پنجابی ادب دے سب توں وَڈے پر سکار ڈھاہاں ایوارڈ دے بانی دے اعزازا وچ اِکٹھ
آفاق بٹ
کینیڈا وَسدے اِک سردار د اپنی ماں بولی نال محبت اپنے پنڈ نال پیار دا اظہار۔ جس نے پنجابی فکشن نوں زمین تو ں چُک کے اسمان اتے پہنچا دِتا۔ پنجابی وچ شاعر ی دا سلسلہ تے ہزاراں سالاں توں جاری اے۔ پر پنجابی فِکشن شاعری دے مقابلے وچ نا ہون دے برابر اے۔ گُرمکھی وچ تے فکشن فیر وی تخلیق ہو رہی سی۔ پر شاہ مُکھی وچ ایہہ بہت گھٹ سی۔ ڈھاہاں ایوارڈ دے شروع ہون نال پنجابی فکشن دی تخلیق وچ کئی گنا ودھا دِ س رہیا اے۔
2014 وچ ڈھاہاں ایوارڈ شروع ہویا سی۔ کینیڈا وَسدے برجندر سنگھ ڈھاہاں جو برج ڈھاہاں دے نام توں مشہور نیں اوہناں پنجابی زبان دے ودھا لئی ایوارڈ شروع کیتا تے ایس دا نام رکھن واسطے اپنے گھر دے کسے بندے دا نام نہیں سوچیا ۔ اوہناں اپنے پنڈ دے نام اتے ایوارڈ دا نام رکھیا۔ برج ڈھاہاں دا پنڈ چڑھدے پنجاب دے مشہور ضلع جلندر دے پنڈ دے نام اتے رکھیا۔
ڈھاہاں ایوارڈ وچ پہلا انعام 25 ہزار ڈالر تے دُجے دو انعام دس دس ہزار ڈالر دے ہُندے نیں۔ ہر سال درجناں کتاباں ایوارڈ واسطے کینیڈا پہنچدیاں نیں جس واسطے برج ڈھاہاں دی نِکی بہن ہرندر کور پورا سال لکھاریاں نوں شرطاں بارے دَسدیاں رہندیاں نیں تے باقاعدہ جیوری قائم کیتی جاندی اے۔ جو 3 مراحل توں بعد جتویں کتا ب دا اعلان کردی اے۔ ایس سال پہلی شاہ مکھی کتاب نے پہلا انعام جتیا۔ پہلے ہر سال دُوجا انعام تے شاہ مکھی کتاباں جت دیاں سی پر ایہہ پہلا سال اے کہ پہلا انعام وی شاہ مُکھی کتاب نے جتیا۔
ڈھاہاں ایوارڈ دی سراہنا واسطے تقریب لہور وچ ہوئی جس وچ برج ڈھاہاں نے اُچیچی رَلت کیتی۔ تقریب وچ ایس سال ایوارڈ جتن والے خالد محمود المعروف نین سکھ وی موجود سی تے پچھلے ورہیاں وچ ایوارڈ جتن والے وی تقریب وچ موجود سی۔ بزرگ پنجابی شاعر بابا نجمی، چیئرمین پنجابی میڈیا گروپ مدثر اقبال بٹ، سیکرٹری پنجابی ادبی بورڈپروین ملک، پروفیسر محمد زبیر، نذیر جوئیہ، ایڈیٹر روزوار پنجابی زبان میاں آصف علی، معروف قانون دان عابد ساقی، دیپ سعیدہ، احمد اقبال بزمی، اقبال قیصر، احمد رضا وٹو، طاہر سندھو ایڈووکیٹ، اصغر رحمانی، وارث گگوی تے ہور پنجابی سیوکاں وی رَلت کیتی۔
سب پنجابی سیوکاں دی متفقہ رائے سی کہ ڈھاہاں ایوارڈ نے پنجابی فکشن وچ انقلاب برپا کر دِتا اے۔ ایہہ ایوارڈ اوہ دیوا ثابت ہویا اے جو پنجابی کہانی تے ناول دنیا دے سامنے لے آیا اے تے برج ڈھاہاں دی ایہہ آس وی پوری ہوئے گی کہ انعام یافتہ کتاباں پنجابی دیاں کلاسک کتابا ں بنن گِیاں۔
