ردعمل وچ حکمت ضروری اے

سعد اللہ شاہؒ

ہم نے کہانی بدل کے دیکھی کر کے نئی پرانی
اپنے ہاتھوں قتل ہوئے پھر اک راجہ اک رانی
اپنی روکھی سوکھی اچھی اپنی دھوپ بھی چھائوں
پیٹ کی خاطر اک من موجی کرے گا کیوں دربانی
گل اصل وچ دل و دماغ دی ہو رہی سی تے مقطع وچ آ پئی۔ سخن گسترانہ گل ایہہ وے کہ پی ٹی آئی نے ریلیاں کڈھ کے ساریاں نوں حیران کر دتا میں ایہ پہلے وی لکھ چکیا واں کہ امریکہ مخالف بیانیہ نوں انگلی لگے گی۔ ایہ اک وکھری گل اے کہ امریکہ دے گرین کارڈ لئی اسیں مردے پھریئے پر امریکہ دی مخالفت ساڈی نفسیات دا حصہ اے۔ وجہ تے ظاہر اے کہ اوہ مسلماناں دا سب توں وڈا مخالف اے اوہ معاشی طور تے وی سب توں زیادہ مضبوط اے کہ اوہ خلیجی ریاستاں دے اثاثیاں نوں وی اپنے سمجھدا اے۔ گل کسے ہور پاسے نکل جاوے گی پر چلدے چلدے تہانوں ٹرمپ دی اک گل یاد دوا دیواں کہ جدوں کسے نے سوال کیتا سی کہ امریکہ اپنا بھاری بھر کم قرضہ کیویں لاہوے گا تے ٹرمپ نے بھولپن وچ کہیا ایہ خلیجی ریاستاں کاہدے لئی رکھیاں ہوئیاں نیں کہ ہن تذکرہ کرنے آں پی ٹی آئی دیاں ریلیاں دا کہ اوہناں نے موجودہ صورتحال وچ چنگا بھلا ارتعاش پیدا کر دتا اے تسیں ایہنوں جو مرضی کہوو کہ ایہو مسلماناں دے امریکہ مخالف جذبات نوں ایکسپلائٹ کیتا جا رہیا اے پر اک گل تے مننی پوے گی کہ عمران خان دے خلاف ریاستی یلغار نے اوہناں نوں وچارا تے بنا دتا اے تے فیر لوکاں دیاں ہمدردیاں اوہناں دیاں ریلیاں وچ روشن موبائل دی صورت نظر آ رہیاں سن۔ تسیں ایہنوں عمران دی سحرانگیزی کہہ لوو تے وی غلط نہیں ہووے گا:
ہر طرف اک شوز برپا اور لوگوں کا ہجوم
ہم نے گویا شہر سارا اپنی جانب کر لیا
ایس ساری صورتحال دے پیدا ہون وچ شہبازشریف دی امریکہ دے حوالے نال گل بات کہ جہدے وچ اپنی وچارگی تے بے بسی دا تذکرہ کیتا گیا وی اثرانداز ہوئی خواجہ آصف دیاں گلاں وی خودداری دے منافی سن۔ ٹھیک اے اوہ اوہناں نوں حقیقت پسندی تے دانشوری سمجھدے رہن پر قوم ایس لہجے نوں اپنی توہین سمجھدی اے۔ گل کجھ ایس طرح اے کہ گل تخریب ول ودھ رہی اے اسیں تے بار بار لکھدے رہے کہ اسمبلیاں نوں مدت پوری کرن دینی چاہیدی اے۔ چلو جے اپوزیشن نے عدم اعتماد دی ٹھان لئی سی کہ ایہ اوہناں دا آئینی حق سی ایتھے گیند خان صاحب دے کورٹ وچ سی خان صاحب اوہناں نوں چیلنج کردے رہے تے اوہنوں اپنی دغابازی دسدے رہے کہ سارے دشمن اکٹھے ہو کے میرے ہتھوں برباد ہو گئے۔ میں عدلیہ دے رویے تے کجھ نہیں کہواں گا کہ ایسے عدلیہ نے نوازشریف دے خلاف فیصلہ دتا تے ساریاں نوں پتہ اے کہ جس طرح اوہ شور مچاندے رہ گئے کہ مینوں کیوں کڈھیا اکثریت نے ایہو کہیا کہ پاناما کیس وچ اکلے اوہناں نوں ٹارگٹ کیتا گیا فیر ججاں دی ویڈیو لیکس ہوئی اک لمی کہانی اے عدلیہ اودوں وی شاید آزاد سی۔ آپ خان صاحب نے کہیا کہ جدوں عدلیہ اوہناں دے خلاف فیصلہ دیندی اے تے ایہ نہیں من دے میرا خیال اے کہ ایہ اک عام تریخی رویہ ساریاں دا رہیا اے ہن ایہ اعتراض کہ رات گئے عدالت کیوں کھلی تے ایس گل دا جواب تے جج حضرات ای دے سکدے نیں کہ بااختیار نیں۔ گل اصل وچ میں ایہ کرنا چاہنا واں کہ معاملے تے تصادم ول نہ لے جایا جاوے اک باوقار انداز وچ اک مضبوط تے زبردست اپوزیشن بن کے حکومت نوں واچ کیتا جاوے تے انتخابات دا مطالبہ کیتا جاوے انتخاب ای فیصلہ کرن گے کہ:
اب ہوائیں ہی کریں گی روشنی کا فیصلہ
جس دیے میں جان ہو گی وہ دیا رہ جائے گا
فیصلہ تے لوکاں دے ووٹ نے کرنا اے جو ایس ویلے مہنگائی پاروں بڑے پریشان نیں جے ابتری مچائی گئی تے فیر حالات ہور وگڑ سکدے نیں جے دوجے پاسے وی پاور شو والی صورتحال پیدا ہو گئی تے حالات کوئی ہور ہی سنبھالے گا گھٹو گھٹ رمضان شریف وچ اوہدے تقدس دا خیال رکھدے ہوئے اپنی حکمت عملی تیار کر لئی جاوے۔
مقصد کجھ لکھن دا ایہ وے کہ بڑا چنگا ہووے کہ آپس دیاں تلخیاں بھلا کے ملک لئی سوچیا جاوے معیشت نوں ٹھیک کرنا وی تے اک وڈا چیلنج اے اوہ جو کہندے نیں کہ بندہ بھکھ نال مر جاوے پر غلام بن کے نہیں جینا چاہیدا ایس گل توں کوئی انکار نہیں کر سکدا کہ قومی سلامتی ورگا کوئی انعام ای نہیں پر ایہدے وچ جو کجھ ہویا اوہ تے کرن والے کر گئے غریب وچارا تے کدھرے وی رسائی نہیں رکھدا۔ ہن گل تے بھیڑی لگے گی پر آئی ایم ایف دے کول جانا تے سٹیٹ بینک تک گروی رکھ دینا آخر سب خودداری دے منافی ای تے ہے کوئی حکمت عملی بہرحال طے کرنا پوے گی۔ مجرماں نوں سزاواں تے دوائو اوہ جو کیفرکردار تے اپڑان والا محاورہ اے۔ ایتھے جتھے زندگی بچان والیاں دوائیاں وی جعلی ملدیاں نیں قومی شعور جگان دی لوڑ اے ہر چیز دا اک طریقہ کار اے اپنے آپ نوں شیریں زبانی تے مدبر لہجے نال چنگا تے بہتر ثابت کرو گالھاں دا کلچر سب کجھ برباد کر دیوے گا آخر وچ جاوید قاسم دے دو شعر:
دامن شاہ امم ہاتھ میں آیا ہوا ہے
آسمان میری ہتھیلی میں سمایا ہوا ہے
اک تجلی نے رگ جاں کے برابر قاسم
نور سے پانچ چراغوں کو جلایا ہوا ہے