پاکستان تحریک انصاف دا قومی اسمبلی توں استعفی دین دا اعلان

اسلام آباد(پنجابی میڈیا گروپ)پاکستان تحریک انصاف(پی ٹی آئی)نے قومی اسمبلی توں مستعفی ہون دا اعلان کر دتا اے۔پی ٹی آئی دے رہنما تے سابق وفاقی وزیر اطلاعات و نشریات فواد چودھری نے شیخ رشید تے فرخ حبیب دے ہمراہ میڈیا نال گل بات کردیاں ہویاں کتیاں کہ ساڈے سارے اراکان قومی اسمبلی توں استعفی دے رہے ہاں،شاہ محمود نوں امیدوار نامزد کرن دا مقصد شہباز شریف نوں چیلنج کرنا اے۔پی ٹی آئی رہنما دا ہور کہنا سی کہ تحریک انصاف دی سینٹرل ایگزیکٹو کمیٹی نے پورے ملک وچ احتجاج دی اپیل کیتی اے،کارکنان تے عوام ہر ضلع وچ عشا دی نماز توں بعد باہر نکلن،کور کمیٹی نے اسمبلیاں توں مستعفی ہون دا فیصلہ کیتااے،پہلے مرحلے وچ قومی اسمبلی توں استعفے دیں گے،پوری قوم عمران خان توں رہنمائی دی توقع رکھدی اے،اگر اوہناں دا فیصلہ اے شہبازشریف نوں وزیراعظم بنانا تے ساڈا فیصلہ اے کہ مستعفی ہونا۔فواد چودھری دا ہور کہنا سی کہ کور کمیٹی نے عمران خان نوں ڈٹ کے مقابلہ کرن اُتے خراج تحسین پیش کیتا اے،نویں الیکشن دے علاوہ موجود بحران دا کوئی حل نہیں،جد تک اسیں اوہناں نوں ایوان توں چُک کے باہر نہیں سُٹاں گے پاکستان وچ ناپاک حکومت قائم رہے گی، کل جس طرح12وجے عدلیہ کھلی اوس نال ساڈی عدلیہ دی رینکنگ ہور تھلے وی چلی جائے تے فرق نہیں پئے گا،پوری قوم توقع کردی اے کہ عمران خان ایس غیر ملکی سازش دے خلاف سڑکاں اُتے نکلن گے۔ سابق وفاقی وزیر داخلہ شیخ رشید نے آکھیا کہ قومی اسمبلی توں مستعفی ہون جا رہیے ہاں،اسیں سارے ارکان قومی اسمبلی توں استعفی دیاں گے،چور،ڈاکوواں نال نہیں بیٹھ سکدے۔سابق وزیر مملکت برائے اطلاعات و نشریات فرخ حبیب نے آکھیا کہ پاکستان دا ہر فرد سوچ رہیا اے کہ کیا ٹی ٹی کیس اُتے وی راتاں نوں عدالتاں کھلن گیاں،آصف علی زرداری اُتے پاپڑ والے،فالودے والیاں دے کیس نیں،عوام فیصلہ کر بیٹھے ہاں کہ عمران خان دی قیادت وچ غلامانہ سوچ دے خلاف جدوجہد کراں گے۔

اپنا تبصرہ گھلو