چونڈہ وچ پنجابی رہتل دیہاڑ دا جشن
اِکٹھ وچ سیاسی، سماجی تے صحافتی شخصیات سمیت لوکائی دی وڈی گنتری نے رَلت کیتی
رپورٹ: سید علی قیصر
23مارچ چونڈہ فارمز وجیدوالی روڈ چونڈہ چوہدری طاہر باجوہ ہوراں نیں پنجابی رہتل دیہاڑ منان دا پربندھ کیتا جہدے اچیچے پروہنے منے پرمنے پنجابی لکھاری تے کھوج کار بابا جی احسان باجوہ (گکھڑ والی) سن۔ خصوصی شرکت سابق ممبر پنجاب اسمبلی ذوالفقار غوری، ممبر پنجاب اسمبلی سردار رمیش سنگھ اوروڑہ،ملک ذوالفقار احمد،ضیااللہ باجوہ،مرزا شکور،آفتاب گل،زاہد باجوہ،طاہر کھوکھر،ریاض کھوکھر،علامہ یامین مدنی،رفاقت گجر ایڈووکیٹ سنے وڈی گنتری وچ لوکای نیں شرکت کیتی تے اپنے وسیب نال پیار دا وکھالا کیتا۔ پنجاب دے نامور کلام پڑھن والے محمد عارف سہلری، محمد یونس سیال،سائیں ارشاد نوشاہی،ملک شبیر ہورآں نیں کلام سنایا تے لوکاں ولوں بڑی سلاہنا کھٹی ۔
سردار رامیش سنگھ MPA) )تے ذوالفقار غوری ہورآں نیں گل بات کردیاں ہویاں سرکار توں پنجابی بولی نوں سکولاں وچ لاگو کرن دی منگ کیتی تے لوکاں نوں وی بنتی کیتی کے اپنے گھراں وچ بالاں نال پنجابی بولو دوواں اسمبلی ممبران نیں اسمبلی اندر پنجابی دی گل اگے ودھان دا چارا مارن دا اعلان کیتا،تقریب وچ سید پھول شاہ پنجابی اک قرار داد راہیں 23 مارچ دے شہید پنجابیاں دے ہیرو شہید بھگت سنگھ ،راج گورو،سکھ دیو ہوراں نوں ساری قوم ولوں سلام پیش کیتا،پنجاب وچ بالاں نوں پنجابی وچ پڑھان دی بھرویں منگ کیتی گئی پنجاب دے خلاف ہون والیاں سازشاں، مردم شماری فارم وچ پوٹھوہاری نوں بطور وکھری زبان درج کرن دی بھرویں نندیا کیتی گئی ۔باباجی احسان باجوہ ہوراں نیں گل بات کردے ہوے زور دتا کے سارے لوک گھراں وچ لازمی بالاں نال پنجابی بولن سارے پنجابی آون والیاں چوناں وچ پنجاب نال پیار کرن والے لوکاں نوں ووٹ پان،بابا جی احسان باجوہ نے تقریب وچ شامل دونواں اسمبلی ممبران کولوں وعدہ لیا کے او اسمبلی وچ پنجاب دے حقاں دی راکھی واسطے اپنا ٹل لان گے۔
