رضا مراد۔۔۔ بالی ووڈ دا چمکدا تارا

او دو وار پاکستان آئے تے اج وی پھجے دے پاوے، لاہوری چاہ تے پاکستان دی مہمان نوازی نوں یاد کردے نیں

حسنین مسعود

رضا مراد بالی ووڈ دے اوہ ستارے نیں جنہاں نے آپنی فلمی زندگی دا آغاز پنجابی فلماں تو کیتا تے 500توں ودھ دنیا دی 19وکھری زبانا ں وچ کم کرچکے نیں۔رضا مراد آپنی وکھری رعب دار تے سوہنی آواز دی وجہ توں بالی ووڈ وچ وکھرامقام رکھدے نیں۔رضا مراد دو وار پاکستان آئے نیں تے اوہناں نوں اج وی پھجے دے پاوے، لاہور دی چاہ تے پاکستان دی مہمان نوازی یاد اے۔جتھے وی گئے اوہناں نوں لوکاں بڑا پیار دتا تے سیوا کیتی۔رضا مراد سکول وچ کئی وار فیل ہوئے تے سکولوں کڈھے وی گئے پر اوہناں ایہہ ٹھان لیا سی کہ دنیا وچ ناں تے مقام بنانا اے۔ جس لئی اوہناں نے باقاعدہ اداکاری دی ڈگری لئی تے فیر فلمی دنیا دی وڈی انڈسٹری بالی ووڈ وچ اپنی وکھری شناخت بنائی۔رضا مراد نے دسیا کہ اوہ اینے خوش قسمت کلاکار نیں جنہاں نوں اشوک کمار ،کشور کمار،دلیپ کمار،درمندر،ونود کھنا سنے پرانے تے ہن دے سارے ستاریاں نال کم کرن دا موقع ملیا اے۔اوہ سلطان راہی دے کم توں وی واقف نیں تے اوہناں نال ملن دی خواہش وی سی پر قسمت نے موقع نہیں دتا پرپاکستان دے وڈے ناں مصطفی قریشی تے استا د غلام علی خان نال کئی وار ملاقات کرچکے نیں تے اوہناں نال بڑی دوستی وی اے۔پنجابی فلم انڈسٹری دے حوالے نال گل بات کردے ہوئے اوہناں نے دسیا کہ پنجابی فلم انڈسٹری ایس ویلے بڑی اُچے مقام تے چلی گئی اے۔ کروڑاں روپے دی فلماں بن رہیاں نیں جد کہ پہلے لکھاں وچ بندیاں سن۔ ہن کاروبار وی کروڑاں وچ کررہیاں نیں تے دنیا بھر وچ لوکی پنجابی فلماں نو ں ویکھ تے پسند کررہے نیں۔ پنجابی فلماں ایس ویلے بالی ووڈ نوں وی
ٹکر دے رہیاں نیں۔فن تے فنکار دی کوئی سرحد نئیں ہندی ۔فنکار ساریاں سے سانجھے ہندے
نیں۔رضا مراد چاہندے نیں انڈیا تے پاکستان رل فلماں بنان تے فنکار وی مل کے کم کرن جس طرح چل میرا پت وچ دوویں پنجاباں نے اکھٹا کم کیتا۔ رضا مراد پوری دنیا پھر چکے نیں پر دو وار پاکستان آکے جو پیار تے عزت ایتھے ملی اوہ ہمیشہ اوہناں نو ں یاد اے تے ہن وی جلد پاکستان آون دی خواہش اے۔فن تے فنکار کسی سرحد دے محتاج نئیں ہندے اوہناں نوں دنیا بھر توں لوکی پیار کردے نیں۔ فنکاراں نوں چاہیداں دا ہے اوہ امن محبت تے دوستی دے پیغام نوں عام کرکے دنیا نوں امن دا گہوارہ بنادیون کیوں جے فنکاراں تے کلاکاراں دی گلاں نوں لوک سنن تے منندے وی نیں۔ سب نوں اپنا حصہ پانا چاہیدا اے۔