اسیں کنے بدبخت تے بدنصیب آں

مطلوب ورائچ

عمران خان اقتدار توں چلے گئے پر جاندے ہوئے اوہ بہت ساریاں ننگا ضرور کر گئے۔ ایہ اللہ دی قدرت اے کہ 11اپریل نوں شہبازشریف تے فرد جرم لگن جا رہی سی پر ہن اوہ پاکستان دے سیاہ سفید دے مالک نیں۔ ساڈی تریخ وچ 3اپریل دے بعد 9 اپریل دا دن تریخ وچ اک اہم باب دے طورتے رقم ہو گیا کوئی ایہنوں کالا باب تے کوئی سنہری باب کہہ رہیا اے۔ 3اپریل نوں ڈپٹی سپیکر قاسم سوری ولوں امریکہ توں آن والی دھمکی نوں پاکستان خلاف سازش قرار دتا تے ایس دھمکی آمیز خط تے باراں جماعتی اتحاد دی تحریک عدم اعتماد دے وچکار رابطے قرار دے کے تحریک رد کر دتی۔ ایہدے تے چھیتی طور تے سپریم کورٹ دا بنچ تشکیل دتا گیا‘ ایہ اتوار دا دن سی ایہدے بعد پنج دن سماعت ہوئی تے معزز عدالت نے سپیکر نوں حکم دتا کہ 9 اپریل نوں ساڑھے دس وجے اجلاس سد کے اوتھوں کاروائی شروع کیتی جاوے جتھوں تن اپریل نوں شروع کیتی گئی تے فیر 9 اپریل آ گئی‘ اجلاس شروع ہویا جہدے وچ تقریراں شروع ہوئیاں۔ اجلاس وقفے وقفے نال التوا دے بعد شروع ہوندا رہیا۔ اپوزیشن جماعتاں جو حکومتی بن گئیاں نیں۔ چھیتی طور تے ووٹنگ دا مطالبہ کر رہیاں سن تے ہر لمحہ گزرن دے نال اوہناں دا صبر جواب دے رہیا سی تے فیر رات یاراں وجے دے نیڑے وزیراعظم عمران خان نے سپیکر اسد قیصر نوں ملاقات لئی سدیا۔ اوہناں دے سامنے امریکی خط ڈی کلاسیفائیڈ کرکے رکھیا گیا۔ اوہناں نے خط پڑھیا تے اسمبلی دی کاروائی شروع کرن دے بعد ایہ کہندے ہوئے استعفیٰ دے دتا کہ اوہناں دی غیرت گوارا نہیں کردی کہ خط ویکھن دے بعد اوہ سپیکر دے عہدے تے برقرار رہن۔ خط پاکستان دے خلاف سازش اے‘ ڈپٹی سپیکر قاسم سوری نے وی استعفیٰ دے دتا۔ ایسے دوران جدوں رات اپنے ادھ نوں اپڑی اپوزیشن نوں لگ رہیا سی کہ ووٹنگ نہیں ہو رہی اوہ سپریم کورٹ نال رجوع کرن دی گل ہو رہی سی تے فیر ادھی رات توں پہلاں سپریم کورٹ دے جج عدالت کھلوا کے اپڑ گئے۔ اودھر اسلام آباد ہائیکورٹ وی کھل گئی۔ ادھی رات تک بہرحال عمران خان استعفیٰ دین توں انکاری رہے۔ اوہ جو کہندے سن نہ جھکوں گا نہ بکوں گا واقعی اوہناں نے اپنے کہے نوں سچ ثابت کر دتا۔ اک دن وچ بہت کجھ ہو گیا جہنوں اک کالم وچ سمیٹیا نہیں جا سکدا۔ تحریک عدم اعتماد تے ووٹنگ دے بعد جتن والیاں نے ڈھول وجاندے ہوئے تقریراں کیتیاں۔ ایسے دوران ایوان وچ موجود واحد حکومتی رکن وفاقی وزیر محمد علی خان نے وی اپنا نکتہ نظر بیان کیتا۔ اوہناں دی تقریر نوں تریخی قرار دتا جا سکدا اے۔
قومی اسمبلی وچ اپوزیشن دی تحریک عدم اعتماد دی کامیابی دے بعد حکومت دی نمائندگی کرن والے واحد رکن قومی اسمبلی علی محمد خان نے بڑا جوشیلا خطاب کردے ہوئے آکھیا کہ عمران خان نے حکومت قربان کیتی اے پر غلامی قبول نہیں کیتی‘ عمران خان دا گناہ ایہ وے کہ اوہنے سامراج دے سامنے کھڑے ہو کے ایبسولوٹلی ناٹ کہیا‘ مینوں ایس گل تے مان اے میرا لیڈر کھڑا رہیا‘ جھکیا نہیں نہ وکیا‘ ڈریا نہیں‘ عمران خان لوکاں دی طاقت نال اک واری فیر ایسے کرسی تے دوتہائی اکثریت نال بیٹھے گا۔ حکومتی رکن علی محمد خان نے قومی اسمبلی وچ بڑی جذباتی تے ولولہ انگیز تقریر کردے ہوئے آ کھیا کہ قائداعظم دا قول اے کہ مسلمان ہار منن لئی پیدا نہیں ہویا‘ اوہ بابر تے ٹیپو سلطان بن دا اے تے شہادت قبول کردا اے غلامی نہیں‘ مینوں عمران خان دا ساتھی ہون تے مان اے‘ عمران خان نے حکومت قربان کیتی اے پر غلامی قبول نہیں کیتی۔ تہاڈے چہریاں تے خوشی اے اللہ تہانوں خوش رکھے‘ اج دا دن فضل الرحمن سنے لوکاں لئی بہت سارے سوال چھڈ کے جا رہیا اے اوہ عمران خان نوں یہودی تے امریکی ایجنٹ کہندے سن اوہ کیسا ایجنٹ سی جہنوں ہٹان لئی امریکہ نے اڈی چوٹی دا زور لایا‘ عارضی نکامی شکست دا متبادل نہیں۔ اپوزیشن ولوں اوہناں دے خطاب دوران ڈاڈھی نعرے بازی کیتی گئی جہدے تے اوہناں نے آکھیا کہ میں تہاڈی تنقید تے ہوٹنگ برداشت کراں گا۔ تہاڈی خواہش سی کہ عمران خان دی حکومت ختم ہووے۔ انشاء اللہ عمران خان اک واری فیر ایسے کرسی تے آوے گا پر دوتہائی اکثریت نال۔ برداشت کرو تھوڑا صبر کرو‘ عمران خان دا گناہ ایہ وے کہ اوہنے دو واری مسلم دنیا نوں ایتھے اکٹھا کیتا اسیں دشمن نہیں اسیں رل کے پاکستان بنانا اے پر تہاڈے نظریے تے طریقے نال اتفاق نہیں۔ عمران خان نے مسلم بلاک دی گل کیتی‘ آزادانہ خارجہ پالیسی دی گل کیتی ایہو اوہناں دا گاہ اے۔ روس صرف بہانہ اے‘ عمران خان نشانہ اے۔
عمران خان دی حکومت دا آخر کار خاتمہ ہو گیا۔ اوہناں نوںکڈھن والیاں دے گھراں وچ گھی دے چراغ بل رہے ینں۔ مٹھائیاں ونڈیاں جا رہیاں نیں اوہ قوم نوں خوددار بنا کے اوہدا عالمی سطح تے سربلند کرنا چاہندے سن۔ سامراج دے سامنے اوہ نہ جھکن دی گل کردے سن تے اوہناں نے انج کرکے وکھایا وی۔ اسلاموفوبیا دے خلاف اوہ امہ دے سرخیل ثابت ہوئے۔ اوہناں دی حکومت ختم ہوئی تے نبی کریمؐ دے خاکے بنان والیاں ولوں خوشی تے اطمینان دا اظہار کردے ہوئے عمران خان نوں دہشت گرد قرار دتا گیا۔ ساڈے وچوں وی کئی لوکاں لئی عمران خان دہشت گرد سی تے ہے۔ دہشت گرد دی جہڑی سزا ہوندی اے اوہو عمران خان نوں اندرونی تے بیرونی اشرافیہ پورا زور لا دیوے گی۔ عمران خان جس طرح اقتدار توں گئے مینوں ایہ شعر یاد آ جاندا اے۔
جس دھج سے کوئی مقتل کو گیا
وہ شان سلامت رہتی ہے
ٹشوپیپرز وی کسے کم تے آندا اے اسیں تے اوہ وی نہیں‘ بطور قوم اج مینوں پاکستانی ہون تے شرمندگی اے۔ اج میں قائداعظم توں‘ اج میں اقبال دے خواب توں شرمندہ واں۔ سانوں ورھیاں تک مطالعہ پاکستان پڑھایا جاندا رہیا کہ ٹیپو سلطان نے کہیا سی کہ شیر دی اک دن دی زندگی گیدڑ دی سو سالہ زندگی توں بہتر اے پر اج اسیں اپنے آپ نوں سامراج دا حواری بنان تے اڑے آں اج اسیں سامراج دا بھکاری تے کمی کمین ہون تے فخر محسوس کرنے آں۔ اسیں کنے بدبخت تے بدنصیب آں۔٭