ڈیرہ تے کلب

حمیداحمد سیٹھی

ڈیرہ پنڈاں دے مرکزی علاقے وچ اوہ تھاں ہوندی اے جہدے وچ اوتھوں دے لوک مل بیٹھ کے گپاں لاندے‘ کھاندے پیندے‘ کوئی کھیڈ کھیڈدے‘ دل بہلاندے تے فالتو ویلا گزاردے نیں۔ ایسے طرح ہن وڈے شہراں دے مرکزی علاقیاں وچ ڈیریاں دی تھاں کلباں نے لے لئی اے۔ ہن ایہناں کلباں وچ ماڈرن سہولتاں وی پائیاں جاندیاں نیں۔ جمخانہ وچ مہمان ٹھہران لئی پہلے صرف 9 کمریاں دا گیسٹ روم ہوندا سی ہن اوتھے آمنے سامنے مہمان ٹھہران لئی 89 کمریاں دے دو گیسٹ رومز نیں۔ سوئمنگ پول دے سامنے بنکر ہال اے۔ ہن کلب وچ باربی کیو ٹیرس اے جد کہ مین بلڈنگ وچ دو چھوٹے ہال تے روز ہال نیں۔ اک وڈے گیسٹ روم دی بالائی منزل تے سگار روم بنایا گیا اے۔
ایہ کلب دی مین بلڈنگ دی تفصیل سی۔ کلب دی جمنازیم وچ جہنوں ہیلتھ کلب وی کہیا جاندا اے ایہ تن منزلا عمارت اے تے ایہدی بیسمنٹ وی اے ایہ عمارت ممبراں نوں جوان تے صحت مند رکھن دا کم کردی اے۔ ایہدے کمریاں وچ ان گنت آلات تے وسیع کورٹ نیں جد کہ سکوائش دے چارکورٹ نیں۔ ایہ اوہ گیمز نیں جہدے تے کئی دہائیاں تک پاکستان دی اجارہ داری رہی اے۔ کلب دا ہولز18 دا گولف کورس فجر توں مغرب تک آباد رہندا اے جتھے کئی انڈین کھڈاریاں نوں سدیا گیا تے اوہ کئی ہفتے ایتھوں دے گیسٹ رومز وچ قیام کردے تے میچ کھیڈدے نیں۔ جدوں وی کوئی بندہ کلب دی ممبر شپ لئی آندا اے تے اوہدے نال تجویز کنندہ تے تائیدکنندہ ہوندے نیں۔ اج توں 29 ورھے پہلاں میرا ناں ڈاکٹر ظفرالطاف نے تجویز کیتا تے ایہدے بعد جدوں کمیٹی دے سامنے بلا کے سوال کیتے گئے تے پہلا سوال سی کہ تہاڈا ناں ڈاکٹر ظفرالطاف نے تجویز کیتا اے تہاڈی اوہناں نال آخری ملاقات کدوں ہوئی؟ میں جواب دتا کہ اج سویرے یاراں وجے اوہناں دے کمرے وچ چائے پیتی سی تے ایس ملاقات نوں کجھ گھنٹے گزرے نیں۔ ڈاکٹر ظفرالطاف نہ صرف کرکٹ دے کھڈاری رہے سگوں سرکاری افسر ہون توں علاوہ کرکٹ دی اعلیٰ سطح تے کم کردے رہے۔ ڈاکٹر ظفرالطاف جدوں مرکزی وزیر بنے تے کسے مخالف نے جنرل ضیاء الحق دے کول اوہناں دی شکایت کر دتی تے مخالفت دا کھیڈ کھیڈیا جہدے تے ضیاء الحق نے فوراً ڈاکٹر ظفرالطاف نوں اوس پوسٹ توں ہٹا دتا تے اوہناں دے خلاف کاروائی دا وی فیصلہ کیتا۔ ایہ پتہ لگن تے دو تن دوست ضیاء الحق نوں ملے تے اوہناں نوں دسیا کہ ڈاکٹر ظفرالطاف صاحب تے نہ صرف پڑھے لکھے نیں سگوں دیانت تے قابلیت وچ وی اوہناں دا کوئی مقابلہ نہیں کر سکدا۔ ضیاء الحق اپنی گل تے قائم رہیا تے اوہنے ڈاکٹر ظفرالطاف نوں سسپنڈ کر دتا۔
جہڑے لوک ڈاکٹر ظفرالطاف صاحب نوں چنگی طرح جاندے سن اوہناں نے اک واری فیر ضیاء الحق کول جا کے ڈاکٹر ظفرالطاف دی حمایت کیتی تے جنرل ضیاء الحق نوں آکھیا کہ تسیں ڈاکٹر ظفرالطاف صاحب دے نال دس منٹ دی ملاقات کرکے صحیح صورتحال بارے آگاہ ہو جائو کیوں جے جہڑے مخالفین نے ڈاکٹر ظفرالطاف دے خلاف گلاں کیتیاں نیں اوہ بالکل ایس قابل نہیں کہ اوہناں نوں سن کے فیصلہ کیتا جاوے۔ بڑی مشکل دے بعد ضیاء الحق راضی ہویا کہ اوہ صرف دس منٹ لئی ڈاکٹر الطاف نوں سد کے اوہدے خلاف جہڑا الزام اے اوہدی تصدیق کرے گا۔ جدوں ضیاء الحق نے ڈاکٹر ظفرالطاف نوں سد کے پچھ گچھ شروع کیتی تے ایہ دس منٹ اک گھنٹے تک لمے ہو گئے تے ضیاء الحق نوں یقین ہو گیا کہ ڈاکٹر ظفرالطاف دے مخالفین نے اوہناں توں کوئی بدلہ لین دا ارادہ کر رکھیا اے۔ اک گھنٹے دی ملاقات دے بعد جنرل ضیاء الحق ایس حد تک ڈاکٹر ظفرالطاف دے مداح ہو گئے کہ اوہناں نے اوسے ویلے اوہناں نوں فیڈرل سیکرٹری دی پوسٹ تے بلا لیا۔
ڈاکٹر ظفرالطاف نال نہ صرف کرکٹ نال تعلق رکھن والے تے اعلیٰ عہدیاں تے فائز شخصیات نوں ڈاکٹر الطاف دی قابلیت تے ایمانداری تے یقین سی کہ ڈاکٹر صاحب دی پریشانی دا وقت تھوڑی ای دیر وچ ختم ہو جاوے گا۔ ڈاکٹر ظفرالطاف دی اعلیٰ تعلیم دا ای پھل سی کہ اوہناں نے باراں کتاباں لکھیاں جو اج وی ہر وڈی لائبریری وچ موجود نیں۔ جدوں میری ممبر شپ لئی جمخانہ دی کمیٹی نے مینوں انٹرویو لئی سدیا تے ہر ممبر کمیٹی نوں پہلے توں ای یقین سی کہ ڈاکٹر ظفرالطاف اک اعلیٰ درجے دا سول سرونٹ تے ماہر کرکٹر اے۔ ڈاکٹر ظفرالطاف بھاویں مکمل صحت مند تے سمارٹ سن پر خدا دا کرنا انج ہویا کہ جدوں اوہ گڈی چلاندے ہوئے گھر ول جا رہے سن تے اوہناں تے ہارٹ اٹیک دا حملہ ہویا جو ایناں ڈاڈھا سی کہ اوہ بچ نہ سکے۔ دنیا وچ مہنگائی ہر تھاں پائی جاندی اے جہدی اک مثال میں جمخانہ توں ای دیواں گا۔ جدوں میں 29 ورھے پہلاں ایس کلب دا ممبر بنیا تے میرے توں کلب نے پنج ہزار روپیے ممبر شپ فیس طلب کیتی جو میں ادا کیتی۔ جے اج کلب دی ممبر شپ دے امیدواراں نوں ویکھیا جاوے تے اوہ ان گنت نیں تے ہن ممبر شپ فیس سولاں لکھ تن ہزار روپیے اے جد کہ جمخانہ دی ممبرشپ دے امیدواراں دیاں قطاراں لگیاں ہویاں نیں جہناں دی کئی کئی ورھے واری ای نہیں آندی۔
ایہ صرف جمخانہ کلب دا ای مسئلہ نہیں۔ پاکستان وچ مہنگائی تے اپوزیشن پارٹیز دا ایناں شور اے کہ سمجھ ای نہیں آندی کہ ایہ مہنگائی دی بلا جہڑی کرونا بیماری شروع ہون تے آئی کدوں ساڈی جان چھڈے گی۔ گل چلی سی ڈیرے توں تے اپڑی جمخانہ کلب تک۔ ہن تے نہ صرف سول سوسائٹی وچ کافی کلب قائم نیں سگوں آرمی دے وی کئی کلب ہر وڈے شہر وچ موجود نیں۔ ڈاکٹر ظفرالطاف نوں یاد کراں تے اک شعر دی یاد آندی اے۔
دے صورتیں الٰہی کس دیس بستیاں ہیں
اب دیکھنے کو جن کے آنکھیں ترستی ہیں