اسیں کدوں سوچنے آں؟

طلعت عباس خان

اک چوہا کسان دے گھر وچ کھڈ بنا کے رہندا سی۔ اک دن کسان تے اوہدی بیوی بازاروں سودا سلف لے کے آئے۔ چوہا سمجھیا ایہ کھان پین دیاں چیزاں ہون گئیاں پر جدوں کسان نے تھیلے چوں کڑکی کڈھی تے چوہا ویکھ کے پریشان ہویا تتے کھڈ چوں نکل کے کبوتر دے کول گیا۔ اوہنوں دسیا کہ کسان کڑکی لے آیا اے۔ کبوتر نے قہقہہ لا کے کہیا مینوں کیوں دس رہیا ایں۔ ایہ تے تیرے لئی اے۔ مینوں ایہدے نال کیہ؟ چوہا جلدی نال ککڑ کول گیا اوہنوں دسیا‘ اوہنے سن کے وی اوہدا مذاق اڑایا۔ اوہ بکرے کول گیا‘ اوہنوں دسیا کہ کسان گھر وچ کڑکی لیایا اے۔ بکرے نے سن کے کہیا چوہے ایہ تینوں پھڑے گا تے مارے گا مینوں ایہدے نال کیہ؟ چوہا واپس اپنی کھڈ وچ وڑ کے رات بھر جاگدا رہیا۔ آخری پہر کڑکی چوں کھٹاک دی آواز آئی جتھے اک سپ دی پوشل پھس چکی سی۔ کسان دی بیوی آواز سن کے کڑکی دے نیڑے آئی انھیرے وچ سپ نے اوہنوں ڈنگ لیا۔ کسان بیوی نوں لے کے حکیم کول گیا۔ طبیب نے کبوتر دا سوپ پین نوں کہیا ایس لئی کبوتر دا سوپ بنایا تے پلایا گیا۔ ایہ خبر سن کے رشتے دار کسان دے گھر اپڑ گئے۔ اوہناں دے کھان پین دا انتظام کرن لئی کسان نے ککڑ نوں کوہیا۔ کجھ ای دیہاڑیاں بعد کسان دی بیوی فوت ہو گئی جہدے جنازے تے آن والیاں لئی کسان نے بکرے نوں کوہیا۔ ایہ سارا منظر چوہا ویکھدا رہیا۔ کہندا رہیا کاش ایہ میری گل غور نال سن دے تے ایہ سارے زندہ ہوندے۔ ایہناں ساریاں نے میرا مذاق اڑایا سی ایس لئی ایہ سب رخصت ہو چکے نیں۔
سانوں ایہ واقعہ بابا کرمو نے سنایا تے کہیا جے ساڈے حکمران قیام پاکستان دے بعد دے واقعات نوں ویکھدے رہندے تے اج ایہ حالات نہ ہوندے۔ بانی پاکستان قائداعظم دے نال جو سلوک آخری دیہاڑیاں وچ ہویا اوہدے تے ای سوچ وچار کردے تے ایہ سلسلہ رک جاندا پر ایہ سلسلہ جاری رہیا۔ وزیراعظم لیاقت علی خان وی ایسے پالیسی دا شکار ہوئے فیر وی نہ سوچیا گیا۔ ایوب خان نوں لیاندا گیا‘ فیر مادر ملت نوں الیکشن وچ ہروایا گیا۔ ذوالفقارعلی بھٹو شہید جنہے ایس ملک نوں ایٹمی قوت بنان دی بنیاد رکھی اوہناں نوں کس طرح منظر توں ہٹایا گیا۔ ضیاء الحق اقتدار وچ کیویں آئے۔ جے ضیاء دے حادثے تے ای نشانہ بنان والیاں تک اپڑ جاندے تے ایہ سلسلہ رک جاندا پر انج نہیں ہویا۔ فیر بینظیر بھٹو نوں شہید کیتا گیا۔ ایہدے تے وی کوئی وچ وچار نہیں ہوئی ایس لئی ایہ سلسلہ جاری رہیا۔ وزیراعظم نوازشریف نوں کس طرح گھر گھلیا گیا اوہ وی سارے جان دے نیں۔ اوہناں نوں اقتدار چوں کڈھیا گیا سی ایہدے تے سوچ وچار کر لئی جاندی تے ایہ سلسلہ رک جاندا جس انداز نال عمران خان سیاست وچ آئے اوہ وی ساریاں نوں پتہ اے۔ اج دا ڈیجیٹل دور کسے توں لکیا چھپیا نہیں۔ اوہناں نوں اقتدار وچ لیان لئی تن کم کیتے گئے اک ریٹائرمنٹ دے بعد دوبارہ کرکٹ ٹیم دا کپتان بنایا گیا‘ ورلڈکپ دوجا شوکت خانم ہسپتال بنوایا گیا تے شادیاں؟ جس راہ توں ایہ سیاست تے اقتدار وچ آئے اوہ ساریاں دے سامنے اے۔ ہن جدوں اوہناں دے جان دا ویلا آیا اے تے صبح شام قوم نال خطاب کرن لگ پئے نیں۔ کہیا جے مینوں اعتماد دا ووٹ نہیں ملدا تے فیر وی اقتدار وچ بیٹھا رہواں گا۔ لگدا ای نہیں کہ ایہ کدی کھڈاری وی رہیا اے کیوں جے کھڈاری تے دل دے وڈے ہوندے نیں۔ ہار جت نال اوہناں نوں کوئی فرق نہیں پیندا۔
یکم رمضان اسمبلی وچ عدم اعتماد دی ووٹنگ ہون لئی اجلاس سی جہنوں غیرقنونی غیرآئینی بنا کے غلط رولنگ دلوائی تے ڈپٹی سپیکر نے غیرذمہ دارانہ کردار ادا کردے ہوئے عدم اعتماد رد کیتی۔ ایہدے چھیتی مگروں عمران خان نے بطور وزیراعظم خطاب کیتا تے اسمبلی نوں ختم کرن دی تجویز دتی جہدے تے عمل کران وچ صدر عارف علوی نے دیر نہ لائی۔ ملک نوں آئینی بحران وچ دھکیا جا رہیا اے۔ ایس صورتحال دی انکوائری اداریاں نے کرنی اے۔ ایہ صاحب لوکاں نوں انج تے یورپ تے مغرب دیاں مثالاں دین توں نہیں سن تھکدے اوتھے جے کسے دے خلاف ووٹ آف نو کنفیڈنس لیائی جاندی اے تے اوہ آپ ای استعفیٰ دے کے گھر ٹر جاندا اے۔ اسیں کہنے آں کہ خان صاحب گھبرانا نہیں‘ کھڈاری او حوصلہ رکھو جو آوے اوہ جاوے گا۔
کس کا یقین کیجئے کس نہ کیجئے
آئی ہیں بزم ناز سے خبریں الگ الگ