منی بجٹ نہیں آوے گا، پاکستان تے آئی ایم ایف وچکار مذاکرات وچ اتفاق

اسلام آباد:پاکستان تے بین الاقوامی مالیاتی فنڈ (آئی ایم ایف) دے وفد وچکار مذاکرات وچ منی بجٹ نہ لیان تے اتفاق کر لیا گیا اے۔

وسیلیاں دے مطابق مذاکرات وچ اتفاق کیتا گیا اے ایس ورھے جون تک ٹیکساں وچ وادھا تے ٹیکس ہدف وچ کمی نہیں ہووے گی۔

وزارت خزانہ دے ذرائع دا کہنا اے پاکستان ولوں ٹیکس ہدف دے حصول لئی بھرپور کوششاں ہون گیاں۔ آمدن ودھان لئی نان ٹیکس آمدن ودھائی جاوے گی۔

ایہدے علاوہ نجکاری دے روڈ میپ تے عملدرآمد یقینی بنایا جاوے گا جد کہ نان ٹیکس آمدن وچ 400ارب روپے وادھا کیتا جاوے گا۔

آئی ایم ایف دے نال مذاکرات وچ اتفاق کیتا گیا کہ سیلز ٹیکس دا ریٹ 18فیصد نہیں ہووے گا، ایہدی شرح 17فیصد تے ای برقرار رہوے گی۔

ذرائع وزارت خزانہ دے مطابق پاکستان نے آئی ایم ایف دے کئی اہداف حاصل کردیاں خسارے تے نقصانات وچ کمی دا روڈ میپ تیار کر لیا اے۔

آئی ایم ایف مالیاتی تے کرنٹ اکاؤنٹ خسارے تے مطمئن اے۔

دوواں فریقین 10روزہ مذاکرات دا وکھرا وکھرا اعلامیہ جاری کرن گے۔