ن لیگ دا ٹکٹ تے کرپٹو کرنسی!
حناپرویزبٹ
آزاد مورخ لکھ رہیا اے کہ تریخ انسانی وچ اک اجہی دہائی وی آئی جہدے وچ اک امریکی تے دو ایشیائی سنے تن سیاستداناں نوں مقبولیت دے جعلی پائیداناں تے بٹھایا گیا ایجنڈا مقرر کرکے اقتدار دی شیرینی پلیٹ وچ رکھ کے اوہناں نوں پیش کیتی گئی اوہناں دے دور وچ چرب زبانی فن عظیم ٹھہری۔ سرعام سرکاری طور تے جھوٹ بولن تے اعزاز ونڈے جاندے رہے۔ اظہار منافقت تے اضافی پوائنٹس دیاں ریوڑیاں وی ونڈیاں گئیاں‘ کار ریاکاری تے دستار فضیلت پہنانا چلن بنا دتا گیا باقاعدہ پیادے مقرر کر کے جو 24 گھنٹے اقدام دھوکہ دہی تے خراج تحسین دے ڈونگرے برساندے رہے۔
سہولتاں تے انتظامی کنٹرول دے باوجود ایہناں تناں جعل سازاں نے اپنیاں پالیسیاں پاروں اپنے آپ نوں بدنامی دے بھنور وچ پھسا گیا پہلے نوں اقتدار توں بے دخلی دا سرٹیفکیٹ تھمایا یا تے اوہ نشئی رچھ وانگوں وگڑ گیا تے دنیا بھر دے سامنے ملکی تکریم دا دھڑن تختہ کر دتا۔ دوجے دی سیاست دے بخیے عام عوام پارٹی نے کجھ ایس طرح نال ادھیڑ دتے نیں کہ اوہناں نوں مرمت کرنا ناممکنات وچ شامل اے۔ تریجے دے حالات وی دوہاں توں کوئی وکھرے نہیں ایہدی فانی ظاہری خوبصورتی نوں فریب تے سراب دی حد تک گلیمرائز کیتا گیا۔ مسلط کرن توں پہلاں اک اجیہا نائیک بنا کے پیش کیتا گیا جہنوں بیک وقت معاشی‘ معاشرتی‘ سیاسی تے بین الاقوامی معاملیاں وچ بیک وقت مہارت حاصل ہووے پر جیویں جیویں امتحان ہوندے گئے اوہ فیل ہوندا گیا۔
اپنی پاٹ دار آواز تے انتہا درجے دی مصنوعی اداکاری دے جوہر وکھائے اوہدے حواری وی اوہدی ای قسم دے مکالمے ادا کر رہے نیں اوہنوں اپنی چرب زبانی تے خوب ملکہ حاصل ہون دا ایناں زعم اے کہ خدا دی پناہ‘ کدی وی کدھرے وی کوئی وی اوہدے زبانی حملیاں توں محفوظ نہیں رہیا ایہ تے سچ اے کہ لفظاں دے دند نہیں ہوندے پر اوہ کٹدے نیں‘ کدی تے ایناں زخمی کر دیندے نیں کہ رشتیاں ناطیاں دی بحالی ناممکن ہو جاندی اے۔ اک گل اوہدی بالکل ٹھیک اے کہ اوہ تبدیلی لیایا اے واقعی اوہنے خوشحالی نوں بدحالی‘ ترقی نوں پسماندگی‘ عروج نوں زوال‘ بہتری نوں کمتری‘ اچھائی نوں برائی‘ آسانی نوں مشکل تے بہار نوں خزاں وچ بدل دتا اے ایتھوں تک کہ لوکاں دیاں چھوٹیاں چھوٹیاں خوشیاں نوں وی غم وچ بدل دتا اے۔
ایجنڈے دے تحت اوہ ملک نوں دیوالیہ کرکے دند کڈھ کے دہراندا رہیا موگیمبو خوش ہوا جس طرح امریش پوری دے بناں بھارتی فلم مسٹر انڈیا مکمل نہیں ہوندی کجھ اوسے طرح ایس بندے دے بناں دیوالیہ ملک دا تصور مکمل نہیں ہو سکدا۔ اقتصادی میدان وچ صفر بٹا صفر کارکردگی تے اینی ہٹ دھرمی دا مظاہرہ شاید ای تریخ وچ کسے نے کیتا ہووے۔ پہلے دن توں اج تک اوہ حالت انتشار وچ اے کدی مخالفین نوں جیل وچ سٹ کے آوازے کسدا رہیا کدی دوجیاں نوں دھمکاندا رہیا ہر نکامی دی ذمہ داری دوجیاں تے پانا اوہدا خاصا ثابت ہویا۔
دوران اداکاری کدی اوہ رواداری توں محروم پریم چوپڑا بن جاندا اے تے کدی محسن کش جبلت نال بھرے گلشن گروور دا لبادہ اوڑھدا رہیا۔ نائیک دے لباس وچ اوہنے لٹ مار دے اوہ ریکارڈ قائم کیتے نیں جو کدی ٹٹ نہیں سکن گے ہن تے مکمل طور تے کھل نائیک ثابت ہو چکیا اے اوہنے جیندے جی کروڑاں نوں موت دے حوالے کر دتا اے تے فیر وی بضد اے کہ نجات دہندہ اوہو ای اے۔ اپنا انجام سامنے ویکھ کے وی اوہ ہار منن نوں تیار نہیں ہن اوہ شعلے دا گبھرسنگھ بن کے پچھدا رہیا اے کتنے آدمی تھے؟ جس جماعت دی سیاست ختم کرن دی قسم کھادی گئی سی اج اوسے ن لیگ دا ٹکٹ کرپٹو کرنسی جناں قیمتی ہو چکیا اے سیاست دے بادشاہ دا تاج اک واری میاں نوازشریف دے سر سجن نوں اے تے موسمی بٹیریاں دا خوفناک انجام نیڑے آ گیا اے۔٭٭
