجرے تے کدی رُکھ دی چھاں تھلے بہہ کے پڑھیا۔ گورنمنٹ ہائی سکول پپی وچ میٹرک تک پڑھیا سکول پنڈ توں چھ کلومیٹر دور سی کدی سائیکل‘ کدی ٹانگے تے کدی پیدل جانا پیندا۔ والد محترم نے 1958ء وچ گریجویشن کیتی سی ایس لئی سانوں وی پڑھن تے زور دیندے رہندے۔ میٹرک دے بعد ایڈورڈ کالج پشاور توں ایف اے کیتا۔ کالج جان لئی سائیکل توں سفر شروع کردا‘ کسے جانن والے دے ہاں سائیکل کھڑی کردا تے بس وچ بہہ کے کالج اپڑدا۔ روز پنجاہ کلومیٹر دا سفر آن جان وچ طے ہوندا۔ ایف اے دے بعد آرمی وچ کمشن مل گیا۔
10مئی 1979ء وچ پی ایم اے دی ٹریننگ مکمل کیتی۔ 37 سال تک آرمی وچ رہیا۔ 2016ء نوں آرمی توں بطور میجر جنرل ریٹائرڈ ہویا۔ کجھ عرصہ سری لنکا وچ سفارتکار وی رہیا۔ ایس دوران اپنے پنڈ وچ خوشحال خٹک ٹرسٹ بنایا۔ آئی فری کیمپ لانے شروع کیتے۔ کیمپ توں 45 ورھیاں توں اکھاں دی بینائی توں محروم اک بندے نوں ویکھنا نصیب ہویا۔ ایس کم نے وی مینوں نیشنل لیول تے عوامی خدمت کرن دا جذبہ پیدا کیتا ایس طرح میں نویں سیاسی جماعت دی بنیاد رکھی۔ والد محترم اللہ نو ںپیارے ہو چکے نیں والدہ محترمہ حیات نیں۔ اللہ دی ذات تے ماں دیاں دعاواں میرے نال نیں۔ سیاست عبادت اے‘ میرا ایہدے تے مکمل یقین اے پر ایس ویلے سیاست نوں عبادت سمجھ کے لوک کر نہیں رہے۔ ریٹائرڈ ہون دے بعد سوچ لیا سی کہ کسے کول ملازمت نہیں کرنی۔ عوامی خدمت کرنی اے۔ بابا کرمو نے کہیا تہاڈے توں پہلاں وی کئی جنرل تے ججز سیاسی پارٹیاں بنا چکے نیں۔ رزلٹ ساریاں دا صفر رہیا۔ خٹک صاحب نے مسکراندے ہوئے کہیا اوہناں دا رزلٹ صفر ایس لئی رہیا کہ ایہناں ساریاں نے ڈرائنگ روم دی سیاست کیتی۔ بابا کرمو نے پچھیا تسیں عام بندے کہنوں کہندے تے سمجھدے او۔ کہیا ہر اوہ قابل اہل تجربہ کار تے محب وطن شہری اے جو اپنی صلاحیت دے سر تے اگے آ چکیا ہووے یاں اگے آن دی جدوجہد وچ لگا ہویا اے۔ ایہدے وچ سارے نوجوان شامل نیں۔ اسیں عام بندے نوں بلانا تے اوہنوں باہر لے کے آنا اے۔ میری یوتھ اگے گزارش اے کہ اوہناں دے نرغے وچ نہ آن کہ سیاست کرنا تہاڈے وس وچ نہیں‘ سیاست چنگا عمل نہیں۔ ایہ اشرافیہ دا کم اے سیاست پیسے دا کھیڈ اے۔ ایہ ساریاں گلاں ایس لئی پھیلائیاں گئیاں نیں کہ صاف ستھرے لوک سیاست توں دور رہن۔ میری گزارش ا ے کہ عام بندے نوں ایسیاں گلاں وچ نہیں آنا چاہیدا سیاست وچ آ کے لوکاں دی خدمت کرو‘ مایوسی چوں نکلو تے ایواناں وچ آئو۔ سیاست وچ اپنا کردار ادا کرو۔
جنرل صاحب توں پچھیا دو تن وڈیاں سیاسی پارٹیاں موجود نیں کسے اک نوں تسیں جائن کیوں نہیں کیتا؟ مسکراندے ہوئے کہیا ایہو جماعتاں اقتدار وچ وی رہیاں نیں پر لوکا ںدے حالات نہیں بدل سکے۔ ایہدی وجہ ایہہ وے کہ ایہ سیاسی جماعتاں گھر دے بندیاں دے دوالے گھمدیاں نیں۔ ایہناں نوں اپنے توں علاوہ کوئی دوجا اگے لیان لئی وکھائی نہیں دیندا۔ اوہناں دی اپنی جماعتاں وچ جمہوریت نہیں میرٹ نہیں۔ جے ایہناں وچوں کسے سیاسی جماعت نوں جائن کرنا ہوندا تے میں ایم این اے یاں سینیٹر منسٹر بن جاندا تے ایہدے توں بہتر سی کہ اک ریٹائرڈ جنرل دے طور تے حیاتی گزاردا۔ کئی تھاواں تے جدوں وی جانا واں تے اوتھے ایم این اے تے سینیٹر میرے سواگت وچ کھڑے ہوندے نیں۔ میرا مقصد ایس ملک دا ایم این اے یاں سینیٹر بننا نہیں۔ میں سیاست دے راہیں ایس ملک دی خدمت کرن آیا واں۔ میں سیاسی پارٹی ایس لئی بنائی اے کہ قابل‘ اہل تے پڑھے لکھے لوک ایس ملک دی باگ ڈور سنبھالن۔ دسیا قدرت نے میرے اندر قوت دے رکھی اے جو میرے توں فیصلے کراندی اے۔ اپنے ناں نوں بدلن دا دلچسپ واقعہ سنایا کہیا: میرا پیدائشی ناں خسرو پرویز خٹک اے جدوں مینوں احساس ہویا کہ خسرو پرویز اوہ سی جنہے حضور کریمؐ ہورا ںدی اسلام دی دعوت قبول نہیں سی کیتی فیر اوہ اپنے پُتر دے ہتھوں قتل ہویا۔ ایہ جانن دے بعد میں اپنا ناں بدلن دا فیصلہ کیتا ایہ مشکل سی اللہ دی مدد شامل حال رہی تے جدوں 1996ء وچ میجر سی تے اپنا ناں بدلن وچ کامیاب ہویا۔ میں سمجھنا واں جدوں تہاڈے ارادے نیک ہون تے قدرت ساتھ دیندی اے ایہدے بعد میں نویں ناں محمد سعد خٹک توں جانیا تے پچھانیا جان لگ پیا۔ مینوں اوس ذات تے کامل یقین اے جنہے مینوں اپنا ناں بدلن وچ کامیابی دتی اوہو ذات مینوں ایس نویں سیاسی جماعت دے چلان وچ وی مدد دیوے گی۔
میں جھوٹ کے سورج سے نہیں لایا ہوں کرنیں
میں نور صداقت کے لئے خود ہی جلا ہوں