عوام میرے نال کھڑی اے ایس سازش دا مقابلہ کراں گا ،وزیراعظم

اسلام آباد( پنجابی میڈیا گروپ) وزیر اعظم عمران خان نے پی ٹی آئی دے نراض نور عالم سنے25ایم این اے سندھ ہائوس اسلام آباد وچ موجود ہون دے حوالے نال آکھیا اے کہ عوام میرے نال کھڑی اے تے ایس سازش دا مقابلہ کراں گا ۔اوہناں آکھیا کہ میں کسی صورت ایس لئی ویچی دے ساہمنے نہیں جُھکاں گا ۔ خیال اے کہ وزیر اعظم عمران خان دا بیان اوس ویلے ساہمنے آیا اے جد متحدہ اپوزیشن پاکستان ڈیموکریٹک مومنٹ (پی ڈی ایم)وزیر اعظم دے خلاف عدم اعتماد دی تحریک لیاچکی تے نال ہی اسلام آباد لئی لانگ مارچ دا اعلان کرچکی اے۔ سیاسی منظر نامے اُتے تازہ ترین پیش رفت دے مطابق حکمران جماعت تحریک انصاف دے نور عالم سنے25 ایم این اے سندھ ہائوس اسلام آباد وچ کھل کے عوام دے ساہمنے آگئے۔ اسلام آباد وچ وزیر اعظم ہائوس وچ اسپیکر قومی اسمبلی اسد قیصر نال ملاقات وچ رونما ہون والی سیاسی صورتحال اُتے تبادلہ خیال کیتا اے جس وچ پی ٹی آئی دے منحرف ارکان پارلیمنٹ دے خلاف قنونی تے آئینی کارروائی دا فیصلہ کیتا گیا۔ ایس حوالے نال دسیا کہ قنونی ٹیم نوں منحرف ارکاناں دے خلاف کارروائی دی ہدایت کردتی گئی اے جدکہ وزیراعظم ولوں اسپیکر قومی اسمبلی نوں کارروائی لئی باقاعدہ خط لکھیا جائے گا۔