علم و حکمت دا دروازہ

خالد مسعودخان

صورتحال انج دی اے کہ ایہدے وچ کجھ پنجابی تے سرائیکی محاورے تے ضرب الامثال یاد آ رہے نیں پر زمین نال جڑیاں زباناں دے محاوریاں دے نال مسئلہ ایہ وے کہ ہر چوتھا محاورہ اجیہا اے کہ لکھیا نہیں جا سکدا تے ایس توں وی وڈا مسئلہ ایہ وے کہ ایہ چوتھا محاورہ ای سب توں ودھ کم کردا اے۔ خیرات ونڈن بارے محاورہ وی انج دا ای اے کہ من و عن لکھیا نہیں جا سکدا تے ڈھڈ کٹ کے قابل تحریر بنائو تے ایناں بودا تے پھسپھسا رہ جاندا اے کہ لکھن نوں دل نہیں کردا۔ ہن صورتحال خراب ہوئی اے تے خان صاحب نوں شکوے شکایتاں نال بھرے ہوئے اتحادیاں نوں‘ ناراض ارکان اسمبلی نوں تے باغی دھڑیاں نوں منان دا خیال آیا اے۔ پر عالم ایہ وے کہ اوہ اپنے باغی ارکان اسمبلی دے تحفظات دور کرن دی تھاں اوہناں نوں معاف کر دین دی خوشخبری سنا رہے نیں۔ ایس صورتحال نال اک محاورہ یاد آ جاندا اے۔
اک انا پرست راجپوت نوں خیرات منگن دی مجبوری بن گئی تے آپ اک رانگڑ دے موڈھیاں تے بہہ گیا تے بازار وچ آواز لان لگ پیا کہ ’’لیا مائی کجھ سردا ای‘ نہیں تے رانگڑ بھکھا مردا ای‘‘ موڈھے تے بیٹھا ایہ اکڑ خان راجپوت جدوں رانگڑ دے بھکھے مرن دا ذکر کردا تے اپنی انگلی نال اوس رانگڑ وی اشارا کردا جہدے موڈھیاں تے موصوف بیٹھا ہویا سی۔ اپنے خان صاحب دا وی ایہو حال لگدا اے کہ جہناں نوں آپ رنج کیتا ہویا اے اوہناں نوں آپ منان دی تھاں دوجیاں نوں گھل رہے نیں۔ اوہناں دی پوری ٹیم وچ صرف اک جہانگیر ترین صاحب سن جو ایہناں ناراض ہون والیاں نوں کسے نہ کسے طرح فیر گھیر گھار کے تے بہلا پھسلا کے واپس لے آندے سن۔ ہن اوہ ناراض نیں تے پوری ٹیم وچ اک وی اجیہا بندہ نہیں جو ناراض دوستاں نوں منان دی صلاحیت رکھدا ہووے۔ آپ خان صاحب پہلے جہانگیر ترین دے جہاز تے چڑھے رہے تے ہن لگدا اے اپنی انا دے جہاز تے چڑھ گئے نیں۔ بندیاں دی پرکھ تے پچھان دا ایہ عالم اے کہ منان لئی اوہ بندے منتخب کیتے جہناں دے کول کسے رُسے نوں منان دا اک دن دا وی تجربہ نہیں پر اوہناں دے کول لوکاں نوں ناراض کرن دا وسیع تجربہ اے۔ ساڈے پیارے شاہ محمود قریشی ایہدی روشن مثال نیں۔
جیویں جیویں ایہ گل واضح ہوندی جا رہی اے کہ عدم اعتماد دے سلسلے وچ اتحادی اپوزیشن دی پوزیشن بہتر جا رہی اے ساڈے ورگیاں دا دل بیٹھدا جا رہیا اے۔ سچی گل ایہ وے کہ خان صاحب دی حکومت دی نااہلی تے نالائقی‘ اوہناں دے آل دوالے موجود لوکاں دی لٹ مار تے اوہناں دے مشیراں تے معاونین خصوصی دا جھاڑو پھیر کے غایب ہو جان والا معاملہ اپنی تھاں پرجدوں ایہ سوچدے نیں کہ ایس ملک تے فیر اوہو پرانے تجربہ کار لٹیرے مسلط ہو جان گے تے یقین کرو ہول پے جاندا اے۔ انج دی صورتحال لئی عزیزم رئوف کلاسرا اک سرائیکی محاورہ سناندا اے پر افسوس‘ ایہ محاورہ وی اوسے قبیل تے زمرے وچ آندا اے جو ضبط تحریر وچ نہیں لیائے جا سکدے۔
ایس تحریک عدم اعتماد نال نبڑن لئی حکومت دی سنجیدگی دا اندازہ تسیں ایس گل توں لا لوو کہ خان صاحب آپ جلسے کرن وچ مصروف نیں تے ارکان پنجاب اسمبلی نوں متحد رکھن تے اکٹھا کرن دی عظیم ذمہ داری جناب عثمان بزدار دے کمزور موڈھیاں تے پا دتی گئی اے۔ جو بندہ ٹی وی پروگراماں وچ کیتے جان والے سوالات پہلے توں دس دین دے باوجود اک مہمان دوست اینکر دا سامنا نہ کر سکدا ہووے اوہنوں گلے شکویاں نال بھرے ہوئے ارکان اسمبلی نوں رام کرن دی ذمہ داری دتی گئی اے۔ بزدار صاحب دا لوکاں نوں راضی کرن دا جہڑا فارمولا میں ویکھیا‘ اوہ تے ایہ وے کہ اوہناں نے تونسہ تے ڈیرہ غازی خان دے لوکاں نوں خوش کرن لئی ہر دو شہراں وچ بڑی بمبوکاٹ قسم دی سرکس دا بندوبست کیتا سی۔
ساڈے ورگے خوش فہمیاں پالن تے بہتری دا خواب ویکھن والیاں نوں سمجھ نہیں آ رہی کہ کیہ کریئے؟ اک نااہل دی متوقع رخصتی تے کیہ ایس لئی خوشی دے ڈھول وجائے جان کہ مسند اقتدار تے فیر اوہو ازمائے ہوئے کھوٹے سکے بیٹھن گے جہناں توں تنگ آ کے ایس ملک وچ تریجی سیاسی قوت دی آمد نوں سجری ہوا دا جھونکا سمجھ کے امیداں وابستہ کیتیاں سن؟ جیویں ساڈے کول ہن جو دو آپشن بچے نیں‘ ایہ کہ اسیں نااہلاں یاں بدعنواناں وچوں اک دا انتخاب کریئے‘ اوہ جہڑے عزیز رئوف کلاسر والے محاورے دی گل ہو رہی سی اوہ انج دی صورتحال دی عکاسی کردا اے‘ افسوس کہ ایہ وی اوہو والا چوتھا محاورہ اے۔
صورتحال سلجھن دی تھاں دن بدن الجھدی جا رہی اے تے میں سمجھنا واں کہ ایہدے وچ زیادہ ہتھ حکومتی ذمہ داراں دا اے جہناں نے پہلے دن توں کھچ کے رکھو‘ دب کے رکھو دی پالیسی اپنائی ہوئی اے۔ مخالفین تے زوردار چڑھائی دی حکمت عملی تے عمل پیرا خان صاحب دے مقلدین نے وی ایسے پالیسی نوں اپنایا تے حکومت وچ آن دے بعد وی مخالفین تے چڑھائی جاری رکھی۔ ایس دوران خان صاحب نے نویاں نویاں منطقاں ایجاد کیتیاں تے اپنے مخالفین نال باقاعدہ ہتھ ملان توں انکار کر دتا۔ ایس سلسلے وچ پیش کیتی گئی دلیل اینی بے تکی اے کہ سوائے حیرت دے ہور کجھ نہیں کیتا جا سکدا۔ اوہناں دا کہنا سی شہبازشریف نال ہتھ ملان دا مطلب ایہ وے کہ میں اوہناں دی کرپشن نوں قبول کر لیا اے۔ ایہ بالکل انج ای اے جیویں پوپ نال ہتھ ملان دا مطلب ایہ کڈھ لیا جاوے کہ میں عیسائیت قبول کر لئی اے۔ ولادی میر پوٹن نال ہتھ ملان دا مطلب ایہ کڈھ لیا جاوے کہ اسیں روس دے یوکرین تے حملے نوں ٹھیک من لیا اے تے مودی نال ہتھ ملا لوو تے ایہدا مطلب ایہ کڈھ لیا جاوے کہ نہ صرف میں اوہدے کشمیر دی خصوصی حیثیت ختم کرن دے اقدام نوں جائز من لیا اے سگوں پورے بھارت وچ مسلماناں دے خلاف ہون والے ظلم و بربریت نوں وی بھارت دا اندرونی معاملہ من لیا اے۔ حکمرانی دے تقاضیاں وچ پہلا تقاضا اپنی ذات توں اُتے جا کے سوچنا ہوندا اے تے ایس معاملے وچ خان صاحب نے اجیہا کوئی ثبوت نہیں دتا۔
جے اوہ پرویزالٰہی نوں صاف لفظاں وچ پنجاب دا سب توں وڈا ڈاکو قرار دین دے بعد اوہنوں پنجاب دا سپیکر بنا سکدے نیں تے سیالکوٹ دی صوبائی اسمبلی دی سیٹ پی پی 38 تے اپنے امیدوار دی کامیابی لئی اوس حلقے وچ چوہدری پرویزالٰہی دے زیر اثر ووٹاں دے حصول دی خاطر مونس الٰہی نوں وفاقی وزارت دے سکدے نیں تے شہبازشریف نال ہتھ ملان وچ کیہ حرج سی؟ جدوں مطلب ہووے تے سپیکری تے وفاقی وزارت بخش دیو تے دل نہ کرے تے ہتھ ملان توں انکار کر دیو۔ ایہ رویہ کسے سربراہ حکومت دا نہیں سگوں کسے زود رنج بچے دا ای ہو سکدا اے۔ اک دوست کہن لگا کہ جہانگیرترین نوں بہرحال ایس موقعے تے سب کجھ بھل کے خان دا ساتھ دینا چاہیدا سی میں اوس دوست توں پچھیا کہ جہانگیر ترین نے تے بجٹ دے موقعے تے حکومت دی غیرمشروط حمایت کر دتی سی جواباً پچھلے 9 مہینے وچ اوہدے نال کہڑا چنگا سلوک کیتا گیا اے؟ نرگسیت وچ مبتلا خان صاحب اپنی غیرمشروط حمایت تے اطاعت نوں اپنا حق سمجھدے نیں تے انج نہ کرن والے نوں کسے صورت معاف نہیں کردے۔ جے اوہ اپنی میں وچوں باہر نکل سکدے تے صورتحال شاید اینی خراب نہ ہوندی۔ جدوں ایہ زعم ہووے کہ تہانوں ہر گل دا پتہ اے تے تسیں سب کجھ جان دے او تے فیر تہاڈے تے بہتری‘ علم‘ آسانی تے حکمت دے سارے بوہے بند ہو جاندے نیں۔٭