سنھ
سلیم اختر ڈھیرا
لوٹے تے اسی سارے آں
کھوٹے تے اسی سارے آں
ویکھن اچ پتھر دی کندھ
ورتن چ اسی پارے آں
ساتھوں ذرا دور کھلو
مٹی دے اسی گارے آں
مل ساڈا بس ہک اشارہ
اسی بس ونگارے آں
دریا پار وی ساتھوں ہوندا نئی
اسی دسدے وی نئیں منتارے آں
ہتھاں اچ ساڈے پانی دیاں مشکاں
پر اندر دے اسی ساڑے آں
اسی پچھیے کی ساڈی منزل کی
بھیڈاں دے اسی واڑے آں
دور ہووے کیویں لالی اکھیاں دی
انیندرے دے اسی مارے آں
توں اپنے دل توں پچھ کے ویکھ
اسی کتنے تینوں پیارے آں
رب سچا کی سنے ساڈی
کڑمے اسی بلارے آں
اسی آپ لائی سنھ اپنی کندھ نوں
اسی اپنی جڑ دے کہاڑے آں
