اپوزیشن نال پینگاں ودھان والیاں دی رپورٹ وزیراعظم نوں گھل دتی گئی

اسلام آباد (پنجابی میڈیا گروپ) اپوزیشن نال پینگاں ودھان والے مرد تے عورتاں ایم این اے دی رپورٹ وزیراعظم نوں گھل دتی گئی۔ میڈیا رپورٹ دے مطابق وزیراعظم دی زیر صدارت تحریک انصاف دی سیاسی کمیٹی دا اجلاس ہویا، جس وچ اپوزیشن ولوں حکومت دے خلاف تحریک عدم اعتماد دے حوالے نال وزیراعظم عمران خان نوں اہم تفصیل پیش کردتی گئی اے ، رپورٹ وچ قومی اسمبلی دے سارے ارکان خصوصاً پی ٹی آئی ممبراں دے حوالے نال مفصل تفصیلات پیش کیتی گئی اے ۔ ذرائع دے مطابق وزیراعظم نوں پیش کیتی گئی رپورٹ وچ تحریک انصاف دے اک درجن دے نیڑے ارکان قومی اسمبلی دی اپوزیشن نال جھکاؤ تے معاملات طے کرن دی تفصیل وی شامل اے تے دسیا گیا اے کہ جناں حکومتی ارکاناںاپوزیشن نال پینگاں ودھایاں اوہناں وچ مرداں دے نال نال عورتاں ایم این اے وی شامل نیں ۔ رپورٹ وچ دسیا گیا اے کہ اوہناں وچوں کجھ ایسے ممبر اسمبلی اپوزیشن نال مل گئے نیں جیہڑے پہلی وار ایوان وچ آئے نیں۔