میں توں شروع ، میں تے ختم
عتیق انور راجہ
ہُن عمران خان دا اقتدار ختم ہو چکیا اے۔ پاکستانیاں نے بہت مان نال بہت امیداں نال تبدیلی دے نعرے اتے جناب عمران خان نوں ووٹ دتے سن۔ نوجوان پرجوش سن کیوں جے خان صاحب اپنی ہر دوجی تقریروچ ایہہ خوشخبری سنایا کردے سن کہ اوہناں دے کول دو سو بندیاں دی اجیہی ٹیم اے جہڑی ملکی معیشت نوں دناں وچ ٹھیک کر دین دی صلاحیت رکھدی اے۔ جناب عمران خان دے چہیتے وزیر آکھیا کردے سن کہ جہڑے دن عمران خان وزیراعظم منتخب ہویا بیرون لک پئے ارباں روپے پاکستان آ جان گے۔ اسیں عالمی مالیاتی اداریاں دا قرض اتار سٹاں گے۔ خان صاحب دے سب توں لائق فائق ساتھی اسد عمر آکھدے سن کہ نواز شریف حکومت پٹرول مہنگے داماں فروخت کر رہی اے۔ ساڈی حکومت آوے گی تے اسیں پٹرولیم مصنوعات دی قیمتاں ادھی کر دیاں گے۔ دو سو ماہرین دا شور کرن والیاں دے کول دو بندے وی ایسے نہیں سی کہ جنہاں دی کارکردگی اتے کپتان نوں فخر ہوندا۔ ہر چھ مہینیاں مگروں وزیراں دے قلمدان تبدیل ہون لگے۔ اپنے وزرا دی کارکردگی ویکھدے ہوئے خان صاحب نوں چاہیدا سی کہ جنا ب آصف علی زرداری تے اپوزیشن لیڈر شہباز شریف ولوں ملک دی بہتری لئی نال رل کے چلن دا خیر مقدم کردے تے جتھے سمجھ نہیںآ رہی سی اوتھے سیاست دے پرانے کھڈاریاں نال مشاورت کرن دی کوشش کردے۔ نوجواناں نوں روزگار فراہم کرن لئی ملک بھر وچ نویں صنعتی یونٹ لگواندے۔ آصف علی زرداری‘ شہباز شریف‘ جہانگیر ترین تے علیم خان جئے سرمایہ داراں نال ملکی معیشت دی مضبوطی لئی کردار ادا کرن دی درخواست کردے۔ ایسی فضا بنان دی کوشش کردے کہ ملک وچ سرمایہ کار کھچے چلے آندے۔ نویں صنعتی یونٹ لگواندے تے جتھے لکھاں نوجواناں نوں نوکریاں ملدیاں اوتھے ملکی برآمدات وچ وادھا ہوندا۔ درآمدات گھٹ ہوندیاں۔ روپیہ مستحکم ہوندا تے ملک توں قرضیاں دا بوجھ گھٹ ہون لگدا۔ لیکن خان صاحب نے ہر گزردے دن دے نال اک ای گل اتے دھیان رکھیا کہ میں اپوزیشن نوں این آر او نہیں دینا تے جتھوں تک اوہناں دا وس چلیا اوہناں نے اپوزیشن لیڈراں نوں پابند سلاسل کر وایا۔ پچھلے وزیراعظم نوں کرکٹ تے سیاست دا فرق سمجھ ای نہیں آ سکیا۔ اوہناں نوں شایدکسے جن بھوت نے دس دتا سی کہ ہن اگلے 20,10 سال تہاڈی ای حکومت ایس ملک اتے رہن والی اے ایس لئی تسیں جیویں چاہو لوکاں دے نال رویہ رکھو۔ جیویں چاہو لوکاں نوں مخاطب کرو۔ اوہناں دی ہر گل میں توں شروع ہوندی تے میں اتے ختم ہوندی۔ اپوزیشن دے نال محاذ آرائی کیہ گھٹ سی کہ جناب خان صاحب نے اپنے محسناں نال وی تعلقات خراب کرنے شروع کر دتے۔ پی ٹی آئی نوں انتخاب وچ کامیابی ملدی نظر آئی تے تجزیہ نگاراں دا خیال سی کہ عمران خان پنجاب دی وزارت اعلیٰ لئی جہانگیر ترین یا علیم خان دا انتخاب کرے گا۔ شاہ محمود قریشی وی وزیراعلیٰ پنجاب دے امیدواراں وچوں سن لیکن خان صاحب نے کسے نادیدہ قوت دے مشورے اتے ملک دے سب توں وڈے صوبہ پنجاب دی وزارت اعلیٰ لئی سردار عثمان بزدار دا انتخاب کر لیتا۔ بزدار صاحب نے کدی سفنے وچ وی وزارت اعلیٰ دی کرسی نہیں ویکھی ہووے گی۔ بزردار صاحب بے شک اک شریف النفس انسان نظر آندے سن لیکن خان صاحب ایہہ نہیں جاندے سن کہ بزدار صاحب دی سفارش کرن والے وزیراعلیٰ ہائوس وچ بیٹھ کے کروڑاں دی دیہاڑیاں لانی شروع کر دین گے۔ نتیجہ ایہہ نکلیا کہ پنجاب وچ آئے دن انتظامی افسراں دے تقرر و تبادلے ہون لگے۔ کدی چیف سیکرٹری بدلیا جاندا تے کدی کسے دی خواہش اتے آئی جی پنجاب بدل دتا جاندا۔ جدوں سول سرونٹس نوں ہر ویلے اپنی نوکری دی فکر لگی ہووے تے اوہناں نے کم کیہ کرنا سی تے عوامی مسئلے کیویں حل کرنے سن۔ جدوںکپتان دے خلاف تحریک عدم اعتماد آ گئی تے اوہدا سامنا کرن دے بجائے اپنی کرسی بچان لئی مختلف حیلے بہانے تراشن لگے۔ جس طرح 87 وچ سیمی فائنل ہارن مگروں گھر لک گئے سن بالکل اوسے طرح ہن وزارت اعظمیٰ دی سیٹ جاندی ویکھ کے اسمبلی آن دا حوصلہ نہیں کر سکے۔ عمران خان دے دور وچ کِنھی کرپشن ہوئی ایہدے بارے تے آن والا ویلا ای دسے گا لیکن اک گل کنفرم اے کہ خان صاحب نوں سیاست کرنی نہیں آندی۔
