نگران حکومت دا قیام کیس پاروں رُکیا ہویا اے،چھیتی نمٹانا چاہندے ہاں،چیف جسٹس

اسلام آباد(پنجابی میڈیا گروپ)سپریم کور ٹ آف پاکستا ن دے چیف جسٹس جسٹس عمر عطاء بندیال نے آکھیا اے کہ ڈپٹی اسپیکر دی رولنگ بارے کیس وچ ریمارکس دتے نیں کہ کیس چھیتی نمٹانا چاہندے ہاں،نگران حکومت دا قیام کیس پاروں رُکیا ہویا اے،آئینی شق نوں قواعد ذریعے روندا نہیں جا سکدا،اسیں فی الحال آئین تے قنون نوں ویکھ رہے ہاں،عدالت دافوکس صرف ڈپٹی اسپیکر دی رولنگ اُتے اے،سارے فریق وی ایس نقطے اُتے ای فوکس کرن جدکہ چیف جسٹس نے31مارچ دے قومی اسمبلی دے اجلاس دے منٹس سدھ دیاں ہویاں آکھیا اے کہ اسپیکر دے وکیل نعیم بخاری اجلاس دے منٹس پیش کرن۔منگل نوںچیف جسٹس پاکستان عمر عطا بندیال دی سربراہی وچ عدالت عظمی ٰدا5رکنی لارجر بینچ ایس معاملے اُتے لِتے گئے از خود نوٹس تے متعدد فریقیاں دیاں درخواستاں اُتے سماعت کیتی۔سماعت دے آغاز وچ درخواست گزاراں وچوں اک ختون نے روسٹرم اُتے آکر آکھیاکہ امریکا وچ تعینات رہن والے سفیر اسد امجید نوں بلایا جائے تے سبھ کجھ ساہمنے آ جائے گا۔چیف جسٹس نے خواتین درخواست گزاراں نوں گل کرن توں روکدیاں ہویاں آکھیا کہ سیاسی جماعتاں نوں سناں گے۔پیپلز پارٹی دے رہنما سینیٹر رضا ربانی نے دلائل دے آغاز وچ آکھیا کہ الیکشن کمیشن دا میڈیا وچ بیان آیا اے کہ3مہنیاں وچ الیکشن ممکن نہیں، کوشش اے کہ اج دلائل مکمل ہون تے مختصر فیصلہ آجائے۔چیف جسٹس نے آکھیا کہ اسیں وی چھیتی فیصلہ چاہندے ہاں لیکن سارے فریقاں دا مؤقف سن کے دیاں گے۔دوران سماعت اٹارنی جنرل نے آکھیا کہ ایہ میری زندگی دا اہم ترین کیس اے،سارے وکیلاں اج دلائل مکمل کراں تے پرسوں مینوں موقع دتا جائے، قومی اہمیت دا کیس اے،عدالت دی تفصیلی معاونت کرنا چاہندا ہاں۔جسٹس اعجازالاحسن نے آکھیا کہ ویلا گھٹ اے ۔ایس توں بعد عدالت نے سماعت اج بدھ تک ساڑھے11وجے تک ملتوی کردتی۔