رمضان مبارک اور مہنگائی کا طوفان

عقیل خان

اللہ پاک دا لکھ لکھ شکر اے کہ ساڈی زندگیاں وچ اک واری فیر رحمتاں تے برکتاں دا مہینہ جو سارے مہینیاں دا سردار اے سایہ فگن اے۔ رمضان جو نیکیاں دا موسم بہار اے تے اک نیکی دے بدلے اللہ پاک ایہدا اجر ستر گنا ودھا کے دیندا اے۔ رمضان قرآن دا مہینہ اے تے ایس عظیم الشان کتاب دا نزول ہویا جنہے دنیا وچ اک انقلاب برپا کیتا۔ ایس بابرکت مہینے دی 27ویں شب نوں مدینے دے بعد دوجی اسلامی ریاست وجود وچ آئی۔ پاکستان جو ماہ رمضان المبارک وچ اسلام دے ناں تے وجود وچ آیا تے قرآن و سنت دے عملی نظام دے نفاذ دا اللہ نال عہد کیتا گیا سی۔ دنیا بھر وچ رہن والے مسلمان ملکاں نہ صرف رمضان دا احترام تے پربندھ کردے نیں سگوں غیرمسلم ملک وی ایس ماہ مقدس دے احترام وچ کھان پین والیاں شیواں دیاں قیمتاں وچ کمی کر دیندے نیں۔ خاص کر رمضان ڈسکائونٹ پیکیج متعارف کروائے جاندے نیں۔ مسلم بھراواں لئی وڈے وڈے افطار دسترخوان سجائے جاندے نیں پر بدقسمتی نال عالم اسلام دی واحد ایٹمی قوت تے اسلام دے ناں تے بنن والی مملکت خداداد پاکستان وچ رمضان ورگے بابرکت تے رحمت دے مہینے نوں باعث زحمت بنا دتا جاندا اے۔ رمضان المبارک دے مہینے وچ اللہ تعالیٰ شیطان نوں قید کر دیندے نیں پر شیطان دے چیلے سرگرم ہو جاندے نیں۔ کسے نوں کوئی ڈر تے خوف ن ہیں ہوندا۔ علماء کرام نوں چاہیدا اے کہ اوہ لوکاں نوں ایہ گل دسن کہ نیکیاں دے اجر دے نال ماہ رمضان وچ منافع خوری تے ذخیرہ اندوزی‘ ملاوٹ دا وی 70گنا ودھ کے گناہ ملدا اے تے منافع خوراں دا انجام جہنم ہووے گا۔ رمضان دیاں برکتاں نوں سمیٹن لئی اسیں ساریاں نے غلط راہ اختیار کیتا ہویا اے تے لوک رمضان نوں سیزن دا ناں دے کے لٹ مار دا بازار قائم کردے نیں۔
ساڈے ایتھے رمضان دی آمد دے نال ای لوکاں وچ چنتا دی لہر دوڑ جاندی اے۔ اوہناں نوں پتہ ہوندا اے کہ حکومت لکھ دعوے کرے پر کھان پین والیاں شیواں دیاں قیمتاں رمضان المبارک دے شروع ہوندیاں ای اسمان تے اپڑ جان گئیاں۔ یوٹیلیٹی سٹور تک بڑے گھٹ لوکاں دی پہنچ ہوندی اے اوہ روزے دی حالت وچ لمیاں لمیاں قطاراں وچ کھڑے رہندے نیں تے آخر وچ پتہ لگدا اے کہ اوہناں دی مطلوبہ شے ختم ہو گئی اے۔ ایتھے ملن والیاں شیواں بڑیاں غیرمعیاری ہوندیاں نیں۔ ایس لئی عام بندہ گراں فروشاں دے رحم کرم تے رہندا اے جو من مرضی دے مُل تے شیواں ویچدے تے منافع کماندے نیں۔ حکومت رمضان بازاراں دے ناں توں لوکاں لئی سہولت دین دے اعلانات کردی اے پر افسوس کہ ایس بابرکت مہینے وچ وی لوکاں دے نال ہتھ ہو جاندا اے جو شیواں رمضان بازاراں وچ ریلیف دے ناں ویچیاں جاندیاں نیں اوہناں دا معیار ایناں گھٹیا ہوندا اے کہ بندہ اوہناں نوں خریدنا وی پسند نہیں کردا۔
پچھلے ورھے میں رمضان بازار دا وزٹ کردے ہوئے بغور مشاہدہ کیتا کہ آٹے وانگوں چینی سستے مُل ویچی جا رہی سی جو چینی ایس توں موٹی سی اوہ دو کلو دا پیکٹ شناختی کارڈ تے دتا جا رہیا سی۔ کھجوراں دا معیار ایناں برا کہ کوئی ویکھنا پسند نہیں سی کردا۔ اسیں کنے بدقسمت آں کہ رمضان ورگے مقدس مہینے وچ وی اپنے رب دیاں رحمتاں نوں سمیٹن دی تھاں اوہدے عذاب نوں دعوت دے رہے آں۔ سیزن دا ناں دے کے روزہ داراں نوں لٹ کے ایہ کناں خوش ہوندے نیں؟ ایہناں منافع خوراں وچ بہت سارے اپنے ناں دے نال الحاج تے حاجی لکھوا کے کناں فخر محسوس کردے نیں پر اوہ ایہ بھل رہے نیں کہ دنیا فانی اے سب کجھ ایدھر ای رہ جاوے گا جے کجھ جاوے گا تے اوہ اوہدے اعمال نیں۔ رمضان دے بابرکت مہینے وچ سانوں چاہیدا اے کہ غریباں دا خاص خیال رکھیے۔ سحر توں افطار تک اپنے آل دوالے نظر رکھیے کہ کوئی مسلمان روزے توں نہ رہ جاوے۔ ایس مہینے دی قدر کرو‘ ایہنوں غنیمت جانو‘ ذرا اپنے آل دوالے نظر مارو کنے ای لوک اجہے سن جو پچھلے رمضان تے ساڈے نال سن پر ہن نہیں۔ آئو عہد کریئے‘ ایس رمضان وچ اسیں خوب رحمتاں تے برکتاں سمیٹن دے نال نال مخلوق خدا لئی آسانیاں پیدا کراں گے۔٭٭