باغاں دے شہر لہور وچ میلہ جشن بہاراں

تحریر: عامر رفیق بٹ

پاکستان دنیا دا اوہ ملک اے جہنوں قدرت نے دلفریب موسماں نال نوازیا اے۔ کدی موسم سرما اے تے کدی گرما‘ کدی خزاں اے تے کدی بہار۔ سردیاں دی لمی اداس خموشی مگروں بہار دا خوبصورت تے دلفریب موسم پوری فضا نوں بے شمار پھلاں دی خشبو دے رنگاں نال معطر تے رنگین کر دیندا اے۔ وڈی وڈی شاہراواں دے آسے پاسے کھلے پھلاں دے تختے‘ دھواں تے ٹریفک دے اژدہام وچ وی ذہن تے دل نوں تروتازی دیندے نیں۔ بہاردا موسم اللہ ولوں دتا گیا اوہ موسم اے جہدی اہمیت توں انکار نہیں کیتا جا سکدا۔ ایہہ موسم اپنے نال مختلف رنگ لے کے آندا اے۔ جہدی خوبصورتی توں ہر انسان اپنے ذوق دے مطابق لطف اندوز ہوندا اے۔ موسم بہار دی آمدتے زنانیاں دے شوق قابل دید ہوندے نیں۔زنانیاں رنگ برنگے تے اکھاں نوں چنگے تے بھلے ویکھن والے لباس زیب تن کردیاں نیں۔ بچے‘ نوجوان‘ مرد‘ زنانیاں تے بڈھے ہر عمر دا بندا اپنے ذوق دے مطابق موسم بہار توں لطف اندوز ہوندا اے۔ بہار دا موسم مارچ تے اپریل تک رہندا اے۔ دنیا بھر وچ موسم بہار نوں بہت چنگے انداز نال خوش آمدید آکھیا جاندا اے۔ 20مارچ نوں بہار دی آمد تے بے شمار ملکاں وچ جشن نو روز منایا جاندا اے جہدے توں مراد بہار دا استقبال کرن دا دن اے۔ موسم بہار ترقی خوشی‘ خوشحالی‘ امن و سکون تے آزادی دی علامت اے۔ بہار دا موسم مارچ تے اپریل تک رہندا اے۔ دنیا بھر وچ موسم بہار نوں بہت چنگے انداز نال خوش آمدید آکھیا جاندا اے۔ 20مارچ نوں بہار دی آمد تے بے شمار ملکاں وچ جشن نو روز منایاجاندا اے۔جہدے توں مراد بہار دا استقبال کرن دا دن اے۔ ہندو مذہب دا مشہور تہوار ہولی وی بہار دے موسم دے آغاز وچ منایا جاندا اے۔ ایس دن لوک چٹا لباس پا کے اک دوجے اتے رنگ سٹ کے محظوظ ہوندے نیں۔ جاپان وچ بہار دا استقبال چیری بلاسم فیسٹیول توں کیتا جاندا اے۔ جاپان دے نال نال امریکہ وچ وی چیری بلوسم فیسٹیول منایا جاندا اے۔ تھائی لینڈ وچ لوک اک دوجے اتے پانی سٹ کے موسم بہار نوں مناندے نیں تے جی آیاں نوں آکھدے نیں تے ایہدے لئی واٹر فیسٹیول نوں منعقد کیتا جاندا اے۔ بہار دے موسم وچ ہر پاسے چرند پرند ہر جاندار خوش و خرم نظر آندا اے۔ بہار دے موسم نوں سارے موسماں دا بادشاہ آکھیا جاندا اے۔ موسم بہار زندگی دی جولانیاں لئی اک انمول رت اے۔ ایس موسم وچ صرف فطرت ای فیشن نہیں کردی‘انساناں دے دل وی فیشن دا تقاضا کردے نیں۔ ایہہ موسم مختلف برانڈ زدے تحت پیراہن تیار کرن والیاں نوں نویں پیشکشاں دی تیاری اتے اکساندا اے۔ بازار وچ اینی قسماں آندیاں نیں کہ زنانیاں لئی انتخاب کرنا اوکھا ہو جاندا اے۔ کپڑے تیار کرن والے بہار دے پھلاں دے سارے رنگ سوتی تے لان دے کپڑیاں اتے لے آندے نیں۔ انج اوہناں نوں زیب تن کرن والیاں موسم دے تقاضے اتے پورا اتردیاں نیں تے ہر اوس جگہ اتے بہار دا سندیسہ لے کے جاندیاں نیںجتھے پھل نہیں پہنچ سکدے۔ عوامی اجتماعات وچ مختلف النوع رنگاں دا اکٹھ ویکھ کے سارے نہال ہوندے نیں۔ موسم بہار وچ ہر پاسے سبزہ ای سبزہ نظر آندا اے۔ بہار دے موسم وچ پرندیاں دی بڑی چہچہاٹ تے شور ہوندا اے۔ موسم بہار دی آمد توں ہر پاسے رونق تے چہل پہل شروع ہو جاندی اے۔ لوکی ایس موسم تے آب و ہوا توں بہت متاثر ہوندے نیں۔ سویرے لوکی کھلے میداناں تے پارکاں وچ ورزش کردے نیں تے ٹھنڈی ٹھنڈی ہوا نال لطف اندوز ہوندے نیں۔ جیویں موسم بہار شروع ہوندا اے بارشاں دا سلسلہ شروع ہو جاندا اے۔ بارشاں دی وجہ نال فصلاں دی پیداوار وچ وی وادھا ہوجاندا اے۔ ایس دے علاوہ سویرے جدوں سورج طلوع ہوندا اے تے شبنم دے قطریاں اتے جدوں سورج دی کرناں پیندیاں نیں تے ایہہ قطرے موتیاں وانگوں چمکدے نیں۔ ساڈے لئی موسم بہار خدا دی اک عظیم نعمت اے۔ بہار دا موسم خدا دا دتا ہویا اوہ تحفہ اے جہدی ا ہمیت توں انکار ممکن نہیں اے۔ ایہہ موسم اپنے نال رنگاں دی بارات لے کے آندا اے ۔ ہر کوئی ایس موسم دی خوبصورتی نال اپنے انداز وچ لطف اندوز ہوندا اے۔ موسم بہار جتھے باغاں نوں رونق بخشدا اے‘ا نساناں وچ وی اک خاص ترنگ‘امید تے جذبہ پیدا کردا اے ایسے لئی جدوں موسم سرما مگروں بہار ساڈے ویہڑیاں وچ قدم رکھدی اے تے ایہدا سواگت من چاہے پروہنے وانگوں کیتا جاندا اے جہڑا سالاں دے انتظار مگروں خانہ بے چراغ وچ رونق افروز ہویا اے۔ بہار دے موسم وچ نکھری ہوئی ہریالی تے رنگا رنگ پھلاں دی خشبو نال معطر فضا ہر نارمل انسان وچ ای نہیں بلکہ ہر ذی روح وچ خوشی دا احساس اجاگر کردی اے۔ جے اسیں آکھیے کہ ساڈے معاشرے وچ بہار دا موسم خوشی تے آسودگی دے جذبیاں دی علامت اے تے بے جا نہ ہووے گا۔ بہار دی آمد دے نال ہر جگہ جشن بہاراں دی تقریباں دا آغاز ہو جاندا اے۔ پنجاب دے مختلف شہراں‘ قصبیاں تے پنڈاں دے رہن والے بہار دی آمد تے اپنی خوشی دا اظہار کردے نیں لیکن اہل لہور جہڑے انداز وچ بہاردی پذیرائی کردے نیں اوہ قابل دید اے۔ ایس موسم وچ زنانیاں زیادہ تر پیلے تے سبز کپڑے زیب تن کردیاں نیں۔ رنگ برنگے کپڑیاں دے نال چوڑیاں وی پاندیاں نیں۔ نہ صرف زنانیاں بلکہ بچیاں وی کھلے ہوئے رنگاں دے کپڑیاں وچ نظر آندیاں نیں۔ ایس دے علاوہ زنانیاں گھراں وچ وی مختلف تقریباں دا پربندھ کردیاں نیں۔ ایہدا مطلب وی موسم دی خوبصورتی نال لطف اندوز ہونا ہوندا اے تے ایس طرح دی تقریباں ملن جلن دا اک بہانہ وی ہوندیاں نیں۔ ایسے موسم وچ بسنت جئے خوبصورت تہوار نوں وی منایا جاندا اے ایہدے لئی بھرویں تیاریاں کیتیاں جاندیاں نیں۔ جتھے رنگا رنگ تقریباں دا اعلان کیتا جاندا اے اوتھے ای شہر دے وڈے وڈے پارکس تے ہوٹلاں وچ پھلاں دی نمائش دا باقاعدہ پربندھ کیتا جاندا اے جہدے وچ زنانیاں ‘ بال تے ہر شعبہ ہائے زندگی نال تعلق رکھن والے لوکی رلت کر کے ایس طرح دی تقریباں دی رونق ہور دوبالا کردے نیں۔ مشینی زندگی دے گوناگوں مسئلیاں وچ جکڑیا ہویا انسان دو تے دوچار دی اسیری توں نکل کے زندگی دی تگ و دو توں فراغت دے کجھ لمحے کشید کردا اے تاں جے آمد بہار دے پہلے لمحیاں توں لطف اندوز ہو سکے۔ فروری دے اختتام تے مارچ دے اوائل وچ جدوں ایس خوبصورت موسم دا آغاز ہوندا اے تے گویا شہر نگاراں دا رنگ ‘ ڈھنگ ای بدل جاندا اے۔ وڈی وڈی شاہراہواں دے آسے پاسے کھلے پھلاں دے تختے‘ دھوئیں تے ٹریفک دے اژدہام وچ وی ذہن تے دل نوں تروتازگی دیندے نیں۔ بہار دا موسم سردی تے خزاں دی خشک گھٹن نوں دور کردا اے تے بھرویں گرمیاں دے آن توں پہلے پہلے زندگی نوں ایس رعنائی نال روشناس کراندا اے جہڑی زندگی وچ کجھ کرگزرن دی امنگ بھر دیندی اے۔ ایس موسم وچ ویاہواں دی تقریباں دے نال نال شوخ تے جاذب نظر پہناویاں دا زور ہوندا اے۔ طبیعت وچ ہلکا پن ہون دے کارن بھک لگدی اے۔ نویں نویں پکوان تیار ہوندے تے تناول کیتے جاندے نیں۔ اکٹھے رل بیٹھن نال آسودگی ملدی اے۔ میل ملاپ تے ملاقاتاں دے بہانے تلاش کیتے جاندے نیں۔ راتاں پرسکون تے دن تناتوں بے نیاز گزردے نیں۔ صوبہ پنجاب نوں اللہ تعالیٰ نے بے شمار نعمتاں نال نوازیا اے۔ سونا اگلدی‘ زمیناں لہلہاندے کھیت تے رنگا رنگ موسم قدرت دا عطیہ نیں۔ موسم سرما رخصت ہوندا اے تے موسم بہار دی رونقاں ہر پاسے پھیلنا شروع ہو جاندیاں نیں۔ برصغیر پاک و ہند وچ ہزاراں سال توں موسم بہار دی آمد نوں مذہب تے ملت توں قطع نظر اک ثقافتی تہوار دے طور تے منایا جا رہیا اے۔جاڑے دے اختتام تے پیڑ پودے جدوں فیر توں سبزے دی چادر اوڑھدے نیں ‘ نویں کونپلاں پھٹدیاں نیں‘ ہر پاسے سروںدے لہراندے کھیت نویں زندگی دی آمد دا پتہ دیندے نیں۔ استقبال بہار نوں وسنت استو‘ ہولی‘ بسنت جئے کئی ناماں نال منایا جاندا اے۔ بہار آندے ای‘ باغاں دے شہر لہور وچ میلہ جشن بہاراں سج گیا۔ وزیراعلیٰ عثمان بزدار نے کجھ دناں پہلے جیلانی پارک وچ میلہ جشن بہاراں 2022 دا افتتاح کیتا۔آرٹ اینڈ کرافٹ گاہواں دا دورہ کیتا تے مختلف سٹالاں دا معائنہ کیتا۔ مزید برآں روایتی کھانیاں دے سٹال ویکھے تے دستکاریاں دے سٹالاں وچ گہری دلچسپی دا اظہار کیتا۔ایس موقع تے وزیراعلیٰ پنجاب سردار عثمان بزدار دا آکھنا سی کہ جشن بہاراں دا میلہ ساریاں لئی خوشی تے امید دا پیغام لیاندا اے۔ ایہہ میلہ ہن لہور دی پہچان بن چکیا اے۔ وزیراعلیٰ نوں فنکاراں ولوں دستکاریاں دے سووینئر پیش کیتے گئے۔ آرٹ اینڈ کرافٹ گاںوچ بلوچی‘ سندھی ، پنجابی تے دوجے ثقافتی سٹال وی شائقین دی دلچسپی دا کارن بنے۔ وزیراعلیٰ عثمان بزدار نے آکھیا کہ جشن بہاراںمیلہ لہور دی تہذیبی ثقافت دا حصہ بن چکیا اے جد کہ اوہناں نے جشن بہاراں دا پربندھ کرن والے منتظمین نوں خراج تحسین پیش کیتا۔ جشن بہاراںدا میلہ ساریاں لئی خوشی تے امید دا پیغام لیاندا اے تے ایس طرح دی مثبت سرگرمیاں صحت مند تفریح فراہم کردیاں نیں۔ پنجاب حکومت نے ہمیشہ سیاحت‘ ثقافت تے کھیڈ نوں فروغ دیتا اے۔ میلہ جشن بہاراں 31مارچ تک جاری رہوے گا۔ زندہ دلان لہور دی تفریح لئی متعدد پروگرامز دا انعقاد کیتا جا رہیا اے۔ ایہہ میلہ شہریاں لئی تفریح دا بہترین تحفہ اے۔ ایہہ میلہ ہن لہور دی پہچان بن چکیا اے۔ میلے وچ گڑ دی تیاری تے اونٹ نال چلن والا کولہو عوام دی دلچسپی دا مرکز اے۔ میلے دے دوران لبرٹی توں جیلانی پارک تک وینٹی کار ریلی‘ کیلی گرافی دے مقابلے‘روایتی کبڈی تے سائیکل ریس وی ہووے گی۔میلے وچ پاکستانی ثقافت داپورا عکس نظر آندا اے۔ دوجے پاسے کجھ دن پہلے معاون خصوصی وزیراعلیٰ پنجاب حسان خاور نے جیلانی پارک وچ جاری جشن بہاراں میلہ دا دورہ کیتا تے مختلف سٹالاں دے انتظامات دا جائزہ وی لیتا۔ اوہناں نے جیلانی پارک وچ جشن بہاراں لئی لائے گئے ہاٹ ائیر بیلون دی رائیڈ وی لیتی۔ معاون خصوصی حسان خاور دے مطابق ہاٹ ائیر بیلون ایس سال جشن بہاراں دے میلے وچ اک بہترین وادھا اے۔ حسان خاور نے انتظامات نوں تسلی بخش قرار دتا تے انتظامیہ دی تحسین کردے ہوئے آکھیا کہ وزیراعلیٰ پنجاب دی ہدایات دے مطابق پارکس اینڈ ہارٹیکلچر اتھارٹی بہترین کم کر رہی اے۔ حسان خاور نے آکھیا کہ لوکاں دی تفریح لئی پی ایچ اے دی انتظامیہ ہر واری کجھ نواں کرن دی کوشش کردی اے۔ ہاٹ ائیر بیلون ایس سال جشن بہاراں دے میلے وچ اک بہترین وادھا اے۔ اوہناں نے ہور آکھیا کہ ہاٹ ائیر بیلون دی رائیڈ ودھ توں ودھ چھ سو فٹ تک اچی کیتی جا سکدی اے۔ ایس رائیڈ دے ذریعے بلندی تے جا کے جیلانی پارک تے شہر دا خوبصورت نظارہ کیتا جا سکدا اے۔ حسان خاور نے آکھیا کہ عوام جشن بہاراں دے میلے دے دوران ہاٹ ائیر بیلون دی سیر 7مارچ تک کر سکن گے۔ اوہناں آکھیا کہ بہار دے ایس میلے وچ سارے صوبیاں دی نمائندگی دے نال سیرو تفریح دے بھرویں موقعے موجود نیں جد کہ 31 مارچ تک جاری رہن والے ایس میلے وچ کھان پین توں لے کے ہینڈی کرافٹس دی شیواں دے سٹال لائے گئے نیں۔ پاکستان وچ بہار دا موسم قابل دید اے۔ بہار وچ جے ویکھیے تے انج محسوس ہوندا اے کہ رنگاں دی بہار آ گئی ہووے۔ ہر پاسے مختلف رنگ‘ باغ دی فضاواں معطر تے پھلاں دا جوبن قابل دید ہوندا اے۔ کلی اک تبسم لئی جوانی لٹا دیندی اے تے اوہنوں ذرا وی افسوس نہیں ہوندا۔ اسلام آباد وچ جشن بہار دے سلسلے وچ پھلاں دی نمائش منعقد ہوندی اے۔ ساڈے وطن وچ موسم بہار انتہائی خوبصورت انداز لیتے آندی اے۔ موسم بہار کائنات دا اک انمول عطیہ اے۔ ایس موسم وچ حسن و جمال حقیقی معنیاں وچ بے نقاب نظر آندا اے۔ خالق کائنات دا حسن اکھاں دے سامنے موجود نظر آندا اے۔ آزادی نوں وی بہار نال تشبیہہ دتی جاندی اے۔ دعا اے کہ رب العالمین ساڈے وطن پاکستان نوں بہار وانگوں روشن خوشگوار رکھے تے ساہنوںساریاں نوں ایسی بہاراں نصیب کرے۔ آمین۔
پھول مرجھا کر بکھر جاتے ہیں گلستان میں
خوشبو کو دے کر اذنِ رخصت خزاں میں