حکم امتناع ختم ہوندیاں ای اسحاق ڈار دی رہائشگاہ نوں دوبارہ پناہ گاہ وچ تبدیل کر دتا جاوے گا: فیاض چوہان

لہور: پنجاب دے وزیر اطلاعات فیاض الحسن چوہان آکھیا اے حکم امتناع ختم ہوندیاں ای اسحاق ڈار دی رہائش گاہ نوں دوبارہ پناہ گاہ وچ تبدیل کر دتا جاوے گا۔ تفصیل دے مطابق اسحاق ڈار دے گھر نوں پناہ گاہ وچ تبدیل کرن دے معاملے تے سرکار تے اپوزیشن آمنے ساہمنے آ گئے نیں۔

پنجاب دے وزیر اطلاعات فیاض الحسن چوہان دا اسحاق ڈار دی رہائش گاہ دے باہر پریس کانفرنس کردیاں کہنا سی عدالت دا حکم امتناعی ختم ہووے گا تے دوبارہ ایتھے پناہ گاہ بنا دیواں گے۔ اوہناں آکھیا اپوزیشن دے ڈھڈ وچ پیڑ اٹھی اے۔

شہباز شریف تے آصف زرداری نوں اپنے گھر وچ پناہ گاہواں وچ تبدیل ہوندیاں نظر آ رہے نیں۔ وزیر اطلاعات دی پریس کانفرنس ختم ہوندیاں ای پارک نوں پناہ گاہ بنان تے مقامی مکیناں نے احتجاج کیتا۔ مظاہرین نے آکھیا ایہ پارک اے جو عورتاں تے بالاں لئی مخصوص اے۔

اودھر لیگی رہنما وی اسحاق ڈار دی رہائش گاہ اپڑے تے حکومت دے خلاف پھٹ پئے۔ عظمیٰ بخاری تے عطا تارڑ آکھیا اسیں وی زمان پارک جا کے تماشا لا سکنے آں پر اسیں سیاسی مخالفاں دے گھراں تک نہیں جانا چاہندے۔

اپنا تبصرہ گھلو