حافظ سعید نوں ات گردی دے مقدمیاں وچ 11ورھے قید
لہور: انسداد ات گردی عدالت نے امیر جماعت الدعوۃ حافظ سعید نوں ات گردی دے مقدمے وچ 11ورھے قید تے 30ہزار روپے جرمانے دی سزا سنا دتی۔
لہور وچ انسداد ات گردی دی خصوصی عدالت دے جج ارشد حسین بھٹہ نے امیر جماعت الدعوۃ حافظ سعید دے خلاف دو کیساں وچ محفوظ فیصلہ سنا دتا۔
عدالت نے حافظ سعید سنے دو ملزماں نوں دو مقدمیاں وچ ٹرائل پورا ہون تے ساڈھے پنج پنج ورھے قید تے 15,15ہزار روپے جرمانے دی سزا دا حکم دے دتا۔
عدالت نے مجموعی طور تے حافظ سعید نوں 11ورھے قید تے 30ہزار روپے جرمانے دی سزا سنائی۔ پلس نے ملزماں نوں سخت سکیورٹی وچ عدالت وچ پیش کیتا جتھے اوہناں دی موجودگی وچ اوہناں نوں سزا سنائی گئی۔
حافظ سعید دے خلاف محکمہ انسداد ات گردی (سی ٹی ڈی) نے غیر قنونی فنڈنگ دے الزام وچ مقدمہ درج کر رکھیا سی۔ دوواں کیساں وچ حافظ سعید دے خلاف 23گواہواں نے بیانات قلمبند کرائے۔
