تھوڑا جناں دُکھ تے تبدیلی

سعد اللہ شاہ

اپنا مزاج کار بدلنے نہیں دیا
دل نے کوئی نظام بھی چلنے نہیں دیا
گردش میں ہم رہے ہیں تو اپنا قصور کیا
تونے ہمیں کشش سے نکلنے نہیں دیا
میں جان بجھ کے ہلکی پھلکی تمہید بنھی اے کہ تہانوں ناگوار وی نہ گزرے اصل وچ مینوں عمران خان دے جان دا دکھ اے کہ اسیں اوہناں نوں کامیاب ویکھنا چاہندے سی لکھن والے کجھ وی لکھدے رہن کہ اوہ شیکسپیئر دی ٹریجڈیز وچوں کسے ہیرو وانگوں اے کہ کدھرے نہ کدھرے کوئی خلاء رہ جاندا اے جو اوہدی نکامی دا کارن بن دا اے۔ ایہ اک کتابی گل اے لکھن والے لکھدے سن کہ عمران جے چاہے گا وی تے بددیانتی نہیں کر سکے گا اسیں اوہدے تے انھے واہ اعتماد کیتا سی۔ فیر اوہ کیہ محرکات سن جہناںنے اوہناں نوں اپنیاں راہواں تے نہ چلن دتا اوہدے وزیراعظم بنن وچ وی جو کجھ ہویا دہران دی لوڑ نہیں پر ایہدے نال محبت کرن والیاں نے اکھاں بند کر لئیاں کہ طاقت دا راہ صرف ایہو اے تے یقین سی کہ اوہ آ کے ساریاں نوں سدھا کر دیوے گا۔ ایہو بنیادی غلطی ہوئی کہ کسے نوں ہتھ پھڑا دتا۔ اجے اوہنوں کجھ ہور جستجو کرنی سی اجے اوہنوں کشٹ کٹنا سی۔ وزارت عظمیٰ نوں منزل بنا لیا جد کہ لوک تے اوہنوں لیڈر تے ہیرو ویکھنا چاہندے سن اوہدی بیڑی وچ اودوں ای پتھر رکھ دتے گئے سن فیر اوہو کم شروع ہو گیا جو ہوندا آیا سی۔ فیر فیصلے پتہ نہیں خان صاحب نے کہدے زیراثر کیتے ایہدے کئی مضمرات سن جہنوں خان صاحب سمجھ ای نہیں سکے۔ چاہیدا تے ایہ سی کہ پاکستان دے سب توں وڈے صوبے نوں اوہدی حیثیت دے مطابق دھیان دیندے تے ایس تاثر نوں ختم کردے جو شہبازشریف نے نمائشی کم کرکے بنایا سی۔ اک تے پنجاب دے لوکاں دے دلاں وچ بے دلی پیدا ہوئی کہ شہبازشریف ورگے بندے دے مقابل اک مسکین جہی شخصیت متعارف کروا دتی گئی دوجی تھاں علیم خاں‘ چوہدری سرور تے انج دے ای دوجے جانثار نظرانداز کر دتے گئے۔ ایس توں وی ودھ ایہ کہ عثمان بزدار اک ڈمی ثابت ہوئے اک لہور نوں ای لے لوو کہ شہر وچ گندگی دے ڈھیر لگ گئے تے فیر خان صاحب نے سائیں جی نوں وسیم پلس کہہ کے پھٹاں تے لون سٹ دتا‘ کوئی ذی شعور ہووے گا کہ جنہے دہائی نہ دتی ہووے کہ پنجاب تے رحم کھائو پر خان صاحب نے کہیا کہ بزدار کدھرے نہیں جاوے گا تے واقعی اوہ اوہناں نوں نال لے کے ای گیا۔
فیر جس انداز وچ اوہناں نے چینی‘ آ ٹا‘ دوائیاں تے دوجے معاملیاں وچ لٹن والیاں توں چشم پوشی کیتی اوہ اوہناں نوں ہلکا کر گئی۔ ایہدے بعد اوہناں دا احتساب دا بیانیہ بری طرح پٹ گیا کہ ایہدے وچ انتقام نظر آن لگ پیا۔ نااہل لوکاں دا انتخاب کہ اوہناں نے کناں نقصان کیتا‘ آن والے دسن گے۔ جے ایہ کہیا جاوے کہ خان صاحب نے اپنے ہر دعوے دا الٹ کیتا تے غلط نہیں ہووے گا۔ کہندے ہوئے چنگا نہیں لگدا پر ایہ سچ اے کہ اوہناں نوں اقتدار دی ہوس حد توں ودھ گئی کہ اوہناں دے ترلے منتاں وی کرنیاں پیاں کہ جہناں دے ظلم خلاف کھڑے ہوئے سی تے اسیں اوہناں دے ہو گئے سی‘ ہور تے ہور عامر لیاقت ورگے نوں وی اوہناں نے ملاقات لئی سد لیا۔ کیویں کیویں دے لوک اوہناں نوں تحفے وچ ملے۔ ہن کجھ لوک رینجر دی سکیورٹی منگ رہے نیں۔ بس دل وچ اک حسرت رہ گئی کہ جو وی ہویا پر خان صاحب اک باوقار انداز وچ رخصت نہ ہو سکے۔ اوہ چپ چاپ اپوزیشن وچ آ کے بیٹھدے تے لوک اوہناں نوں سراہندے پر اوہ اپوزیشن دا تصور ای نہیں رکھدے۔ اوہناں دی انا آڑے آندی اے ہن تے اوہ وی یقینا بڑی زخمی ہوئی۔ اوہناں دے حکومتی فلسفے وچ وی تے کوئی حکمت نہیں سی کہ اوہ اپوزیشن نوں ویکھن دے روادار نہیں سن تے اوہ قوم نوں ہرگز باور نہیں کروا سکے کہ مدمقابل سارے چور تے ڈاکو نیں اوہناں دے خلاف کوئی ثبوت پیش نہ کر سکے تے سارے اک اک کرکے بری ہوندے گئے۔ نیب وی بری طرح نکام ہویا شاید لوک سب کجھ قبول کر لیندے جے خان صاحب کجھ کارکردگی ای وکھا دیندے۔ ملک بدحال ہو گیا‘ مہنگائی نے لوکاں دا لک بھن دتا۔ بیروزگاری تے لاقانونیت ودھ ئی‘ آخر ایہ وی کھلیا کہ پنجاب وچ سرکاری عہدے کروڑاں وچ وکدے رہے۔ اجے تے ثابت ہووے گا کہ وسیم پلس نے کجھ پلس کیتا تے اک خاتون دا ناں ہر پاسے گونج رہیا اے۔ ہن خان صاحب بنی گالا منتقل ہو گئے نیں تے سنیا اے کہ اوہ ہر ہفتے جلسہ کرن گے۔ ساڈی سمجھ وچ تے کجھ نہیں آندا کہ اوہ جلسیاں وچ کیہ کہن گے۔ اوہناں نوں کجھ آرام کرکے اپنے آپ نوں اکٹھا کرنا چاہیدا اے۔ اجے تے اصل منظر کھلے گا۔ ہن ویکھنے آں کہ فواد چوہدری‘ سعدرفیق دے نال خوش کلامی کر رہے سی دیکھو کون کتھے کتھے سماندا اے۔ سب توں چنگی گل شہبازشریف نے کیتی کہ اوہ ماضی دیاں تلخیاں وچ نہیں جان گے پر شہبازشریف تے بہت وڈی ذمہ داری اے کہ لوکاں لئی اوہ ہوا دا جھونکا ثابت ہون۔ انج تے پوری اپوزیشن اک امتحان وچ ہووے گی کہ اوہ حالات نوں بہتر کیویں بناندے نیں جو وی ہووے اللہ کرے ملک و قوم لئی بہتر ہووے۔ چلو بلاول ایسے طرح مسکراندا رہوے۔ آخر وچ محمد عباس مرزا دا اک بیت:
اک ویلے میں اکو ساہ ای لے سکنا
ویسے ایس توں بہتی مینوں لوڑ وی نہیں