روشن راہ صرف رواداری دا اے!

اسدمفتی

لندن توں چھپن والے اخبار آبزرور نے اپنی سجری اشاعت وچ ایہ انکشاف کیتا اے کہ داعش تے القاعدہ خودکش حملیاں لئی عورتاں نوں وی بھرتی کر رہیاں نیں۔ رپورٹ موجب یورپین یونین دے شعبہ انٹیلی جنس نے ایس مقصد لئی تحقیقات دا آغاز کر دتا اے۔ فرانسیسی انٹیلی جنس آفیسر نے دسیا اے کہ اجے عورتاں نوں بھرتی کرن دے کجھ اہم ثبوت ای ملے نیں۔ اودھر امریکی انٹیلی جنس دے اک ذمہ دار اہلکار نے دسیااے کہ مزاحمت کار عراقی‘ افغانی یاں عربی عورتاں نال ویاہ کرن دے بعد یاں دوستی کر کے اوہناں نوں وکھووکھ طریقیاں نال خودکش حملیاں لئی تیار کردے نیں۔
یورپین سٹرٹیجک ماہرین تے تجزیہ نگاراں دا خیال اے کہ القاعدہ ولوں عورتاں تے بچیاں نوں خودکش حملیاں لئی استعمال کیتے جان توں ایہ ظاہر ہوندا اے کہ دنیا وچ القاعدہ دے سٹرٹیجک اثاثے کمزور پے رہے نیں تے اوہدے ولوں عورتاں تے بچیاں نوں خودکش حملیاں لئی استعمال کیتے جان دا عمل القاعدہ دی ودھدی ہوئی کمزوری داثبوت اے۔ عالمی تجزیہ نگاراں تے یو ایس آرمی وار کالج دے ماہرین سنے برطانوی انٹیلی جنس ایم آئی فائیو نے وی اپنی تحقیق وچ ایس رجحان نوں خطرناک قرار دتا اے۔ ماہرین دا کہنا اے کہ عورتاں خودکش حملہ آورا ںدی اک وڈی گنتی ذہنی طور تے بیمار ہوندی اے جہناں نوں القاعدہ تے مقامی مزاحمت کار اپنے مقصد لئی استعمال کر رہے نیں۔ تہانوںیاد ہووے گا کجھ چر پہلاں بلجیم دی پیدائشی شہری اک عورت عراق دے شہر یعقوبہ وچ اک کامیاب خودکش حملے وچ اپنے نال پنج امریکی فوجیاں نوں وی لے ڈبی سی۔ ایس خاتون یاں خودکش حملہ آور دا ناں میوریل سی۔ اوہدی عمر تقریباً 38 ورھے سی‘ ایس خاتون نے اک مراکشی مسلمان دے نال دوستی کرکے اسلام قبول کر لیا سی پر کسے دے وہم و گمان وچ وی نہیں سی کہ ایہ عورت انتہاپسندی وچ مرداں تے وی بازی لے جاوے گی۔ یورپ دے اخبارات نے میوریل نوں پہلی خودکش حملہ آور قرار دے رکھیا اے۔ میوریل جنہے اسلام قبول کرن دے بعد اپنا ناں مریم رکھ لیا سی۔ بلجیم دے اک پنڈ وچ پیدا ہوئی۔ ہائی سکول دے بعد چھوٹی موٹی ملازمت کرے ماں دا ہتھ وی بٹایا فیر وی ماڑے طبقے دے چنگل چوں نہ نکل سکی فیر اک دن ایس طرح ہویا کہ اوہدی ملاقات اک مراکشی نژاد حسام جورس نال ہوئی‘ ایہ دوستی بعد وچ محبت وچ بدل گئی۔ ایہ اوہدی کسے وی منڈے نال پہلی دوستی سی اوہنے اپنا سب کجھ اقدار‘ تہذیب حالں کہ مذہب وی اوس مراکشی مسلمان حسام نوں سونپ دتا۔ اوہدی ماں نے دوہاں دی دوستی تے کوئی اعتراض نہ کیتا۔
ہالینڈ دے اک اخبار نے مریم دی ماں ایلیان دا اک تفصیلی انٹرویو چھاپیا جہدے وچ اخبار لکھدا ے جس بندے نے میوریل نوں مریم بنایا اوہ اک عام جیہا مراکشی سی جو ویاہ دے بعد اوہنوں مراکش لے گیا پر اوتھے اوہ زیادہ عرصہ نہ رہ سکیا تے واپس بلجیم آ گیا ہن دوویں بلجیم وچ رہن لگ پئے۔ حسام دا کم تے کردا کوئی نہیں سی بس گزارا الائونس تے دوجی مراعات تے اوہناں دوہاں دی گڈی چل رہی سی پر فیر اچانک ایہناں دوہاں دیاں زندگیاں وچ مالی لحاظ نال تبدیلی آن لگ پئی ایہ تبدیلی ویکھ کے نہ صرف اوہدی ماں سگوں گوانڈھی وی بڑے حیران ہوئے جدوں ماں نے پچھیا تے دوہاں وچوں کوئی وی تسلی بخش جواب نہ دے سکیا پر ایلیان دے کن کھڑے ہو چکے سن۔ اوہ اپنے ایس خدشے بارے دوہاں توں پچھنا ای چاہندی سی کہ چانک اک دن ایہ دوویں بلجیم توں غایب ہو گئے تے اودوں بغداد دے شمال جنوب وچ واقع مشہور شہر یعقوبہ توںاک دن خاتون دے خودکش حملے دی اطلاع آئی جہدے وچ پنج امریکیاں سنے 15 بندے لقمہ اجل بن گئے۔ حملہ آور دے جسم دے چیتھڑے اڈ گئے شکل و صورت تے جنس دے پچھانن دا تے کوئی سوال ای نہیں سی۔ بس خون وچ لت پت اک پاسپورٹ ملیا۔ ایہ حملہ مریم نے کیتا سی۔ بلجیم دے پاسپورٹ تے اوہدے سارے کوائف لکھے سن۔ ایس پاسپورٹ نے اوہدے ہون دی تصدیق کر دتی تے ایس طرح اوس مریم نے برین واشنگ ہتھوں مجبور ہو کے پہلی خودکش یورپی خاتون ہون دا اعزاز حاصل کر لیا تے اوس دن توں اہل یورپ جہدے وچ میں وی شامل آں دیاں پریشانیاں وچ وادھا ہو گیا پر مریم نوں ایس راہ تے پان والیاں نوں کون دسے کہ دنیا وچ 57اسلامی ملک ہون دے باوجود مسلماناں دے حالات نہیں سدھرے تے فیر ایہ کجھ خودکش حملہ آور مسلماناں لئی کیہ سدھار لیان گے؟ میں وی سوچنا واں تسیں وی سوچو۔٭٭