شہباز شریف اچکن نہیں پا سکن گے اسیں کدھرےنہیں جارہے، وزیراعظم

اسلام آباد(پنجابی میڈیا گروپ) وزیراعظم عمران خان نے آکھیا اے کہ شہباز شریف اچکن نہیں پاسکن گیاسیں کتے نہیں جارہے ، استعفے دین دا مطلب سازش کامیاب بنان دے مترادف ہوویگا، میں کسے صورت حکومت ڈیگن دی سازش کامیاب نہیں ہون دیاں گا۔وزیراعظم عمران خان دی زیر صدارت سیاسی کمیٹی دا اجلاس منعقد ہویا جہدے وچ موجودہ سیاسی صورتحال تے مشاورت کیتی گئی۔ تحریک انصاف نے عوامی رابطہ مہم تیز کرن دا فیصلہ کردیاں ہویاں پاکستان دے تمام اضلاع وچ جلسے کرن تے عوام نوں حکومت دے خلاف سازش بارے اعتماد وچ لین دا فیصلہ کیتا۔اجلاس وچ خط وچ مبینہ سازش نوں پبلک کرن یا نہ کرن بارے تجاویز لیاں گئیاں۔ اراکین نے خط دی رازداری تے عدالتی حکم دی روشنی وچ تجاویز دتیاں۔اپوزیشن عوام وچ جان توں گھبرا گئی تے اسیں عوام وچ سرخرو ہو ئے وزیراعظم نے آکھیا کہ اپوزیشن دے بیرونی سازش دا آلہ کار بنن والے بے نقاب ہوچکے نیں، منتخب حکومت نوں ڈیگن لئی بیرونی سازش کیتی گئی، عوام نے ویکھ لیا کہ سب چور ڈاکو اک جگہ اکٹھے ہوگئے، اپوزیشن عوام وچ جان توں گھبرا گئی اے، اسیں عوام وچ سرخرو ہوئے ہاں، ایہناں دا ہر سطح تے مقابلہ کراں گا۔ایس توںپہلاں وزیراعظم عمران خان دی زیر صدارت پارلیمانی پارٹی دا وی اجلاس منعقد ہویا جہدے وچ وزیراعظم نے موجودہ صورتحال تے پارلیمانی پارٹی نوں اعتماد وچ لیا۔ پی ٹی آئی ارکان نے وزیراعظم دے فیصلیاں تے اعتماد دا اظہار کیتا تے آکھیا کہ وزیراعظم جہڑا حکم کرن گے اسیں تہاڈے نال آں ۔وسیلیاں موجب ارکان پارلیمنٹ نے وزیراعظم نال موجودہ صورتحال وچ آپشنز تے سوالات کیتے جہدے تے عمران خان نیآکھیا کہ میری گل سنو ، شہباز شریف اچکن نہیں پا سکن گے ، اسیں کتے نہیں جارہے ، تسی ویکھدے جائو ، استعفے دین دا مطلب سازش کامیاب بنان دے مترادف ہوویگا، میں کسے صورت سرکار ڈیگن دی سازش کامیاب نہیں ہون دیاں گا۔وزیراعظم نے اپنے ارکان نوں ہدایت دتی کہ تسی لوک حلقیاں وچ جائو ، اپنے لوکاں نوں ایس سازش توں آگاہ کرو، ایہ سارے مل کر وی سانوں نہیں روک سکدے کیوں کہ قوم ساڈے نال اے۔