نعت شریف
نائلہ بٹ
سونے نالوں کھریاں نے نبی دیاں گلاں
سچے موتی جڑیاں نے نبی دیاں گلاں
سانوں چھڈ غیراں کولوں پچھ لے جا کے
حکمت نال بھریاں نے نبی دیاں گلاں
دنیا تے دین نوں سجاون پئیاں ویکھو
پھلاں دیاں لڑیاں نے نبی دیاں گلاں
رب جی نوں لبھنے تے نالے کھوج واسطے
فقیراں آکے پھڑیاں نبی دیاں گلاں
سینے تے سجا کے رکھاں نالے گل لا کے
تعویذ وانگوں مڑھیاں نے نبی دیاں گلاں
عالماں، محدثاں نے عزتاں کما لئیاں
منبراں تے چڑھیاں نے نبی دیاں گلاں
آپ سکھ لواں نالے جگ نوں سناواں
قیمتی اے بڑیاں نے نبی دیاں گلاں
