فارمیشن کمانڈرز کانفرنس،پاک فوج نوں بدنام کرن دی پروپیگنڈا مہم دانوٹس
پنڈی( پنجابی میڈیا گروپ)آرمی چیف جنرل قمر جاوید باجوہ دی زیرصدارت فارمیشنز کمانڈرز کانفرنس داانعقاد ہویا،فورم دا آئین تے قنون دی حکمرانی برقرار رکھن لئی قیادت اُتے مکمل اعتماد دااظہار،کجھ حلقیاں ولوں پاک فوج نوں بدنام کرن دی حالیہ پروپیگنڈا مہم دا وی نوٹس لیا گیا۔پاک فوج دے شعبہ تعلقات عامہ(آئی ایس پی آر)دے مطابق آرمی چیف دی زیرصدارت فارمیشنز کمانڈرز کانفرنس وچ سارے کورکمانڈراں،اسٹاف آفسراں، فارمیشنز کمانڈراں رَلت کیتی۔فارمیشنز کمانڈرز کانفرنس وچ رَلتیاں نوں پیشہ ورانہ امور،قومی سلامتی نوں درپیش خطریاں توں نمٹن لئی کیتے جان والے اقداماں اُتے بریفنگ دتی گئی،آرمی چیف نے اُبھرتے ہوئے چیلنجاں توں نمٹن لئی فارمیشنز دی آپریشنل تیاریاں اُتے اطمینان دا اظہار کیتا۔آئی ایس پی آر دے مطابق فورم نے سرحداں تے عوام دی حفاظت نوں یقینی بنان لئی افسراں تے جواناں دیاں عظیم قربانیاں نوں خراج تحسین پیش کیتا۔آئی ایس پی آر ولوں دسا گیا کہ پاک فوج اپنی ذمہ داریاں توں آگاہ اے،پاک فوج ساریاں اندرونی تے بیرونی خطریاں دا دفاع جاری رکھے گی، پاکستان دی علاقائی سالمیت تے خودمختاری دا دفاع کیتا جائے گا،ملکی سلامتی سبھ توں مقدس اے،پاک فوج ایس دی حفاظت لئی ہمیشہ ریاستی اداریاں دے نال کھڑی رہے گی جدکہ فورم دے رَلتیاں نے عسکری قیادت اُتے مکمل اطمینان دا اظہار وی کیتا۔کانفرنس وچ فورم دے رَلتیاں نے ہر قیمت اُتے آئین تے قنون دی حکمرانی نوں برقرار رکھن لئی قیادتدے قابل غور موقف،عسکری قیادت دے آئین تے رول آف لا دے حوالے نال موقف اُتے بھرپور تے مکمل اعتماد دا اظہار کیتا۔آئی ایس پی آر دے مطابق کجھ حلقیاں ولوں پاک فوج نوں بدنام کرن،ادارے تے معاشرے دے درمیان تفریق پیدا کرن دی حالیہ پروپیگنڈا مہم دانوٹس لیا گیا تے واضح پیغام دتا گیا کہ فارمیشنز کمانڈرز کانفرنس پوری فوج دی آواز اے،پوری فوج آئین تے قنون اُتے عمل پیرا اے، اسیں پروپیگنڈا مہم چلان والیاں تک اپڑ گئے ہاں،جو وی ہو جائے فوج قومی سلامتی اُتے کدی کمپرومائز نہیں کرے گی۔
