چشم بدور

طلعت عباس خان

چیف جسٹس اسلام آباد ہائیکورٹ جسٹس اطہر من اللہ دے فیصلیاں توں لوکاں وچ خوشی دی لہر ویکھی جا سکدی اے۔ متاثرین خوش نیں اوہناں نوں بے گناہ پھڑیا نہیں جاوے گا۔ موجودہ فیصلیاں پاروں چیف جسٹس اسلام آباد ہائیکورٹ سب دے پسندیدہ جج کہلائے جان لگ پئے نیں۔ اوہناں دے فیصلیاں نال لوئر جوڈیشری نوں وی حوصلہ ملیا۔ مثالی فیصلے ہمیشہ یاد رہندے تے تریخ دا حصہ بن جاندے نیں ۔ اجہے فیصلیاں نوں عوامی پذیرائی ملدی اے‘ حوصلہ ملدا اے۔ حال ای وچ ایڈیشنل ڈسٹرکٹ جج اسلام آباد نے محسن بیگ کیس وچ قنون دے مطابق ایکشن لیا تے فیصلہ لکھیا اوہدی بازگشت دور دور تک سنائی دے رہی اے۔ جنگ دے دوران چرچل نے آکھیا سی کہ عدالتاں کم کر رہیاں نیں تے فیر کوئی فکر دی گل نہیں۔ ایس لئی کہیا سی کہ ملک دا سب تو ںاہم ادارہ عدلیہ دا کہلاندا اے۔ عدلیہ دے انصاف تے مبنی لکھے گئے فیصلے بے بس مظلوماں لئی امید دی کرن نیں جتھے عدالتاں قنون تے انصاف دے مطابق فیصلے دیندیاں نیں اوتھے ہر شہری سکھ دا ساہ لیندا اے۔ چیف جسٹس اطہر من اللہ نے اسلام آباد دے چڑیا گھر وچ ہون والے ظلماں تے جس طرح فیصلے لکھے اوہ اج وی یاد نیں۔ چڑیا گھر دے جانور خاص کر ہاتھی جہنوں عدالتی حکم توں آزادی نصیب ہوئی تے سارے جانوراں دی حالت بہتر ہوئی۔ حکومت نوں اجہے ججاں دی حوصلہ افزائی کرنی چاہیدی اے۔
اکثر ویکھیا گیا اے کہ ایس طرح دے ججاں نوں اوکڑاں دا سامنا کرنا پیندا اے ایس طرح دے رویاں دی وجہ نال ساڈے ملک دا نظام انصاف عالمی درجہ بندی وچ 126ویں نمبر تے اپڑ چکیا اے۔ لوک وی ایس نظام توں خوش نہیں۔ متبادل راہواں ول چل پئے نیں۔ قنون نوں اپنے وچ ہتھ وچ لے آپ فیصلے کر رہے نیں۔ کجھ دیہاڑ پہلاں دی اطلاع اے کہ اک بینک وچ ڈاکو لٹ مار وچ مصروف سن اچانک اوہناں دا اک ساتھی بینک وچ پریشانی دے عالم وچ وڑیا۔ بولیا ایس ملک وچ عجیب انھی پئی ہوئی اے میں باہر کار وچ بیٹھا انتظار کر رہیا سی کہ گن پوائنٹ تے میرے توں کار تے موبائل کھوہ لیا گیا اے۔ ڈاکو دا کہنا سی ایتھے کوئی وی محفوظ نہیں۔ دھرتی ہووے گی ماں ورگی پتہ سی ماں سوتیلی وی ہو سکدی اے۔ جو اپنے باپ توں ای اپنے بچیاں تے تشدد کرایا کرے گی۔ اک ٹاک شو وچ ٹی وی اینکر دے سوال دے جواب وچ مختصر جواب وچ ریحام خان دی کتاب دا حوالا دتا گیا اوہدے بعد جو کجھ ہویا سارے جان دے نیں۔ بناں ایف آئی آر سرکاری ادارے دے اہلکار گرفتاری لئی اپڑ جاندے نیں۔ چیف جسٹس صاحب انج کرن والیاں دے خلاف ایکشن لین۔
کجھ مہینے پہلاں پی ٹی آئی دی ممبر نیشنل اسمبلی نے اپنے گوانڈھ وچ رہندے میاں بیوی نوں نہ صرف ماریا سگوں اوہناں دے خلاف ایف آئی اے وچ مقدمہ وی درج کرایا۔ ایس مقدمے وچ وی چیف جسٹس صاحب نے ایف آئی اے نوں انج کرن توں منع کیتا جہدے نال متاثرین نے سکھ دا ساہ لیا۔ ہن ایہ دوجا کیس سامنے آیا اے۔ ایف آئی اے نے عدالت نوں پہلے ای لکھ دتا سی کہ اسیں ایس او پی دا خیال رکھاں گے پر ایہ خیال نہیں رکھدے جہدے تے چیف صاحب نے ایف آئی اے ڈائریکٹر نوں شوکاز ایشو کر رکھیا اے۔ چیف صاحب نے کہیا سی کہ ایف آئی اے نوں روگ ایجنسی نہیں بنن دیاں گے۔ کہیا سب توں وڈی غلطی آئین دا احترام نہ کرنا اے۔ چیف صاحب دی ہدایت تے نویں پالیسی اسلام آباد ہائیکورٹ نے جاری کیتی اے۔ زیرالتوا کیساں دی سماعت مقرر کردے ہوئے کہیا کہ کوئی کیس بناں کسے کاروائی دے ملتوی نہیں کیتا جاوے گا۔ ایس پالیسی دے تحت 1999-2010ء دے کیساں نوں قدیم ترین کیس شمار کیتا جاوے گا۔ ہفتہ وار بنیاد تے اوہناں دی سماعت ہووے گی۔ ایہ مقدمے دو مہینے دی مدت وچ نبیڑے جان گے۔ سیکشن اے 22 تے دائر دوجیاں درخاستاں دی ہفتہ وار بنیاد تے سماعت ہووے گی۔ ترجیح مقدمیاں وچ فیملی‘ کرایہ داری تے باقاعدہ پہلی اپیلاں بارے معاملات نوں دتی جاوے گی۔ سزا دے خلاف ہر اپیل تے نظرثانی دا فیصلہ 90 دیہاڑیاں و چ نبیڑیا جاوے گا۔ دیرآید درست آید‘ ایس لئی لکھیا اے کہ اللہ چیف جسٹس صاحب نوں چشم بد توں بچاوے۔ جے سارے ادارے اپنے آئین تے قنون دے تحت کم کرن گے تے مقدمیاں وچ کمی ویکھن وچ آوے گی۔ جس طرح اسلام آباد ہائیکورٹ دے چیف جسٹس صاحب ایہناں اداریاں تے گہری نظر رکھے ہوئے نیں ایہدے نال عام شہری سکھ دا ساہ لیندا تے دعاواں دیندا اے۔ اسیں وی عجیب آں حکم تے سانوں اپنی خواہشات نوں مار دین دا سی پر اسیں اپنا ضمیر مار دینے آں۔ ضمیر دے مارے جان نال کرپشن وچ وادھا ہویا‘ مقدمیاں دی بھرمار ہوئی۔ بزرگ کہندے نیں عبادتاں ضرور کرو پر دنیاوی معاملیاں تے وی دھیان دیا کرو۔ حقوق اللہ دے نال حقوق العباد دا خیال رکھن نال حالات بہتر ہو سکدے نیں۔ گزارش اے کہ اپنی آزادی دے نال دوجیاں دی آزادی دا وی خیال رکھیا کرو۔ حفیظ جالندھری یاد آ گئے:
کرو مہربانی تم اہل زمین پر
خدا مہربان ہو گا عرش بریں پر