ایہہ کیہ رولا پے گیا شاہد صدارتی ایوارڈ لے گیا

گورنر پنجاب نے پر وقار تقریب وچ میڈل گلے وچ پایا
شاھد نوں اے ایوارڈ بہت پہلے مل جانا چاہی دا سی، فلمی حلقیاں دا تبصرہ
مبارک دین والیاں وچ الطاف حسین ،حسن عسکری ،سید نور، مسعود بٹ، سنگیتا، صائمہ نور، شاہدہ منی، زیڈ اے زلفی، ناصر ادیب ،پرویز کلیم ،کمال پاشا، افتخار ٹھاکر، بندہ نا چیز تے اچھی خاں دے ناں شامل نیں

اشفاق کاظمی

پاکستانی فلم انڈسٹری دے بے تاج بادشاہ جو کسے تعارف دے محتاج نہیں۔ لیجنڈ شاہد نوں حکومت ولوں صدارتی ایوارڈ برائے حسن کارکردگی ملن اتے عوام تے فلمی حلقیاں وچ خوشی دی لہر دوڑ گئ۔ شاہد دا شمار اوہناں فنکاراں وچ ہُندا اے جنھاں محمد علی ندیم وحید مراد جیہے مہان فنکاراں دے ہُندیاں اپنا وَڈا ناں بنایاتے انسو امراو جان ادا پہچان تہذیب ثریا بھوپالی جیہاں درجناں فلماں وچ کم کر کے اپنے فن دا لوہا منوایا۔

ایس ایورڈ دے متعلق فلمی سیانیاں دا کہنا اے کہ ایہہ ایوارڈ شاہد حمید نوں بہت پہلے مل جانا چاہی دا سی چلو دیر آید درست آید۔ 23مارچ نوں گورنر ہائوس وچ مختلف مکتبہ فکر وچ چنگی کارگردگی وکھان والے لوکاں نوں مختلف ایوارڈ دِتے گئے۔

فلم نگر وچوں تن فنکار ایناں میڈلاَں دے حق دار قرار دِتے گئے جنھاں وچ صائمہ نور، نیلو بیگم تے شاہد حمید شامل سن۔ گورنر پنجاب محمد سرور جہیڑے کہ فنکار پسند متھے جاندے نیں اوہناں نے اپنے ہتھاں نال لیجینڈ شاھد نوں صدارتی ایوارڈ دا میڈل گلے وچ پایا تے سرٹیفکیٹ وی دِتا۔ شاہد نوں ایس خوشی دے موقعے تے مبارکباد دین والیاں دی لسٹ بہت لمی اے۔

ایتھے صرف چند نام دِتے جارہے نیں ہدایتکار الطاف حسین ،حسن عسکری ،سید نور، سنگیتا ،مسعود بٹ ،ایڈیٹر زیڈ اے زلفی، مصنف ناصر ادیب ،محمد پرویز کلیم، محمد کمال پاشا ،واجد زبیری، سیلم مراد، اداکار شان،معمر رانا، صائمہ نور، شاہدہ منی، افتخار ٹھاکر، بندہ نا چیز تے اچھی خاں شامل نیں۔ یاد رہے کہ شاہد حمید ایس ویلے فلم فیڈریشن آف پاکستان دے صدر وی نیں۔