چیتا

خالدحسین تھتھال

ڈُھونڈن کجھ ہور لگی دا اے
تے پھرولدیاں پھرولدیاں
لبھ کجھ ہور جا ندا اے
کئی واریں تے ڈُھونڈندیاں ڈُھونڈندیاں
ایہہ وی یاد نہیں رہندا
وئی کیہ ڈُھونڈنا اہیا
سانبھن کجھ ہور لگی دا اے
تے کھڑاچ کجھ ہور جا ندا اے
ایہہ وی یاد نہیں رہندا
کیہ سانبھنا اہیا
تے کیہ کھڑاچ گیا اے
سدھر کسے ہور دی کری دی اے
تے لبھ کجھ ہور جا ندا اے
حیاتی کجھ ہور منگدی اے
تے اسیں کجھ ہور چاہنے آں
جو لبھ جاندا اے اوہ بھُل جانے آں
ایہہ پتہ ای نہیں رہندا
کیہ لبھا اے تے کیہ بھُل گئے آں
اُپروں چاہواں دی پنیری
جڑی بوٹیاں ہار اُگ پیندی اے
تے فیر نویں بھنبل بھُوسیاں دی
نویں انھیری جھُل پیندی اے