برا وقت دس کے نہیں آندا

شکیل امجد صادق

اک سردار جی دے لطیفے نے نہ صرف مینوں چونکا دتا سگوں مکمل طور تے قائل کر دتا کہ سدابہار لطیفے اصل وچ اپنے اندر اک چھپی اہمیت رکھدے نیں۔ لطیفہ کجھ ایس طرح اے کہ اک سردار جی بڑے اہتمام نال چائے پی رہے سن۔ اوہ اک گھٹ بھرن دے بعد چائے نوں اک چمچے نال خوب ہلاندے‘ چمچہ چائے وچ پھیر کے اک گھٹ بھردے تے فیر مسکراندے۔ اوہ ایہ عمل بار باہر دہراندے رہے۔ ہر گھٹ دے بعد چائے نوں چمچے نال ہلاندے ‘اک ہور گھٹ بھردے تے مسکران لگدے‘ نیڑے بیٹھے اک صاحب نے پچھیا سردار جی تسیں ہر وار چائے نوں چمچے نال ہلا کے گھٹ بھرن دے بعد مسکراندے کیوں او؟ تے سردار ی نے کہیا اک گل اج ثابت ہو گئی اے چائے وچ جے چینی نہ پائو تے بھاویں لکھ چمچے ہلائو اوہ کدی وی مٹھی نہیں ہووے گی۔
نومبر 1989ء وچ وزیراعظم بینظیر بھٹو دے خلاف عدم اعتماد تحریک پیش ہوئی تے سارے مسلمان ممبراں نوں قرآن شریف تے ہتھ رکھوایا گیا کہ اوہ اپنی گل توں نہیں مُکرن گے تے رانا چندر سنگھ نوں کہیا گیا کہ گیتا تے ہتھ رکھو کہ کدھرے اوہ کسے طرح وی اوہناں دا ساتھ نہیں چھڈن گے۔ رانا صاحب نے کہیا میں راجپوت آں میری زبان ای کافی اے۔ تریخ گواہ اے سگوں بڑی شان و شوکت دے نال ماضی دے اوہناں ممبراں تے دور حاضر دے لیڈراں دا منہ چڑا رہی اے جہناں نے قرآن شریف تے ہتھ رکھ کے حلف چکیا سی جدوں ویلا آیا تے اوہ اپنی زبان توں مُکر گئے پر رانا چندر سنگھ اپنی زبان تے قائم رہیا۔ خیر عدم اعتماد تے نکام رہی پر لوکاں دے ایمان دا پتہ چل گیا۔ عدم اعتماد تے ہر دور دا خاصا رہیا اے۔ ہارس ٹریڈنگ ساریاں قومی تے عوامی پارٹیاں دا شیوا رہیا اے۔ پر اوہناں بیمار لیڈراں دے ایمان دا اندازہ تسیں ذرا فیر توں لا لوو تے اپنا ایمان تے یادداشت وی تازہ کرو۔ میڈیکل رپورٹاں موجب آصف علی زرداری پچھلے چار ورھیاں توں وکھووکھ بیماریاں دا شکار نیں۔ زرداری صاحب سنسری پیریفرل تے آٹونومک نیورو پیتھی دا مریض اے۔ اوہناں نوں ریڑھ دی ہڈی تے جوڑاں وچ وی تکلیف اے جد کہ اوہ دل دے وی مریض نیں ایہناں بیماریاں نوں بنیاد بنا کے اوہناں نے عدالت توں ریلیف وی لیا اے ہن آئونے آں جناب شہباز شریف ول۔
چار شہبازشریف پچھلے چار ورھیاں توں کینسر دے مریض نیں۔ اوہ ڈاکٹر مارٹن لندن والے توں غائبانہ علاج وی کراندے رہے نیں جد کہ شہبازشریف دے کمر درد دے مستقل عارضے وچ وی مبتلا نیں۔ انج ایس گل دی سمجھ چنگی طرح آندی اے جناب خورشید شاہ پچھلے چار ورھیاں توں دل دیاں وکھووکھ بیماریاں وچ مبتلا نیں۔ ایہناں دے دل دی اوپن ہاٹ سرجری وی ہو چکی اے سگوں دل داغدار وی ہو چکیا اے۔ چوہدری شجاعت صاحب پچھلے دس ورھیاں توں ساہ دی تکلیف وچ مبتلا نیں تے اوہ اپنے ملن والیاں نوں وی نہیں پچھان دے۔ چوہدری صاحب جرمنی توں علاج کراندے رہے نیں۔ دس ورھے توں ساہ دی بیماری وچ مبتلا ہون دے باوجود چوہدری صاحب نوں ٹھیک ٹھاک ساہ آ رہیا اے سگوں پہلے توں ودھ آ رہیا اے۔ ہن جناب بھولے بادشاہ ول آنے آں۔ جناب نوازشریف بائوجی پچھلے کافی عرصے توں علاج دے سلسلے وچ لندن وچ مقیم نیں تے اجے تک اوہناں دی دوائی نہیں ملی سگوں کسے کمپنی توں بنی نہیں تے بائو جی وی دوائی دی ایجاد تک اوتھے ای تکیہ رکھن گے۔ ایہو معاملہ اسحاق ڈار صاحب دا اے شاید اوہناں نوں کوئی دماغی مسئلہ اے۔ ہن میں حیران آں ایہ سارے قومی بیمار لاچار اچانک ٹھیک کیویں ہو گئے نیں۔ ایہ مردہ بدست زندہ قبراں‘ ہسپتالاں تے کلینکاں چوں نکل کے اسلام آباد اپڑ رہے نیں۔ ایہ اک پیراں تے کھڑے ہو کے اک دن وچ دو دو پریس کانفرنساں‘ تن تن میٹنگاں کھڑکا رہے نیں تے زبان درازی توں تیراندازی دا کم لے رہے نیں۔ یاد رہوے ایہناں تے کرپشن دے کیس وی نیں ایہ عدالتاں وچ بیماری دا بہانہ بنا کے پیش ہون توں بچدے وی رہے نیں پر ایہ ذہنی و جسمانی لوکاں تے حکومت کرن لئی بالکل فٹ تے تندرست نیں سگوں تندرستی نوں ہزار نعمت سمجھدے نیں۔ ہن وی جے قوم ایہناں دی حقیقت نہ سمجھے تے اجہی قوم دے شعور دا ماتم تے عزاداری ای بن دی اے۔ انج ایہ عوام سردار توں گھٹ نہیں۔ ایہ عوام ووٹ پان ویلے شعور تے فکر دی چینی وی نہیں پاندی تے چمچہ ہلا ہلا کے سگوں چمچے بن کے ایہناں لیڈراں تے لٹیریاں دا گلہ وی کردی اے۔ لہور وچ مقیم خوبصورت لہجے دے جدید تے پرشکوہ شاعر ساڈے دلدار تے محبت بھرے دوست جاوید رامش دے بقول:
کچھ برا وقت بھی آتا ہے سرِ راہِ عمل
کچھ مکافات بھی چل پڑتے ہیں پیچھے پیچھے