بدلدے حالات

سعد اللہ شاہ

تم نے جگہ جگہ پہ مجھے بدگماں کیا
اپنا نشاں بتا کے مجھے بے نشاں کیا
تارے ردائے شب پہ نکل آئے خود بخود
میں نے تمہاری یاد کو جب آسماں کیا
ہن تے ساڈے کول یاداں ای رہ گئیاں نیں یاںفیر خواب تے سراب۔ وہ میرے نصیب کی بارشیں کسے اور چھت پہ برس گئیں۔ قصے تے گلاں ساڈے کول بہت نیں۔ ہر پاسے جھوٹ ای جھوٹ تے ایہدی عملداری اے سچی گل تے صرف اوہو اے جو لوکاں دی زبان تے ہوندی اے کہ مشق ستم تے بس اوہو نیں۔ میں اللہ دا شکر ادا کر رہیا سی کہ عدم اعتماد دے جھگڑے نے حکومت اپوزیشن تے لٹ مار کرن والیاں نوں مصروف رکھیا اے تے کجھ دیہاڑیاں توں مہنگائی وچ آفاقہ نظر آ رہیا سی۔ حکومت ہووے یاں اپوزیشن مہنگائی دے ذمہ دار دوہاں صفاں وچ نیں۔ صرف انڈے تے ٹماٹر سننے ہوئے نیں۔ ایہ ٹھیک اے کہ حکومت دا دھیان ایس ویلے مہنگائی ول نہیں پر مہنگائی آپ وی تے منہ زور اے تے فیر رمضان شریف دی آمد آمد یعنی کہ مسلمان تاجراں دا سیزن آ رہیا اے لوک ثواب کمان گے تے تاجر پیسہ۔ ایہ ساڈا شعار اے۔ مسئلہ صرف مہنگائی دا وی نہیں سگوں انج لگدا اے کہ کوئی قنون باضابطہ ای نہیں کسے نوں کوئی ڈر نہیں۔ اک خودکار جیہا نظام اے جہدے وچ جہدا جتھے داء لگدا اے اوہ گھٹ نہیں کردا۔ اک بے برکتی اے اک لہور نوں ای لے لوو کہ ہر پاسے ڈاکو راج لکھاں روپیے دے ڈاکے۔ انج تے یوٹیلیٹی بلز وچ وی ڈاکے دا گمان ہوندا ے تسیں جدوں چاہو ایڈجسٹمنٹ یاں فیول چارجز دے ناں تے جنے پیسے چاہو صارفین توں کڈھوا لوو۔ لوک اپنے آپ نوں کوس کے رہ جاندے نیں کوئی کیہ بولے سنے گا۔ آن والے دیہاڑے بالکل وی چنگے نہیں۔ میں سیاسی گل نہیں کردا پر ایہ تے طے اے کہ لوکاں دا حکومت دے نال نال اپوزیشن توں وی اعتماد تے اعتبار اٹھ چکیا اے۔ اوہناں دی توقعات دے الٹ سب کجھ ہویا۔ تسیں منو یاں نہ منو پر ایہ سچ اے ہاں کوئی تدارک کر سکیے تے اسیں خوش ہون والیاں وچوں ہوواں گے انج ای شعر یادآ گیا:
ہم تو پہلے ہی تیرے حق میں تہی دست ہوئے
ایسے گھائل پر نشانے کی ضرورت کیا تھی
اک گل تے طے اے کہ ایہ سب اقتدار دی جنگ اے ایہنوںنیک تے بدی قرار دینا سراسر غلط اے۔ اپنی اپنی اچھائی ثابت کرنی ہووے گی ساریاں دے نال لکھاں لوک نیں ایہناں وابستگیاں وچ بہت سارے عوامل نیں۔ عوام تے ایہ ویکھدے نیں کہ اوہناں تک کیہ فائدہ اپڑے۔ کیہ اداریاں توں اوہناں دے کم ہو رہے نیں حکومت نوں اپنی ساڑھے تن ورھے دی کارکردگی دسنی چاہیدی اے اسیں تہاڈی گل منی تے تہانوں ایس پوزیشن تے لے آئے تے تسیں ساڑھے تن ورھیاں وچ کہدے توں پیسہ کڈھوایا تے کنہوں سزا دوائی۔ ہن تے اپوزیشن وی اخلاقی حداں ٹپ چکی اے۔ میں اپنے قارئین دا دھیان پتوکی وچ ہون والے شرمناک واقعے ول دوانا چاہنا واں جتھے اک پاپڑ ویچن والے نوں باراتیاں نے مار دتا تے فیر ایہدے تے ستم ایہ کہ اوہدی لاش رکھ کے کھانا تناول فرماندے رہے ایہدے توں تہانوں اندازا ہو جانا چاہیدا اے کہ کسے نوں کسے دا کوئی ڈر نہیں پر میں کسے ہور واقعے دا تذکرہ اپنے آپ تے فرض سمجھنا واں کہ ایس سانحے نے میرے تے بہت ای اثر پایا تے اوہ میرے دل تے بھار بن گیا کہ وچارے لوک کتھے تے کہدے کول جان میری مراد ایس واقعے توں اے جو رائے ونڈ دی اک سوسائٹی وچ ہویا کہ بچیاں دے نال زیادتی کر کے ویڈیو بنان والا گینگ پھڑیا گیا۔ میرے حواس نوں شل کر دین والی اوس ماں دی گل بات اے جنہے اپنے دل دے ٹکڑے دی شکل نوں ویکھدے ہوئے فکرمندی دا اظہار کیتا کہ اوہ ٹھیک نہیں لگ رہیا۔ اوس ماں نے بچے دے باپ نوں کہیا تے فیر دوہاں دے استفسار تے بچے نے دسیا کہ کمر وچ درد ہو رہیا اے گل کھل گئی تے اوس باپ نے اپنی قوت مجتمع کردے ہوئے بہادری دے نال اصل لوکاں تک اپڑ گیا۔ پولیس دی اپنیاں پھرتیاں کہ مجرماں دے موبائل توں ڈیٹا ڈیلیٹ کر دتا کوئی پولیس دی کارکردگی تے اکھاں پھوڑے یاں سر۔ کجھ نہیں بن سکدا انج دا ای واقعہ قصور وچ وی ہویا سی تے فیر اوہدے پچھے سیاسی وابستگیاں نکل آئیاں کہنا میں ایہ چاہنا واں کہ آخر اک سوسائٹی وچ اک گینگ کیویں کم کر رہیا سی۔ گزارش تے ساڈی آئی جی تے ڈی آئی جی اگے اے کہ اوہناں دے وی بچے نیں ماں دی محبت نوں اوہ وی سمجھدے نیں تسیں وی اخبار پڑھ لیا کرو۔
فیر آنے آں موجودہ لمحہ دے سیاسی معاملیاں ول ایہدا اندازا کہ کون آ رہیا اے تے کون جا رہیا اے کوئی اوکھا نہیں کوئی کبوتر وانگوں اکھاں بند کر لوے تے وکھری گل اے۔ ایہ دعویٰ وی سامنے آ گیا اے کہ اک جہاز پرانے پاکستان وچ لینڈ کرن جا رہیا اے۔ کیہ فیر توں لٹ مار دا زمانہ آن والا اے اوہ منظر جو بنایا گیا سی ہن وگڑ رہیا اے نوازشریف نے جو جی ٹی روڈ تے بیانیہ دتا سی اوہ اُکا بدل چکیا اے ہم ہوئے کافر تو وہ کافر مسلمان ہو گیا۔
انجم ذرا تو دیکھ تو ناصح کی شوخیاں
پہلو بدل کے مجھ سے بھی پہلے بدل گیا
ویکھیا جا سکدا اے کہ ایس ویلے بخار کنہوں چڑھیا ہویا اے تے فیر بخار وی تیز اے جہدے وچ پتہ نہیں چلدا کہ کیہ کہنا تے کیہ نہیں کہنا۔ مزے دی گل ایہ وے کہ اپنی طاقت تے مقبولیت اک دوجے نوں وکھائی نہیں جاندی سگوں کسے ہور نوں وکھائی جاندی اے۔ منیرنیازی دی نظم ذہن آئی ہمیشہ دیر کر دیتا ہوں میں۔ بہرحال بدلدے موسماں وچ جی نوں لگان والی گل اے سب کجھ الٹ پلٹ ہو رہیا اے پارلیمنٹ دی لڑائی باہر کیوں لڑی جا رہی اے نقصان تے ہر صورت وچ لوکاں دا ہووے گا تے ہو رہیا اے۔ انج تسیں کدی سوچیا کہ عمران اپوزیشن دے بناں چلے تے چلدے گئے۔ اوہ اپوزیشن توں قوت حاصل کر سکدے سن تعاون حاصل کر سکدے سن پر انج کرکے کرپٹ ٹولے توں تعاون لیندے تے لوکاں دے ووٹ دی توہین ہوندی۔ سانوں تے منیرنیازی نے اک واری کہیا سی سعد ردعمل وچ وقت ضائع نہ کرنا پر ایتھے تے طاقت وی ضائع کیتی جا رہی اے۔ بہرحال ایہ گل ذہن وچ رہوے کہ غصے وچ عقل جاندی رہندی اے تے دوجی گل ویاہ وچ شادیانے وجن تے چاول دیگ دے تھلے لگ جاندے نیں اپنا خیال رکھنا۔٭٭