عمران خان دی حکومت
احمد وقاص ریاض
کرکٹ دے میدان وچ جھنڈے گڈن دے بعد عمران خان نے سیاست دے میدان وچ قدم رکھیا تے شہرت دیاں ہور بلندیاں تے اپڑ گئے۔ برصغیر پاک و ہند وچ لوک کرکٹ تے ایس کھیڈ نال جڑے کھڈاریاں نال دیوانگی دی حد تک عقیدت رکھدے نیں ایس لئی ورلڈ کپ جتن والے کپتان لئی روایتی سیاستداناں دے مقابلے وچ کھڑا ہونا بالکل وی اوکھا نہیں سی پر سیاست دے میدان وچ کامیابی لئی اوہناں نوں تجربہ کار ٹیم دی لوڑ سی تے ایس کم لئی شروع وچ اوہناں دی معاونت تے خاکہ تیار کرن والیاں وچ حفیظ اللہ نیازی‘ محمود اعوان‘ محمد علی درانی‘ حسن نثار‘ حمید گل‘ منصورصدیقی‘ محمدناظم‘ ضیاشاہد‘ مواہدحسین‘ نسیم زہرہ‘ پرویز حسن‘ ڈاکٹر محمد فاروق‘ حامد خان تے فردوس نقوی شامل سن پر ایہناں وچوں کجھ لوک شروع وچ ای عمران خان دا ساتھ چھڈ گئے جد کہ میاں خالد‘ مظہرساہی‘ امین ذکی‘ اکرم چوہدری تے شبیرسیال ورگے پرجوش نوجوان عمران خان دے موڈھے نال موڈھا جوڑ کے جدوجہد کر رہے سن۔
لہور وچ مینار پاکستان تے ہون والے جلسے نے عمران خان نوں مستند سیاسی لیڈر بنا دتا تے فیر ورھیاں دی جدوجہد دے بعد سن 2013ء دے عام انتخابات وچ پی ٹی آئی نوں ملن والے ووٹاں نے سیاسی پنڈتاں نوں حیران کر دتا۔ پنج ورھے بعد سن 2018ء دے انتخابات وچ پاکستان تحریک انصاف نے وفاق تے دو صوبیاں وچ اکثریت حاصل کرن دے بعد عمران خان دے وزیراعظم بنن دے دیرینہ خواب نوں شرمندہ تعبیر کر دتا۔ پی ٹی آئی دی کامیابی وچ نوجواناں‘ عورتاں تے الیکٹ ایبلز دا وڈا کردار سی جو عمران خان دی متاثرکن شخصیت‘ کرپشن دے خاتمے‘ خودانحصاری تے تبدیلی دے نعرے تے دعوے سن کے اوہنوں نجات دہندہ سمجھ بیٹھے سن۔ وزارت عظمیٰ تے فائز ہون دے بعد عمران خان نے دو اکثریتی صوبیاں وچ اجہے وزرائے اعلیٰ دا چنائو کیتا جو ممبران اسمبلی‘ سیاسی کارکناں تے لوکاں وچ حیرت تے مایوسی دا کارن بنے۔ خیبرپختونخوا وچ پنج ورھے پرویزخٹک نے میرٹ‘ انصاف تے گورننس تے مبنی حکومت کیتی تے اپنی سیاسی مہارت تے تجربے نال اپوزیشن نوں اگے ودھن دا کوئی موقع نہیں دتا تے اوہناں دے ماڈل نوں ویکھدے ہوئے تحریک انصاف نہ صرف خیبرپختونخوا سگوں پورے ملک وچ کامیاب ہوئی پر انتخابات دے بعد کجھ مشیراں دے مشورے نال پرویزخٹک نوں مرکز وچ لیا کے کے پی وچ اک اجیہا وزیراعلیٰ لا دتا گیا جنہے صوبے وچ پی ٹی آئی دی مقبولیت نوں گہنا دتا تے پارٹی دے لیڈر وکھووکھ دھڑیاں وچ تقسیم ہو گئے‘ نتیجے دے طور تے بلدیاتی الیکشن وچ ایہناں جماعتاں نوں فیر قدم جمان دا موقع مل گیا جو تقریباً ختم ہو چکیاں سن۔
پنجاب وچ وزیراعظم عمران خان نے اپنے دیرینہ ساتھیاں‘ سیاسی حلیفاں تے حکومت سازی وچ مدد کرن والیاں نوں نظرانداز کردے ہوئے سائوتھ پنجاب توں اک اجہے بندے نوں وزیراعلیٰ نامزد کیتا جہدی پارٹی لئی خدمات نہ ہون دے برابر سن تے بظاہر سادہ تے درویش قسم دا نظر آن والا وزیراعلیٰ باقی پنجاب تے اک پاسے پی ٹی آئی دے مضبوط گڑھ جنوبی پنجاب وچ وی تحریک انصاف دی لیڈرشپ نوں ناقابل قبول سی۔ صوبہ پنجاب وچ بیڈگورننس‘ میرٹ دی پامالی تے مبینہ کرپشن دیاں داستاناں زبان زدعام رہیاں جہدے نال صوبے وچ پارٹی دی مقبولیت بھیڑی طرح متاثر ہوئی پر وزیراعظم اپنے وزیراعلیٰ دی کارکردگی توں پوری طرح مطمئن سن۔ عمران خان دے جانثار تے وفادار ساتھی اوہناں دا ساتھ چھڈ رہے سن۔ صوبے وچ پارٹی دھڑیاں وچ تقسیم ہو گئی سی سیاسی کارکن بددلی تے بے یقینی داشکار ہو گئے سن۔ لوک مہنگائی تے سہولتاں دی عدم دستیابی تے سراپا احتجاج سن پر وزیراعلیٰ تے اوہناں دے قریبی وزراء تے افسر اپنے معاملیاں وچ مصروف سن۔ نااہل وزیراعلیٰ دی پنجاب تے حکومت پی ٹی آئی تے عمران خان دی مقبولیت وچ کمی تے موجودہ حالات تک اپڑن دا سب توں اہم فیکٹر سی۔ ایس توں علاوہ طاقتور حلقیاں نال بلاجواز محاذارائی‘ کجھ وفاقی وزیراں تے مشیراں دی کرپشن‘ ضد تے انتقامی سیاست‘ لوکاں تے ورکراں توں دوری‘ میڈیا دے پرانے تے مخلص دوستاں توں دوری تے میڈیا مینجمنٹ وچ نکامی‘ اہم حکومتی معاملیاں وچ عدم توجہ‘ عالمی سطح تے سفارتی تنہائی تے انٹرنیشنل ڈپلومیسی وچ مکمل نکامی وی اوہ کجھ عوامل سن جہناں دی وجہ نال ملک دا مقبول ترین وزیراعظم ہن اپنے سیاسی کیریئر نوں بچان لئی بھج نس کر رہیا اے۔٭٭
